Amota 7:1-17
7 Aio te bwai ae e kaotia nakoiu te Uea ae Moan te Rietata ae Iehova n te miitara: Noria! E kanakoa te nna n rokati ngke e a moanna n rikirake te uaa are te kabanea.* Aei bon te uaa are imwina riki, imwini korean ana uteute te uea.
2 Ngke e a tia te nna n rokati ni kang aroka ake n te aba, ao I taku: “I butiiko ngkoe ae te Uea ae Moan te Rietata ae Iehova bwa ko na kabwarai buure!+ e na kangaa Iakoba ni maiu?* Bwa e a mamaara!”+
3 Mangaia are e a manga iangoa* te baei Iehova.+ E taku Iehova: “E na bon aki riki.”
4 Ao te Uea ae Moan te Rietata ae Iehova e kaota nakoiu te miitara aei: Noria! E wewete te Uea ae Moan te Rietata ae Iehova ibukin te katuuaa n te ai. E kabueka te ran ae abwabwaki ma n nano, ao e kabueka mwakoron te aba anne.
5 Ao I taku: “I butiiko ngkoe ae te Uea ae Moan te Rietata ae Iehova bwa ko na tautaua moa te baei.+ E na kangaa Iakoba ni maiu?* Bwa e a mamaara!”+
6 Mangaia are e a manga iangoa* te baei Iehova.+ E taku te Uea ae Moan te Rietata ae Iehova: “E na bon aki riki naba aei.”
7 Ao e kaota nakoiu te miitara aei: Noria! E tei Iehova i aon te oo teuana ae karaoaki ma te kora ni kaeti ae tinetine,* ao iai te kora ni kaeti i nanoni baina.
8 Ao e taku Iehova nakoiu: “Tera ae ko noria Amota?” Ngaia are I taku: “Te kora ni kaeti.” E taku ngkanne Iehova: “Ae I a kaaki te kora ni kaeti i buakoia au aomata aika tibun Iteraera. N nang aki manga kabwarai aia bure.+
9 A nang kamaroaeaki aia tabo aika rietata tibun Itaaka,+ ao a na uruakaki aia tabo aika tabu+ i Iteraera, ao N na roko n ekiianako ana utu Ieroboam n te kabaang.”+
10 E kanakoa te rongorongo aei Amatia are te ibonga* i Betaera+ nakon te Uea ae Ieroboam+ ae uean Iteraera ni kangai: “E karitei Amota n ekikonako i buakoia tibun Iteraera.+ A aikoa kona kaain te aba n taon nanoia n ana taeka ni kabane+ Amota.
11 Bwa e kangai Amota, ‘E na mate Ieroboam n te kabaang, ao a na bon nako tibun Iteraera bwa taenikai mai abaia.’”+
12 E taku ngkanne Amatia nakon Amota: “Ngkoe ae te tia nori miitara, naako, birinako nakon te aba ae Iuta, karekea am kariki* ikekei, ao ko kona n taetae ni burabeti ikekei.+
13 Ma ko nang aki manga taetae ni burabeti i Betaera,+ bwa bon ana tabo ae tabu te uea+ ao ana auti te tautaeka n uea.”
14 Ao e kaeka Amota nakon Amatia ni kangai: “Bon tiaki te burabeti ngai ke natin te burabeti, ma bon te tia kawakinia maan+ ao I tararuai kaai aika biiku.*
15 Ma e kairainako Iehova man irirakin te nanai ao e taku Iehova nakoiu, ‘Naako taetae ni burabeti nakoia au aomata ake tibun Iteraera.’+
16 Mangaia ae ongora ngkai ana taeka Iehova aei: ‘Ko kangai, “Tai taetae ni burabeti n ekaanako Iteraera,+ ao tai uarongorongo+ n ekiianako tibun Itaaka.”
17 Mangaia ae e kangai ana taeka Iehova: “E na riki buum bwa te aine ae kakabooaki n te kaawa, ao a na bwaka natim mwaane ma natim aine n te kabaang. E na tibwaaki nako abam n te kora ni baire, ao ngkoe ko na mate n te aba ae kamwara, ao a na bon nako tibun Iteraera bwa taenikai mai abaia.”’”+
Taiani Kabwarabwara Mai Nano
^ Anne n Tianuare ao ni Beberuare.
^ Ebera, “n teirake?”
^ Ke, “uringaaba n.”
^ Ebera, “n teirake?”
^ Ke, “uringaaba n.”
^ Te bwai ni mwakuri aei bon te bwai ae tinetine n te kao teuana, ao e kabonganaaki ibukini kaetan raoi te bwai ae tei n etirake.
^ Nora Nanon Taeka.
^ Ebera, “kang kariki.”
^ Ke, “te tia ewari biikun te tukomorea.”
