2 Uea 19:1-37
19 Ngke e ongo naba ngkekei te baei te Uea are Etekia, ao e raeuai kunnikaina ao e rabunna n te raerobwa,* ao e rinnako n ana auti Iehova.+
2 Ao e kanakoa Eriakim are te mataniwi i aoia kaaini batan te uea,* ao Tiebenaa are te tia koroboki, ao aia unimwaane ibonga,* aika rabunia n te raerobwa, nakon Itaia are te burabeti+ are natin Amoti.
3 Ao a taku nakoina: “E kangai ana taeka Etekia, ‘Bon te bongi n rawawata te bong aei, te bong ni boaaki,* ao te bong ni bwainrang, bwa a a tauraoi ataei ni bungiaki,* ma ai akea te korakora ni bung.+
4 Tao ane e na ongo Iehova ae Atuam ana taeka ni kabane te Rabetiake, are e kanakoaki iroun uean Aturia are ana toka bwa e na kakanikoa te Atua ae maiu,+ ao ane e na kaeta taekana Iehova ae Atuam ibukin taeka ake e ongo. Mangaia ae ko na tabeka am tataro+ ibukia te nikira ake a tiku ni maiu.’”
5 Mangaia are a a rinnako ana toro te Uea are Etekia nakon Itaia,+
6 ao e taku Itaia nakoia: “Kam riai ni kangai nakon ami toka, ‘E kangai ana taeka Iehova: “Tai maaku+ ibukin taeka ake ko ongo, ake taeka ake a taekin ana toro uean Aturia ni kamatauningaai iai.+
7 N na karina ngkai te iango teuana n ana iango, ao ane e na ongo te rongorongo teuana ao e na okira oin abana, ao N na kabwakaa n te kabaang n oin abana.”’”+
8 Ngke e ongo te Rabetiake bwa e a tia uean Aturia ni kitana Rakiti,+ ao e a oki nakoina ao e a kunea ngke e buakana Ribena.+
9 E a ongo ngkai te uea taekan Tireaka are Uean Itiobia, ae kangai: “Ae e a otinako ngkai bwa e na buakaniko.” Mangaia are e a manga kanakoia taan uataeka+ nakon Etekia ao e kangai:
10 “Aio te bwai ae kam riai n taekinna nakon Etekia are Uean Iuta, ‘Tai kariaia Atuam ae ko onimakinna bwa e na mwamwanaiko ngkai e kangai: “E na aki kanakoaki Ierutarem nako nanoni bain uean Aturia.”+
11 Noria! Ko a tia n ongo baike a karaoi uean Aturia nakon aaba ni kabane, n aroia ni kamaunai.+ N am iango ko na boni kamaiuaki?
12 Te koaua bwa a kamaiuaki irouia atuaia natannaomata ake a kamaunaaki irouia au bakatibu? E a nga Kotan, Aran,+ Retieba, ao kaain Eten ake i Terata?
13 E nga uean Amata, uean Arebata, ao ueani kaawan nako Tebarewaim, ao uean Ena, ao uean Iwa?’”+
14 E anai reeta Etekia mai nanoni baia taan uataeka ao e wareki. Imwina ao e a waerake Etekia nakon ana auti Iehova, ao e taakini baikai* i matan Iehova.+
15 Ao e a tataro Etekia+ nakon Iehova ao e taku: “Iehova ae Atuan Iteraera, ae ko tekateka n te kaintokanuea i etaia* kerubim,*+ bon tii ngkoe te Atua ae koaua ae tautaeka i aoia tautaeka n uea ni kabane aika n te aonnaba.+ Ko karaoa karawa ma te aonnaba.
16 Katanimaia taningam ngkoe ae Iehova ao ongora!+ Kaurei matam ngkoe ae Iehova+ ao noria! Ongora n taeka ake e kanakoi Tennakeriba ni kakanikoa iai te Atua ae maiu.
17 Bon te koaua Iehova, ae a a tia uean Aturia ni kamaunaia natannaomata ao abaia.+
18 Ao a karenakoi atuaia i nanon te ai, ibukina bwa bon tiaki atua+ ma bon aia mwakuri baia aomata,+ ae te kai ma te atibu. Anne bukina ae a kona n urui iai.
19 Ma ko bia kamaiuira ngkai taiaoka Iehova ae Atuara mai nanoni baina, bwa e aonga n ataaki irouia tautaeka n uea ni kabane aika n te aonnaba ae bon tii ngkoe te Atua, ngkoe ae Iehova.”+
20 Ao e kanakoa te rongorongo aei Itaia are natin Amoti nakon Etekia ni kangai: “E kangai ana taeka Iehova ae Atuan Iteraera, ‘I ongo am tataro+ nakoiu ni kaineti ma Tennakeriba are Uean Aturia.+
21 Aio ana taeka Iehova are taekinna n ekaanako teuanne:
“E ribaiko natin Tion te aine ae tuai ni boo ma te mwaane ao e kakanikoko.
