2 Tamuera 8:1-18
8 Tabeua te tai imwina ao e kataenikaiia I-Biritia Tawita+ ao e tokanikai i aoia,+ ao e anaa te kaawa ae Metekama Tawita mai nanoni baia I-Biritia.
2 E kataenikaiia tibuni Moaba+ ao e kaweneia i aontano ao e bairei mwaitiia n te kora ni baire. E baireiia uarinan bwa a na kamateaki, ao e baireiia ake te rinanna bwa a na maiu.+ Ao a a riki tibuni Moaba bwa ana toro Tawita ao a ninikira aia angabwai.+
3 Ao Tawita e kataenikaia Atatetera are natin Reoba are uean Tobaa,+ i aoni kawain teuaei n nako ni manga kaoka mwaakana n tautaeka i rarikin te Karaanga ae Iuberetiti.+
4 Ao Tawita e tauia mairoun teuaei 1,700 taan toka i aoia aoti ao 20,000 tautia aika taan rianna. Ao e kamwaukuia aotin te kaa ni buaka ni kabane, ma e katikuia aotin taiani kaa ni buaka ake 100.+
5 Ngke a a roko I-Turia ake i Tamateko+ bwa a na buoka te Uea are Atatetera are uean Tobaa, ao e kamateia I-Turia aika 22,000 Tawita.+
6 Ao Tawita e kateiia tautia i Turia i Tamateko, ao a a riki I-Turia bwa ana toro Tawita ao a ninikira aia angabwai. Ao Iehova e angangan Tawita te tokanikai* n taabo ake e nako iai.+
7 Irarikin anne, e anai otanga aika mronron aika koora Tawita mairouia ana toro Atatetera, ao e uotii nako Ierutarem.+
8 Ao e anai buraati aika mwaitikurikuri te Uea are Tawita mai Beta ao Berotai, ake ana kaawa Atatetera.
9 Ao e ongo te Uea are Toi are uean Amata+ ae Tawita e a kataenikaiia kaain ana taanga ni buaka Atatetera+ ni kabane.
10 Ao Toi e kanakoa natina te mwaane ae Ioraam nakon te Uea are Tawita bwa e na titirakinna arona bwa e uara, ao e na taetae ni kakabwaiaa ibukina bwa e a tia ni buaka ao e kataenikaia Atatetera (bwa e aki toki Atatetera ni buakana Toi), ao e uotii bwaai aika karaoaki man te tirewa, te koora, ao te buraati.
11 E katabui baikai te Uea are Tawita nakon Iehova, n ikotaki ma te tirewa ao te koora ake e katabui mairouia natannaomata ni kabane ake e tokanikai i aoia,+
12 mai Turia ao Moaba,+ mairouia tibun Ammon, I-Biritia,+ tibun Amareka,+ ao mai buakoni bwaai ake a kuribwaiaki mairoun Atatetera+ are natin Reoba are uean Tobaa.
13 Ao e karekea naba atongan arana Tawita ngke e oki mani kamateaia I-Etom aika 18,000 n te Mwarua ae Taari.+
14 Ao e kateiia tautia i Etom. E kateiia tautia i Etom ni kabutaa, ao a a riki I-Etom ni kabane bwa ana toro Tawita.+ Ao Iehova e angangan Tawita te tokanikai* n taabo ake e nako iai.+
15 Ao e teimatoa Tawita n tautaeka i aon Iteraera ni kabutaa,+ ao e kairiri Tawita ma te kaetitaeka ae riai ao te raoiroi+ ibukia ana aomata ni kabane.+
16 Ao e mena Ioaba+ are natin Teruia i aon te taanga ni buaka, ao bon te tia korei mwin rongorongo Ieotiabata+ are natin Airuta.
17 Ao taian ibonga* bon Tatoka+ are natin Aituba ma Aimereka are natin Abiata, ao Teraia bon te tia koroboki.
18 Ao e mena Benaia+ are natin Ieoiata i aoia taiani Keritaite ao taiani Beretaite.+ Ao a riki bwa taani kairiri i aoia mataniwi* natin Tawita aika mwaane.
Taiani Kabwarabwara Mai Nano
^ Ke, “kakamaiu.”
^ Ke, “kakamaiu.”
^ Nora Nanon Taeka.
^ Ebera, “a riki bwa ibonga.”
