2 Tamuera 22:1-51
22 Ao e taekini mwanewen te kuna aei Tawita nakon Iehova+ n te bong are e kamaiua iai Iehova mai nanoni baia akana kairiribai nakoina ni kabane,+ ao mai nanoni bain Tauro.+
2 E taku:
“Bon au bwaa ae rietata Iehova ao au nono,+ ao boni Ngaia ae kamaiuai.+
3 Bon au bwaa Atuau+ ae I kamanoai irouna,Bon au otanga+ ao au koro* ni kamaiu,* ao au tabo ni kamanomano ae mano raoi.*+
Ao au tabo ae N na birinako nako iai,+ au tia kamaiu.+ Boni ngkoe ae ko kamaiuai man te iowawa.
4 I wewete nakon Iehova ae riai ni karaoiroaki,Ao N na kamaiuaki mairouia akana kairiribai nakoiu.
5 E katobibiai te mate n aron taian nao,+Ao a rina n raanga nakoiu ni kakamaakai mwaane aika akea manenaia.+
6 E otabwaniniai te Ruanimate* n aron taian roobu,+Ao e kaitaraai te mate n aron te bwai ni kamwane.+
7 I wetea Iehova i buakon rawawatau,+I teimatoa ni wewete nakon Atuau.
Ao e ongo bwanaau man ana tembora,Ao e roko i taningana tangiu ni kani buokaki.+
8 E ruru te aonnaba ma ni mwainging,+Ao a mwaeiei aani karawa,+A ruru ma ni mwainging ibukina bwa e kaunaki.+
9 E waerake te bubu mani bwangabwangani bwairina,Ao e otinako te ai ae kaakang mai wina.+
A nako mairouna mwaakaro aika ura.
10 E karinanoa karawa ngke e ruo,+Ao e mena i aani waena te rotongitong ae matenten.+
11 E toka i aon te kerubim*+ ao e kibakiba n roko,E kona n noraki i aoni bain te anera* ni kiba.+
12 E rabunna ngkanne n te rotongitong ni katobibia bwa kaanga ana tabo ni katantan,+N raan aika roo ao naang aika matenten.
13 A ura mwaakaro n ai man te oota are mena i matana.
14 Ao e a karebwea te baa mai karawa Iehova,+E kaongongo bwanaana Teuare Moan te Rietata.+
15 E katebei kanoan ana kainikatebe+ ao e kamaenakoia akana kairiribai nakoiu.
Ao e kamangaoia n itiruan te iti.+
16 E a kona n noraki kabin taari,+Ao e a kaotaki aan te aba ni boaan te aba iroun Iehova,N angin ikeikeni bwangabwangani bwairina.+
