Amota 3:1-15
3 “Tibun Iteraera, ongora n te taeka aei ae e taekinna Iehova ni kaineti ma ngkami, ni kaineti ma te utu ae bwanin are I kairiia ni kaotinakoia man te aba are Aikubita, ae kangai:
2 ‘Bon tii ngkami aika I ataingkami mai buakoia utu ni kabane n te aonnaba aei.+
Anne bukina ae N nang kaetii iai taekami ibukin ami bure ni kabane.+
3 A na kaai n nakonako aomata aika uoman ngkana a tuai moa ni boraraoi bwa a na kaitiboo?
4 E na bekorara te raian n te buakonikai ngkana akea konana?
E na kakarongoa te raian ae ataei mani bwangana ngkana e tuai n reke konana?
5 E na bwaka te mannikiba nako nanon te bwai ni kamwane i aontano ngkana akea te kai ni kabwaru ibukina?*
E na teberake te bwai ni kamwane mai aontano ngkana e tuai n reke konana?
6 Ngkana e katangaki te buu n te kaawa, tiaki a na ruru aomata?
Ngkana e riki te kabuanibwai n te kaawa, tiaki boni mairoun Iehova?
7 Bwa e na aki karaoa te bwai teuana te Uea ae Moan te Rietata ae Iehova,Ngkana e aki moa kaota te baere raba are irouna* nakoia ana toro aika burabeti.+
8 E a tia ni bekorara te raian!+ Antai ae e na aki maaku?
E a tia n taetae te Uea ae Moan te Rietata ae Iehova! Antai ae e na aki taetae ni burabeti?’+
9 ‘Katanoataa i aon tauan Atoto aika nonoaki,Ao i aon taua aika nonoaki n te aba ae Aikubita.
Kangai: “Kam na ikotaki ni kabane n ekinako maungan Tamaria,+Ao nora te kiriwe i nanon neieiMa te babakanikawai i nanona.+
10 Bwa a aki ataa aroni karaoan ae eti,” bon ana taeka Iehova,“Te koraki ake a kaikoa te iowawa ma kamaunaan te aba n aia taua aika nonoaki.”’
11 Mangaia ae e kangai ana taeka te Uea ae Moan te Rietata ae Iehova,‘E na otabwaninia te aba aei te tia kakaaitara,+E na anaa korakoram mairoum,Ao a na kuribwaiaki am taua aika nonoaki.’+
12 E kangai ana taeka Iehova,‘N aron te tia kawakintiibu ae buritii raanga aika uaai ke te mwakoro n taninga ni kanakoi mai win te raian,Ao anne naba aroia tibun Iteraera ni buritakinako,Ake te koraki aika tekateka ngkai i Tamaria i aoni nne ni wene aika tamaroa, ao i aoni kaintekateka aika raraoi.’+
13 ‘Ongora ao kam na anga te kauring nakoia* tibun Iakoba,’ bon ana taeka te Uea ae Moan te Rietata ae Iehova, ae Atuaia taanga ni buaka.
14 ‘Bwa n te bong are I kaeta iai taekan ana karitei* Iteraera n ekianako,+Ao N na urui naba baonikareani Betaera.+
N na koreinako kooro ake ni baonikarea nako bwa a aonga ni bwaka i aontano.+
15 N na orea te auti ibukin te kamwaitoro ni kabwakaa n ikotaki ma te auti ibukin te kabuebue.’
‘A na maunanako auti aika aiwere,*+Ao a na roko n tokia auti aika kakannato,’*+ bon ana taeka Iehova.”
Taiani Kabwarabwara Mai Nano
^ Ke tao, “ngkana akea te abea iai?”
^ Ke, “ana bwai ae raba.”
^ Ke, “kaotioti ni kaaitaraia.”
^ Ke, “ana bure.”
^ Nora Nanon Taeka.
^ Ke tao, “mwaiti.”
