Amota 2:1-16
2 “E kangai ana taeka Iehova,‘“Ibukin ana karitei* Moaba aika tenua,+ ao ibukin aua, N na aki rairaanako karekeani kaina,Ibukina bwa e kabueki riin uean Etom bwa te raim.
2 Mangaia ae N na kanakoa te ai nako nanoni Moaba, ao e na kabueki tauani Keriota+ aika nonoaki.
A na mate I-Moaba i buakon te kiriwe,Ma te takakaa ni buaka, ma tangin te buu ae te koro.+
3 N na kamwawaa te tia tautaeka* mai nanon neienne,Ao ni kamateia tokan neienne ni kabane n ikotaki naba ma teuanne,”+ bon ana taeka Iehova.’
4 E kangai ana taeka Iehova,‘Ibukin ana karitei Iuta aika tenua,+ ao ibukin aua, N na aki rairaanako karekeani kaina,Ibukina bwa a kaaki taekan ana tua* Iehova,Ao ibukina bwa a aki kawakin ana kaetieti,+Ma a rairakinako ni keewe ake a kakairi naba iai aia bakatibu.+
5 Mangaia ae N na kanakoa te ai nako nanon Iuta,Ao e na kabueki tauan Ierutarem aika nonoaki.’+
6 E kangai ana taeka Iehova,‘Ibukin ana karitei Iteraera aika tenua,+ ao ibukin aua, N na aki rairaanako karekeani kaina,Ibukina bwa a kaboonakoia akana raoiroi n te tirewa,Ao akana maiu ni kainnano ni kaau aika uoua.+
7 A toubekai atuia aomata aika mangori nako aontano,+Ao a tuki kawaia akana nimamannei.+
A wene n taanga ma te aine ae tii temanna, te mwaane ao tamana,Ni kamatauningaa arau ae tabu.
8 A aroriia i rarikini baonikarea nako+ i aoni kunnikai ake a taui bwa bwaai ni kaboomwi ibukin te bwai ae tangoaki.+
Ao te wain are a moi iai n aia auti* atuaia e reke mairouia te koraki ake a katuuaaeia.’
9 ‘Ma boni ngai ae I kamatea te Amoraite imwaia+Ae abwabwaki n ai aroni kaai aika tiira, ao ni korakora n ai aron aroka aika oke,Ao I kamauna uaana i eta ao wakaana i nano.+
10 I kairingkami ni kaotinakoingkami man te aba are Aikubita,+Ao I kanakonakoingkami rinanon te rereua i nanon 40 te ririki,+Bwa kam na abana aban te Amoraite.
11 I kateirakeia tabeman mai buakoia natimi mwaane bwa burabeti,+Ao tabeman mai buakoia ami rorobuaka n ataei bwa Natiraite.+
Tiaki ngaia anne, ngkami aika tibun Iteraera?’ bon ana taeka Iehova.
12 ‘Ma kam teimatoa n angania Natiraite te wain bwa nimaia,+Ao kam tua ae kangai nakoia burabeti: “Kam na tai taetae ni burabeti.”+
13 Mangaia ae N na kamanatuaingkami n ami tabo,N aron te kaa ae on ni uita* aika koreaki ae kamanatuaa te bwai are i aana.
14 Akea te tabo ae e na birinako nako iai ane e birimwaaka,+Ao e na aki kateimatoa mwaakana ane e korakora,Ao akea te tia buaka ae e na birinako n rawea maiuna.*
15 E na aki teimatoa n tei ni nnena te tia katebe,Ao e na aki birinako ane e birimwaaka waena,Ao e na aki birinako n rawea maiuna* te tia toka i aon te aoti.
16 E na birinako naba n aki karabaanna n te bong anne+Ane te kabanea n ninikoria* i buakoia taani buaka,’ bon ana taeka Iehova.”
Taiani Kabwarabwara Mai Nano
^ Ke, “ana bure.”
^ Ebera, “te tia motikitaeka.”
^ Ke, “kaetieti.”
^ Ke, “tembora.”
^ Ke, e kona n nanona “te baare.”
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ke, “te koraki ake a korakora nanoia.”