17 E arora baina man te tabo ae rietata,Ao e tauai ma ni katikai mai nanon te ran ae makuakua.+
18 E kamaiuai mairoun teuare kairiribai nakoiu ae korakora,+Ao mairouia ake a riribaai, ake a korakora riki nakoiu.
19 A kaitaraai n te bong are I rotaki iai n te kabuanibwai,+Ma bon au boutoka Iehova.
20 E kairai ni kaotinakoai nakon te tabo ae mano raoi,*+E kamaiuai ibukina bwa e kukurei irou.+
21 E anganai kaniwangau Iehova ni kaineti ma raoiroiu,+E anganai kaniwangau ni kaineti ma baiu aika akea aia bure.*+
22 Bwa I kawakini kawain Iehova,Ao I aki kitana Atuau, ae te mwakuri ae buakaka.
23 A bane ni mena ana motikitaeka+ i matau,N na aki rairakinako man ana tua.+
24 N na kateimatoa arou ae akea kabuakakaau+ i matana,Ao N na kawakinai man te bure.+
25 E bia anganai boou Iehova ni kaineti ma raoiroiu,+Ao ni kaineti ma akean au bure i matana.+
26 Ko kakaonimaki ni koaua nakon ane e karaoa naba anne,+Ao ko kaotiko bwa ko raoiroi nakon te aomata ae raoiroi ma ni korakora.+
27 Ko kaotiko bwa ko itiaki nakon ane e itiaki,+Ma ko kaotiko bwa ko nanowanawana* nakon ane e buakaka.+
28 Bwa ko kamaiuia te koraki aika nanorinano,+Ma a ekiianako akana kainikatonga matam, ao ko karinanoia.+
29 Bwa bon au taura ngkoe ae Iehova,+Ao bon Iehova ae kaotaa au rotongitong.+
30 I kona ni biri ni kaaitaraia taani kuribwai n am ibuobuoki,
Ao I kona n tamwarakea te oo ni mwaakan te Atua.+
31 E kororaoi kawain te Atua ae koaua,+E itiaki ana taeka Iehova.+
Bon te otanga ngaia nakoia te koraki ni kabane ake a kamanoia irouna.+
32 Bwa antai te Atua irarikin Iehova?+
Ao antai riki te bwaa, ngkai bon tii Atuara?+
33 Bon au tabo ni kamaiu ae korakora te Atua ae koaua,+Ao e na karaoa kawaiu bwa e na kororaoi.+
34 E karaoi waeu bwa a na waekoakoa n aroni waen te ria,Ao e kateai n taabo aika rietata.+
35 E kataneiai baiu ibukin te buaka,A kona baiu ni kabwaoua te kainikatebe ae te buraati.
36 Ko anganai am otanga ni kakamaiu,Ao arom n nanorinano e karikai bwa N na kakannato.+
37 Ko karababaa kawaini mwanekani waeu,Ao a na aki marannako waeu.+
38 N na kaeiia akana kairiribai nakoiu ao N na kamaunaia,N na aki oki ni karokoa ae a mauna.
39 Ao N na kamaunaia ao ni kamanatuaia bwa a aonga n aki teirake,+A na bwaka i aani waeu.
40 Ko na kataubobongaai n te korakora ibukin te buaka,+Ko na kabwakaia i aau akana kairiribai nakoiu.+
41 Ko na kamumunia rikaaki mairou akana kairiribai nakoiu,*+Ao N na karokoia n tokia* te koraki ake a riribaai.+
42 A tang ni kani buokaki ma akea ae e na kamaiuia,A tang naba nakon Iehova, ma e aki kaekaia.+
43 N na ikikiia ni kamteia n aroni bubun te tano
Ao N na kamanatuaia ao n toutouia n aron te bokaboka i nanon te kawai.
44 Ko na kamaiuai man aia kaiangatoa au aomata.+
Ko na kawakinai bwa N na riki bwa te mataniwi i aoia natannaomata.+
E na beku irou te botannaomata ae I aki kinaa.+
45 A na kui ni kerikaaki ianena i matau.+
A na kairaki bwa a na ongeaba irou man rongorongou are a ongo.*
46 Ane e na bua ninikoriaia* ianena,Ao a na roko ma te rurubenebene man aia nono.
47 E maiu Iehova! E na karaoiroaki au Bwaa!+
Ke e karietataaki Atuau, ae te bwaa ae kamaiuai.+
48 E karekekai ibukiu te Atua ae koaua,+E kataenikaiia botannaomata i aau,+
49 E kamaiuai mairouia akana kairiribai nakoiu.
Ko tabekai rake+ i aoia te koraki aika ekainako,Ao ko kamaiuai mairoun te mwaane ae iowawa.+
50 Anne bukina ae N na karabwako iai Iehova i buakoia natannaomata,+Ao N na anene n neboa* aram:+
51 E karaoi mwakuri ni kakamaiu aika korakora* ibukin te uea+ ae e rineia,E kaotiota te tangira ae koaua* nakon ana aomata ae kabiraki,Nakon Tawita ma kanoana* n aki toki.”+
Taiani Kabwarabwara Mai Nano
^ Nora Nanon Taeka.
^ Ke, “au tia kamaiu ae mwaaka.”
^ Ke, “te tabo ae rietata ae mano raoi.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Nora Nanon Taeka.
^ Ke, “te ang.”
^ Ke, “te tabo ae mwawaawa.”
^ Ebera, “itiaki.”
^ Ke tao, “bakaaea te baba.”
^ Ke, “Ko na anganai akuia akana kairiribai nakoiu.”
^ Ebera, “kainabwabuia.”
^ Ebera, “A na ongeaba irou n te baere e ongo te taninga.”
^ Ke, “maunanako.”
^ Ke, “katangitang nakon.”
^ Ke, “tokanikai aika korakora.”
^ Ke, “te tangira ae kona n onimakinaki.”
^ Ebera, “ana kariki.”