E ioioa atuna nakoim natin Ierutarem te aine.
22 Antai ae ko kakanikoa ao n taetae ni kamatauningaa?+
Ao antai ae ko takaruaia+Ao n euti matam akana kainikatonga akanne nakoina?
Bon nakon Teuare Tabu i Iteraera!+
23 Ko a tia ni kakanikoa Iehova+ rinanoia am tia uataeka+ ao ko kangai:
‘N au kaa ni buaka aika mwaitikurikuriAo N na ararakei maunga aika rietata,Ake mwakoron Rebanon ake taiani kabanea n raroanako.
N na korei ni kabwakai tiira aika rietata ake iai, ao kaai aika mwaiango aika rangi n raoiroi.
N na rin n taabo ni motirawa ake iai ake taiani kabanea n raroanako, ake buakonikaina aika tamaroa.
24 N na keni mwanibwa ao ni moi n raan man te aba ae ianena,N na kabwatakatakai karaangan* Aikubita n nanoni waeu.’
25 Ko tuai n ongo? E a kamani motikaki* mangkoangkoa.+
I a kamani katauraoia* mani boong ake a a tia n nako.+
N nang karokoa ngkai.+
Ane ko na onei kaawa aika nonoaki nakon taabo aika kamaroaa aika urubekebeke.+
26 Ane a na akea korakoraia kaaia.
A na maakunrang ao ni kamaamaeaki.
A na riki bwa kaanga aroka n te tawaana ao uteute aika kiriin,+Kaanga uteute n taian taubuki aika bue n te angimainiku.
27 Ma I ataa raoi te tai ae ko tekateka iai, te tai ae ko otinako iai, te tai ae ko rin iai,+Ao te tai ae korakora iai unim irou,+
28 Ibukina bwa e a roko i taningau+ unim ae korakora irou+ ao bekoraram.
Mangaia ae N na kaaki au matau i bwairim ao au bwe+ i marenani wim,Ao N na kairiko ni kaokiko n te kawai are ko roko mai iai.”+
29 “‘Ao aei te kanikina ibukim:* Ane kam na amwarake n te ririki aei n ane e rikirake i bon irouna,* ao n te kauoua n ririki kam na kana te uita* ane rikirake mai iai,+ ma n te katenua n ririki ao kam na uniki koraa ma n tai, ao kam na ununiki n ami nne ni kureebe ma ni kang uaaia.+
30 A na karibui wakaaia rikaaki ao ni karikii uaa ni waerake te koraki ake tibun Iuta ake a reke birinakoia, ake te koraki ake a a tiku bwa nikira.+
31 Bwa e na otinako te nikira mai Ierutarem ao naake a reke maiuia man te Maunga ae Tion. E na karaoa aei ingaingan nanon Iehova ae Atuaia taanga ni buaka.*+
32 “‘Mangaia ae e kangai ana taeka Iehova ni kaineti ma uean Aturia:+
“E na aki rin n te kaawa aei+Ke ni katebea kanoan te kainikatebe nako iaiKe ni kaitaraa ma te otangaKe ni katea te nono ni buaka n ekianako.+
33 E na oki n te kawai are e roko mai iai.
E na aki rin n te kaawa aei,” bon ana taeka Iehova.
34 “N na kamanoa te kaawa aei+ ao ni kamaiua i bon ibukiu,+Ao ibukin au toro are Tawita.”’”+
35 Ni bon te tairiki naba anne ao e a otinako ana anera Iehova ni kamateia mwaane aika 185,000 n aia kaembwa I-Aturia.+ Ngke a a utimwaaka aomata n te moaningabong, ao a a noriia maate ni kabane.+
36 Mangaia are e a nako Tennakeriba are Uean Aturia ao e a okira Ninewe+ ma n tiku ikekei.+
37 Ao ngke e bobaraaki teuaei n ana auti* Nitiroka are atuana, ao a a kamatea naba n te kabaang+ oin natina ake Aterammereka ma Tiaretera, ao imwina a birinako nakon te aba ae Ararata.+ Ao e a riki natina are Etaraaton+ bwa te uea n onea mwina.
Taiani Kabwarabwara Mai Nano
^ Nora Nanon Taeka.
^ Nora Nanon Taeka.
^ Ke, “baareti.”
^ Ke, “ni kamatauninga.”
^ Ebera, “a a roko i matan te tabo n otinako man te biroto.”
^ Ebera, “te baei.”
^ Ke tao, “i marenaia.”
^ Nora Nanon Taeka.
^ Ke, “kawain te ran aika tiki man te Naire i.”
^ Ebera, “karaoaki.”
^ Ke, “karaoia.”
^ Ke, e kona n nanona “te baare.”
^ Ke, “ae rikirake mani koraa aika bwaka i aontano.”
^ Ae taekan Etekia.
^ Ke, “Tabaota.” Nora Nanon Taeka.
^ Ke, “tembora.”