Amota 6:1-14
6 “Ke a reke kaia naake a onimakinia i bon irouia* ake i Tion,Ake te koraki ake a namakina te mweraoi ni maungan Tamaria,+Ake mwaane ake a kakannato man te natannaomata are te kabanea ni kakannato i buakoia natannaomata,Ake te koraki ake a roko tibun Iteraera irouia!
2 Mwananga nako Karene ao noria.
Naako mai ikanne nako Amata ae Kakannato,+Ao ruuo rikaaki nako Kate are aia kaawa I-Biritia.
A raoiroi riki nakon tautaeka* n uea aikai,Ke e bubura riki aia aono nakoimi?
3 Kam a kanakoa bongin te rawawata man ami iango,+Ao ni karina te iowawa i buakomi?+
4 A wene i aoni nne ni wene aika aiwere*+ ao a aroriia i aoni kaintekateka,+Ni kang taian tiibu mwaane man te nanai ao kaao ataei* aika kamarikaaki.+
5 A otei kuuna n ira tangin te abi,*+Ao a karaoi bwaai ni katangitang n aron Tawita.+
6 A moi wain ni mwangko aika bubura,+Ao a kabiriia n taiani bwaa aika taiani kabanea n tamaroa.
Ma a aki tabeakina* karawawataan Ioteba.+
7 Mangaia ae a na moan nako bwa taenikai mai buakoia nako te koraki n taenikai,+Ao e nang roko n tokina aia bukamaru naake a aroriia ae akea te taubaang iai.
8 ‘E taetae n tuea i bon irouna te Uea ae Moan te Rietata ae Iehova,’+ bon ana taeka Iehova ae Atuaia taanga ni buaka,‘“I riribaa kainikatongan Iakoba,+I ribai ana taua aika nonoaki,+Ao N na anga te kaawa ma bwaai nako ake iai.+
9 “‘“Ao ngkana a tiku mwaane aika tengaun n te auti ae tii teuana, a na boni mate naba.
10 E na roko ana koraki* temanna i buakoia n uotiia ni kaotinakoia ao ni kabuekiia, temanna imwin temanna. E na kaotinakoi riia man te auti, ao e na kangai nakon ane e mena n taian ruu ake i nanon te auti, ‘Iai riki raom?’ ao e na kangai teuarei, ‘Akea!’ Ao ngaia e na kangai, ‘Teimatoa ni kainabwabu! Bwa tiaki aei tain taekinan aran Iehova.’”
11 Bwa ngkana e tua Iehova,+Ao a na riki auti aika kakannato bwa mmwammwa n atibu,Ao auti aika uarereke bwa maange imwin te uruaki.+
12 A bibiribiri aoti i aon te bwaa,Ke iai ae e na kakamarautano ikanne ma kaao?
Bwa kam bita te kaetitaeka ae riai nakon te aroka ae boitin,Ao uaan te raoiroi nakon te kai ae mao.*+
13 Kam kimwareirei ibukin te bwai ae akea manenana,Ao kam kangai, “Tiaki ti korakora* ni bon oini korakorara?”+
14 Mangaia ae ngkami aika tibun Iteraera, N na kaira te natannaomata teuana ae e na ekingkami nako,’+ bon ana taeka Iehova ae Atuaia taanga ni buaka,‘Ao a na karawawataingkami mai Reboamata*+ rikaaki nakoni Mwaruan te Arabaa.’”*
Taiani Kabwarabwara Mai Nano
^ Ke, “aki muti.”
^ N taraana e kaineti nakon tautaeka n uea aika Iuta ao Iteraera.
^ Nora Nanon Taeka.
^ Ke, “kaao mwaane aika ataei.”
^ Ke, “te bwai ni katangitang ae iai karaina.”
^ Ebera, “a aki aoraki ni.”
^ Ebera, “tarin tamana.”
^ Ke, “rawawata.”
^ Ebera, “ti anai kooro bon ibukira.”
^ Ke, “te kawai n rin i Amata.”
^ Ke, “te rereua ae aoraoi.”
