Ana Anene Toromon 7:1-13
7 “Ai tamaroara waem i nanon am kau,Ngkoe ae te nati te aine ae raoiroi arona!
Teiteini boton rangam kaanga ai aroni bwaai ni katamaroaAe ana mwakuri bain te tia karaobwai.
2 Butom bon te boora ae mronron.
E bia aki tare n te wain ae renganaki.
Birotom bon te bwariko ni uita,Ae otabwaniniaki n taiani kiebu.
3 Mammam akana uoua kaanga ai aron taian ria aika rangi n ataei,Aika bunin te katere* aika bwebwee.+
4 Roroam+ kaanga ai aron te taua ae te aiwere.*+
Matam+ kaanga ai aron neei i Etiibon,+I rarikini mataroan ooni Betarabim.
Bwairim kaanga ai aron te taua are i Rebanon,Are kaitaraa Tamateko.
5 E bauniko atum n ai aroni Karemera,+Ao iram* ae buabuataki+ kaanga ai aron te karai ae beboo ae buraen te tiibu.+
E anaaki nanon* te uea n iram ae mwarairai ae tinetine.
6 Ai baaraoira ngkoe ao ai kakatekera ngkoeAe te aine ae ko tangiraki, i aoni bwaai nako aika rangi ni kakimwareirei!
7 Teiteim kaanga ai aron te aroka ae te baam,Ao mammam kaanga ai aron amwi n tate.+
8 I taku, ‘N na tamwarakea te aroka ae te baam,Bwa N na anai amwina.’
Ke a riki mammam bwa kaanga amwi ni kureebe,Ao ni boiarara ikeikem n ai aron taian aboro,
9 Ao wim* bwa kaanga te wain ae te kabanea n raoiroi.”
“E bia marannako n ruo rikaaki ibukin raou ae tangiraki,Ao n raanganako ni karaurau i aon riaia akana matu.
10 Boni ngai ana bwai teuare tangiraki irou,+Ao e bon tangirai.
11 Nakomai ngkoe ae ko tangiraki irou,Ti a nakon taian tawaana,
Ti na maeka i buakon aroka aika enna.+
12 Ti a kautimwaakaira bwa ti na nakon taiani nne ni kureebeN noria ngkana e a rikirake* te kai ae te kureebe,Ngkana a a raure ueeia,+Ngkana a a uee bamkuranete.*+
N na kaotiota ikekei tangiram irou.+
13 A kakiakiai boiararaia taiani manrureke,*+Ao a mena uaanikai aika rangi n raraoi i rarikin ara mataroa.+
I kawakin ake a boou ibukim ao ake a a maan naba,Ngkoe ae raou ae tangiraki.
Taiani Kabwarabwara Mai Nano
^ Nora Nanon Taeka, “Maan.”
^ Nora Nanon Taeka.
^ Ke, “kabaeaki.”
^ Ebera, “atum.”
^ Ebera, “ngangarakem.”
^ Ke, “bwebwe.”
^ Nora Nanon Taeka.
^ Te aroka ae aekakin te buteeta ae iai uaana.
