2 Tamuera 11:1-27
11 Ni moan te ririki* n te tai are a nanako iai ni buaka ueea, ao Tawita e kanakoa Ioaba ma ana toro ao ana taanga ni buaka Iteraera, bwa a na kamaunaia tibun Ammon, ao a otabwaninia Rabaa,+ ao e tiku Tawita i Ierutarem.+
2 N te tairiki teuana* ao e teirake Tawita mani nnena ni wene ao e ririaki i taubukin ana auti* te uea. Ao e nora te aine temanna mai taubukin ana auti bwa e tebotebo, ao e rangi ni baaraoi te aine arei.
3 E kanakoa temanna Tawita bwa e na titiraki ibukin te aine arei, ao e kaongoraea ni kangai: “Tiaki boni Batateba+ neiei are natin Eriam,+ are buun Uria+ are tibun Eta?”+
4 E kanakoia ngkanne taan uataeka Tawita bwa a na kaira neiei.+ Mangaia are e a roko neiei irouna ao e a wene ma ngaia.+ (E riki aei ngke e tabe neiei ni kaitiakia mani kamwaraana.*)+ Imwina ao e a okira ana auti neiei.
5 Ao e a bikoukou neiei ao e kanakotaeka nakon Tawita ni kangai: “I a bikoukou.”
6 Ibukin aei ao e a kanakotaeka Tawita nakon Ioaba ni kangai: “Kanakomaia nakoiu Uria are tibun Eta.” Ao Ioaba e kanakoa Uria nakon Tawita.
7 Ngke e a roko irouna Uria, ao e a titirakinna Tawita bwa e uara Ioaba, ao a uara kaain te taanga ni buaka, ao e uara te buaka.
8 E taku ngkanne Tawita nakon Uria: “Ko na nako n ruo nakon am auti ao rawea motirawam.”* Ngke e kitana ana auti te uea Uria, ao e taorimwiaki n ana bwaintangira* te uea.
9 Ma e a matu naba Uria ni kawaini mataroan ana auti te uea i rarikia ana toro ni kabane ana toka, ao e aki ruo nakon ana auti.
10 Mangaia are e tuangaki Tawita ae kangai: “E aki ruo Uria nakon ana auti.” Ngaia are e taku Tawita nakon Uria: “Tiaki ko a tibwa oki man te mwananga teuana? Ao e aera ngkai ko aki ruo nakon am auti?”
11 E kaeka Uria nakon Tawita ni kangai: “E memena te Ati+ ma tibun Iteraera ao tibun Iuta n taabo ni katantan aika aki teimaan, ao e kaembwa au toka ae Ioaba ma ana toro nako au toka n te tawaana. E riai ngkanne bwa N na rin n au auti n amwarake ao ni moi ao ni wene ma buu?+ Ngkai ko boni maiu ao a maiu naakai, ao N na bon aki karaoa te baei!”
12 E taku ngkanne Tawita nakon Uria: “Ko na tiku riki ikai n te bong aei, ao N na kanakoko ningabong.” Mangaia are e tiku Uria i Ierutarem n te bong arei ao n te bong naba are imwina.
13 Ao e kanaanako Tawita bwa e na weteaki teuaei bwa e na amwarake ao ni moi ma ngaia, ao e kamangingnga. Ma ngke e a tairiki ao e a nako teuaei ni matu i aoni nnena ni wene i rarikia ana toro ana toka, ao e aki ruo nakon ana auti.
14 N te ingabong ao e a korea ana reta Tawita nakon Ioaba ao e kanakoa ni bain Uria.
15 E korea ae kangai n te reta: “Kaaki Uria n rain ake mai moa ike moan te kamamate iai te boo ni buaka. Ao kerikaaki mairouna bwa e aonga n oreaki ao ni kamateaki.”+
16 E a tia Ioaba n tarataraa raoi te kaawa, ao e katea Uria n te tabo are e ataia bwa iai taani buaka aika korakora iai.
17 Ngke a otinako mwaanen te kaawa ao a buakana Ioaba, ao a a bwaka ana toro Tawita tabeman, ao e mena Uria are tibun Eta i buakoia te koraki ake a mate.+
18 Ao Ioaba e kaongoa Tawita taekan te buaka ni kabane.
19 Ao e tuanga te tia uataeka ni kangai: “Ngkana ko a tia n taetae nakon te uea ni kaineti ma taekan te buaka ni kabane,
20 ao e na bae n un te uea ao e na kangai nakoim, ‘Bwa e aera ngkai kam a rangi ni kaania te kaawa ni buakanna? Kam bon aki ataia ae a na katebe mai taubukin te oo?
21 Antai are kamatea Abimereka+ are natin Ierubeteta?*+ Tiaki bon te aine ngkoa are e kabwakaa te atibu ni kamantinti i aona mai taubukin te oo, are e a mate iai i Tebeti? E aera ngkai kam a rangi ni kaania te oo?’ Ao ko na kangai, ‘E mate naba am toro are Uria are tibun Eta.’”
22 Mangaia are e nako te tia uataeka arei, ao e tuanga Tawita bwaai ni kabane ake e kanakoaki iroun Ioaba bwa e na taekin.
23 Ao e tuanga Tawita ni kangai te tia uataeka: “A konaira moa aia rorobuaka ao a otinako ni buakanira n te tawaana, ma ti a manga kakioia ni kaokiia nakoni mataroan oon te kaawa.
24 Ao a katebeia am toro taani katebe mai taubukin te oo, ao a mate tabeman ana toro te uea, ao e mate naba am toro are Uria are tibun Eta.”+
25 Ao e taku Tawita nakon te tia uataeka: “Kangai nakon Ioaba, ‘Tai katabeaiangako n te baei, bwa e na boni bae n iai ae e na mate n te buaka. Kakorakoraa am buaka n ekaanako te kaawa ao tokanikai i aona.’+ Ao ko na kaungaa.”
26 Ngke e ongo buun Uria ae e a mate buuna are Uria, ao e a tanginiweneia buuna.
27 Ngke e toki naba ngkekei tain te tanginiwenei, ao e a kanaanako Tawita ibukin neiei ao a kairia nakon ana auti teuaei, ao e a riki neiei bwa buuna+ ao e a bungia natin teuaei ae te mwaane. Ma e rangi n aki kakukureia* Iehova te bwai are e karaoia Tawita.+
Taiani Kabwarabwara Mai Nano
^ Ae taekan tain te abue.
^ Ke, “Ngke e a kaani bong.”
^ Ke, “baareti.”
^ Tao kamwaraan aorakina n aine.
^ Ebera, “teboki waem.”
^ Ke, “tibwangan te uea,” ae taekan te tibwanga are roko mairoun te tia bwaintangira nakon te iruwa ae karineaki.
^ Ebera, “e buakaka i matan.”
