2 Tamuera 15:1-37
15 Imwini baikai ni kabane ao e a karekei ana kaa ni buaka Abetarom ma aoti, ao mwaane aika 50 aika a na biribiri imwaina.+
2 Ao e ututimwaaka Abetarom ao e tei i rarikin te kawai i rarikini mataroan oon te kaawa.+ Ngkana iai ana tangitang te aomata temanna ae e na nakon te uea ibukin te motikitaeka,+ ao e na weteia Abetarom ao e na kangai: “Kaain te kaawa raa ngkoe?” ao e na kangai te aomata anne: “Boni kaain teuana mai buakon aia baronga tibun Iteraera am toro.”
3 Ao e na kangai Abetarom nakoina: “Noria, a bon eti ao a riai am tangitang, ma akea temanna mairoun te uea ae e na ongoraeakina am tangitang.”
4 E na kangai Abetarom: “Tera ngke I mwiokoaki bwa te tia motikitaeka n te aba! Ao a kona ngkanne ni kawarai aomata nako ake iai aia tangitang, ke a kainnanoa te motikitaeka, ao N na taraia raoi bwa a na karekea te kaetitaeka ae riai.”
5 Ao ngkana e roko te aomata temanna ni kaania bwa e na bobaraaki nakoina, ao Abetarom e arora baina ao e taua te aomata anne ao e kaboria* ma ngaia.+
6 E kakaraoa aei Abetarom nakoia tibun Iteraera ni kabane ake a na rin nakon te uea ibukin te motikitaeka. Mangaia are e teimatoa Abetarom n anai nanoia mwaane ake tibun Iteraera.+
7 Imwini banen aua te ririki* ao e a taku Abetarom nakon te uea: “Taiaoka ma kariaia bwa N na nako Eberon+ bwa N na kakororaoa au taeka ni bau are I karaoia nakon Iehova.
8 Bwa e taekina te taeka ni bau ae okoro aei am toro+ ngke I maeka i Keturi+ i Turia, ni kangai: “Ngkana e kaokai Iehova nako Ierutarem, ao N na angakarea nakon* Iehova.’”
9 Ngaia are e taku te uea nakoina: “Naako ma te rau.” Ao e teirake ao e nako Eberon.
10 E a kanakoia ngkanne taani karaba n tutuo Abetarom nakoia aia baronga nako tibun Iteraera, ao a kangai: “N te tai are kam ongo naba iai tangin te buu, ao katanoataa ae kangai, ‘E a riki Abetarom bwa te uea i Eberon!’”+
11 Ao a ira Abetarom nako ikekei mwaane aika 200 mai Ierutarem. A kairaki ao a mwananga n akea aia atatai, ao a aki ataa te bwai ae riki.
12 Irarikin anne, ngke e anga taiani karea Abetarom, ao e kanaanako wetean Aitobera+ are te I-Kiro man ana kaawa ae Kiro,+ are te tia anga te taeka n reirei nakon* Tawita.+ A a ririkirake mwaitiia te koraki ake a raona Abetarom n ana karitei n ekaanako te uea, ao e a ririkirake naba mwaitiia aomata ake a boutokaa Abetarom.+
13 Imwina riki ao e a roko te tia nikira te rongorongo iroun Tawita, ao e taku: “A a rairaki nanoia mwaane ake tibun Iteraera nakon Abetarom.”
14 E aki tabwara Tawita ma e a taku naba nakoia ana toro ni kabane ake raona i Ierutarem: “Teirake ao ti na birinako,+ bwa akea temanna iroura ae e na reke birinakona mairoun Abetarom! Kabaitingkami bwa e kaawa ni waekoa n ooira ao e na karokoa te kabuanibwai i aora, ao n orea te kaawa n te kabaang!”+
15 A kaeka ana toro te uea ni kangai nakon te uea: “Ane e motikia au toka ae te uea, ao a tauraoi ni karaoia am toro.”+
16 Mangaia are e a otinako te uea ma kaaini batana ni kabane aika ririmwina, ma e katikuia buuna ni kewe* te uea aika tengaun+ bwa a na tararuaa te auti.*
17 Ao e touaanako kawaina te uea ma aomata ni kabane ake a ririmwina, ao a motirawa i Betamereaka.
18 A bane ana toro ake a nako ma ngaia ni mwananga rirarikina,* ma taiani Keritaite ni kabane, taiani Beretaite,+ ao I-Kate,+ ake mwaane ake 600 ake a iria mai Kate,+ ao e tataraiia te uea.*
19 E taku ngkanne te uea nakon Itai+ are te I-Kate: “E aera ngkai ko irira naba? Ko na nako n oki ao maeka i rarikin te uea ae boou, bwa bon te ianena ngkoe ao te taenikai naba man am tabo.
