2 Tamuera 6:1-23
6 Ao Tawita e a manga ikotiia naba ni kabane taani buaka i Iteraera aika korakora riki aika 30,000.
2 Ao e nako Tawita ma rorobuaka ni kabane ake raona nako Baareiuta, bwa a na uota mai ikekei ana Ati te Atua ae koaua+ are te Ati are a tataboa i matana aomata aran Iehova ae Atuaia taanga ni buaka,*+ are e tekateka n te kaintokanuea i etaia* kerubim.*+
3 Ao a kaaki ana Ati te Atua ae koaua i aon te kaa ae boou+ bwa e na uotaki iai man ana auti Abinataba,+ are i aon te tabuki. A kaira te kaa are boou arei Uta ao Aiio ake natin Abinataba.
4 Mangaia are a uota ana Ati te Atua ae koaua man ana auti Abinataba are i aon te tabuki, ao e nakonako Aiio n ririmoan te Ati.
5 Ao a bukamaru Tawita ma tibun Iteraera ni kabane i matan Iehova, ni bwaai ni katangitang n aekaia nako aika karaoaki man te kai ae te mwaiango, taian abi, ao bwaai ni katangitang riki tabeua aika iai karaiia,+ n ikotaki naba ma tamboriin,*+ timbara,*+ ao ai boni bwaai ni katangitang riki tabeua.
6 Ma ngke a roko n ana tabo ni kaaki kun ni uita Naakon, ao e a kaenakoa naba baina Uta ao n taua ana Ati te Atua ae koaua,+ bwa a kuri ni karangaa te kaa taiani kao.
7 Ngaia are e a urarake unin Iehova n ekaanako Uta, ao te Atua ae koaua e kamatea teuaei+ ikekei ibukin ana mwakuri ae aki riai,+ ao e mate ikekei i rarikin ana Ati te Atua ae koaua.
8 Ma e un* Tawita ibukina bwa e roko unin Iehova n ekaanako Uta, ao e aranaki te tabo arei bwa Beretiuta* ni karokoa te bong aei.
9 Mangaia are e a maaka Iehova+ n te bong anne Tawita, ao e taku: “E na kangaa ngkanne n roko irou ana Ati Iehova?”+
10 Ao e a aki kan uota Tawita ana Ati Iehova nakon ana tabo ni maeka n Ana Kaawa Tawita,+ ma e tua Tawita bwa e na uotaki nakon ana auti Obetaetom+ are te I-Kate.
11 Ao e tiku ana Ati Iehova n ana auti Obetaetom are te I-Kate i nanon tenua namwakaina, ao e teimatoa Iehova ni kakabwaiaa Obetaetom ma kaaini batana ni kabane.+
12 E kaongoaki te Uea are Tawita ae kangai: “E kakabwaiaa ana auti Obetaetom ma ana bwai ni kabane Iehova, ibukin ana Ati te Atua ae koaua.” Ai ngaia are e a nako Tawita bwa e na uota ana Ati te Atua ae koaua man ana auti Obetaetom nakon Ana Kaawa Tawita ma te kimwareirei.+
13 Ngke a mwananga taan uouota+ ana Ati Iehova onoraka, ao e a kareana naba te kao mwaane temanna ma te man ae kamarikaaki.
14 E mwamwaie Tawita ni kakatobibi i matan Iehova ma korakorana ni kabane, ao e bwainna* n te tai anne Tawita n te ebota ae te rinen.+
15 Ao Tawita ma tibun Iteraera ni kabane a uota ana Ati+ Iehova ma te takarua ni kimwareirei+ ma tangin te buu ae te koro.+
16 Ma ngke e roko ana Ati Iehova i nanon Ana Kaawa Tawita, ao e taraa naano man te kamaama Mikara are natin Tauro,+ ao e nora te Uea are Tawita bwa e kibakiba ao ni mwamwaie ni kakatobibi i matan Iehova, ao e a ribaia i nanona.+
17 Mangaia are a uota ana Ati Iehova ni karinna ao a kaaki ni nnena i nanon te umwanrianna are e kateia Tawita bwa nnena.+ Ao e kareani karea ni kabuekaki Tawita+ ma karea n raoi*+ i matan Iehova.+
18 Ngke e tia Tawita ni kareani karea ni kabuekaki ma karea n raoi, ao e kakabwaiaia aomata n aran Iehova ae Atuaia taanga ni buaka.
19 Irarikin anne, e tibwatibwaa naba te kariki ae mronron, uaan te baam ae te tate aika bati aika buabuaaki, ao kureebe aika bati aika buabuaaki aika mwau, nakoia aomata ni kabane, nakoia tibun Iteraera aika mwaitikurikuri, ao nakoia mwaane ma aine n tatabemania nako, ao a a bane aomata n nako n okiri aia auti n tatabemania nako.
20 Ngke e a oki Tawita bwa e na kakabwaiaia kaaini batana, ao e otinako Mikara are natin Tauro+ ni kawaria, ao e taku: “Ai karineakira ngkami uean Iteraera n te bong aei n te baere e karaoia, ngke e buuta kunnikaina i mataia aine aika aia toro ana toro, n aron te aomata ae akea kanoan atuna ngkana e buuta kunnikaina i mataia aomata!”+
21 Ngaia are e taku Tawita nakoni Mikara: “I bukamaru i matan Iehova, are ngaia are e rineai ao tiaki tamam ma kaaini batana ni kabane, ao ngaia naba ae e kabirai bwa te tia kairiri i aoia ana aomata Iehova aika tibun Iteraera.+ Mangaia ae N na bukamaru i matan Iehova,
22 ao N na kananorinanoai riki nakon aei ao ni kamangorai riki i matau. Ma N na boni karineaki irouia tooro aine akana ko taekinia.”
23 Mangaia are bon akea natini Mikara+ are natin Tauro ni karokoa te bong are e mate iai.
Taiani Kabwarabwara Mai Nano
^ Nora Nanon Taeka.
^ Ke tao, “i marenaia.”
^ Ke, “Tabaota.” Nora Nanon Taeka.
^ Te taetae n Ebera aei e kaineti nakon te bwai ni katangitang ae te biti, ae mronron ao a rebwetata ngkana a kaai n oreaki timbara aika uoua aikai.
^ Nora Nanon Taeka.
^ Ke, “maraki nanon.”
^ Ae nanona, “Urubwai n Ekaanako Uta.”
^ Ebera, “kabaeaki nukana.”
^ Ke, “te karea n iraorao.” Te karea ae kaikonaka ae a kaai n amwarake ibonga, taan taromauri, ao Iehova, ni kaota te raoi i marenaia.