20 Ko roko ngkoananoa, ao te koaua bwa I riai ni kairiko n te bong aei bwa ko na tiotionako ma ngaira, bwa ko na nako n te tai are N na nako iai ao n nako ike N na nako iai? Ko na nako n oki ao kairiia tarim bwa raom, ao e bia kaota nakoim Iehova te tangira ae koaua* ao te kakaonimaki!”+
21 Ma e kaeka Itai nakon te uea ni kangai: “Ngkai bon iai Iehova, ao ngkai e boni maiu au toka ae te uea, ao ike e mena iai au toka ae te uea, bwa tao te mate ke te maiu, ao e na mena naba iai am toro!”+
22 Ao e taku Tawita nakon Itai:+ “Mwananga nakon iterana are teuana.” Mangaia are e a mwananga Itai are te I-Kate nakon iterana are teuana ma ana rorobuaka ni kabane ao ataei.
23 A bane n tang n takarua aomata ake n te aba ngke a bane n rinanon te mwarua aomata aikai nakon iterana are teuana, ao e tei te uea i rarikin te Mwarua ae Kiteron.+ A bane aomata ni mwananga nakon iterana are teuana nakon te kawai ae tiki nakon te rereua.
24 E mena naba ikekei Tatoka+ ao raona tibun Rewi+ ni kabane ake a uouota ana ati+ ni berita te Atua ae koaua.+ Ao a karuoa ana Ati ni berita te Atua ae koaua, ao e waerake Abiata+ ngke a bane aomata nako ni kitana te kaawa ao n rinanon te mwarua nakon iterana are teuana.
25 Ma e taku te uea nakon Tatoka: “Anaa ana Ati te Atua ae koaua ni kaokia nakon te kaawa.+ Ngkana e reke akoau i matan Iehova, ao ane e na kaokai naba ao ni kariaia bwa N na nora te ati anne ma te tabo are e mena iai.+
26 Ma ngkana e kangai, ‘Akea kukureiu iroum,’ ao ke e karaoa nakoiu ane e taku bwa e raoiroi i matana.”
27 E taku te uea nakon Tatoka are te ibonga:* “Tiaki bon te tia matairiki ngkoe?+ Okira te kaawa ma te rau, ao kairiia natim mwaane akana uoman bwa raom, Aimaati are bon oin natim, ao Ionatan+ are natin Abiata.
28 Noria, N na tiku ni kaoran nako te karaanga ake n te rereua, ni karokoa rokon te rongorongo mairoum ae N na kaongoaki.”+
29 Mangaia are a anaa ana Ati te Atua ae koaua Tatoka ao Abiata ni kaokia nako Ierutarem, ao a a tiku ikekei.
30 Ngke e a ararakea te Maunga ae Oriweta Tawita,+ ao e tang ngke e ararake, ao e rabunaki atuna ao e nakonako n akea ana kau. A bane naba aomata ake raona n rabun atuia, ao n tang ngke a ararake.
31 E a kaongoaki ngkanne ae kangai Tawita: “E mena naba Aitobera i buakoia te koraki ake raon+ Abetarom+ ni bairea te karitei.” Ao e taku Tawita: “Taiaoka Iehova+ ma bita ana taeka n reirei* Aitobera nakon te bae nanobaba!”+
32 Ngke e a roko Tawita i taubukina ike a bobobaraaki iai aomata nakon te Atua, ao e mena ikekei Utiai+ are te Arekaite+ bwa e na kawaria, ma ana kamwarai ae raeuaaki ao e mena te tano i aon atuna.
33 Ma e taku Tawita nakoina: “Ngkana ko irai, ao ko na riki bwa te uota ae rawawata irou.
34 Ma ngkana ko oki nakon te kaawa ao ko kangai nakon Abetarom, ‘Te Uea, bon am toro ngai. Bon ana toro ngkoa tamam ngai, ma ai am toro ngai ngkai,’+ ko kona ngkanne ni kamangaoa ana taeka n reirei Aitobera ibukiu.+
35 Tiaki bon raom ikekei Tatoka ma Abiata ake ibonga? Ko riai n tuangia Tatoka ma Abiata ake ibonga bwaai nako ake tao ko ongo man ana auti te uea.+
36 Noria! Raoia naba ikekei natiia mwaane ake uoman, are Aimaati+ are natin Tatoka ao Ionatan+ are natin Abiata. Kam riai ni kaongoai rinanoia naakai bwaai nako ake kam ongo.”
37 Mangaia are e a rin n te kaawa Utiai are raoraon* Tawita,+ ngke e rinnako naba Abetarom i Ierutarem.
Taiani Kabwarabwara Mai Nano
^ Te kaboria ma temanna, n aron ae te kaboria ma tabana, bon te katei ae bwabwainaki ibukin te kamauri.
^ Ke tao, “40 te ririki.”
^ Ke, “taromauria.” Ebera, “beku ibukin.”
^ Ke, “te tia anga te reirei ni kairiri.”
^ Nora Nanon Taeka, “Buu ni kewe.”
^ Ke, “baareti.”
^ Ke, “mwananga nakon te itera are teuana, i rarikina.”
^ Ke, “mwananga nakon te itera are teuana i matan te uea.”
^ Ke, “te tangira ae kona n onimakinaki.”
^ Nora Nanon Taeka.
^ Ke, “reirei ni kairiri.”
^ Ke, “raoraona ni kaan.”
