Biremon 1:1-25
1 Ngai ae Bauro ae I karabuutinaki+ ibukini Kristo Iesu, ma Timoteo+ ae tarira. Nakoni Biremon ae tangiraki iroura, ae raora ni mwakuri,
2 ao nakon Abebia ae mwaanera, ao Arekibo+ ae raora n tautia ibukini Kristo, ao kaain te ekaretia ane n am auti:+
3 Ke e mena iroumi te akoi ae rianako ma te rau mairoun te Atua ae Tamara, ao te Uea ae Iesu Kristo.
4 I aki toki ni kaitaua Atuau ngkana I mwanewea taekam n au tataro,+
5 ngkai I teimatoa n ongongo taekan am onimaki ao am tangira ibukin* te Uea ae Iesu, ao ibukia* te koraki aika itiaki* ni kabane.
6 I tataro bwa e na kairiko te onimaki ane iroum ma raom n onimaki bwa ko na atai kakabwaia ni kabane ake ti karekei rinanoni Kristo.
7 Bwa I rangi ni kimwareirei tariu ao ni kabebeteaki n am tangira, ibukina bwa e kaungaaki nanoia te koraki aika itiaki* iroum.
8 Aei bukina ae I aki tua iai nakoim bwa ko na karaoa ae riai, e ngae ngke iai inaomatau ni karaoa anne ngkai I katiteuanaaki ma Kristo,
9 ma I kaungako n te tangira, ao n arou aei, ngai ae Bauro ae I a kara, eng, ae I karabuutinaki ngkai ibukini Kristo Iesu.
10 I kaungako ibukin natiu ae Onetimo,+ are I a tia n riki bwa kaanga tamana+ n au tai ni kabureaki.*
11 Akea ngkoa bongana iroum, ma e a rangi ni bongana ngkai iroum ao irou.
12 I a kaoka ngkai teuaei nakoim, eng, are boni ngaia buroou.*
13 I kan taua irou ikai bwa e na onea mwim ni buobuokai n au tai ni kabureaki ibukin te rongorongo ae raoiroi.+
14 Ma I aki kani karaoa te bwai teuana n akea am kariaia, bwa e aonga n aki tebonaki am akoi nakoiu ma e na bon nako mai nanom.+
15 Bwa tao e kitaniko teuaei ibukin tabeua te tai,* bwa e aonga ni manga okiriko ao n tiku iroum n aki toki,
16 n arona ae ai tiaki te toro+ ma e a kakawaki riki nakon te toro, bwa ai te tari ae tangiraki,+ ai moarara riki irou, ao ai batira riki ngkanne reitakimi i marenami ngkai am toro ngaia ao te tari naba ae tangiraki ae beku ibukin te Uea.
17 Mangaia ae ngkana ko taku bwa raoraom ngai,* ao butimwaea raoi teuaei ma te akoi n arom ni butimwaeai.
18 Ma ngkana e a tia ni karaoa ae kairua nakoim ke e bae iroum n te bwai teuana, ao taua anne bwa baeu.
19 I korea aei n oini baiu ngai ae Bauro: N na boni kabwaraa nakoim—ao tiaki n ae I tuangko bwa ko bae naba irou ibukini maium.
20 Eng tariu, kioina ngkai taan rimwin te Uea ngaira, I bia karekea kabwaiau mairoum ni butiiko bwa ko na kabebetea nanou ngkai te tia rimwini Kristo ngai.
21 I koroboki nakoim bwa I onimakiniko bwa ko na bon ira nanou, ao I ataiko bwa ko na boni karaoa ae raka riki nakon ae I taekinna.
22 Ma irarikin anne, katauraoa naba au tabo ni maeka, bwa I kantaningaia bwa N na kaokaki nakoimi*+ man ami kakorakora n tataro ibukiu, bwa I aonga ni beku ibukimi.
23 E kamauriko Ebabera+ ae raou n taenikai ibukini Kristo Iesu,
24 ao Mareko naba, Arititareko,+ Tema,+ ao Ruka,+ aika raou ni mwakuri.
25 E na mena iroumi ana akoi ae rianako te Uea ae Iesu Kristo, ibukin raoiroin nanomi ae kam kaotiotia.
Taiani Kabwarabwara Mai Nano
^ Ke, “nakon.”
^ Ke, “nakoia.”
^ Ke, “tabu.”
^ Ke, “tabu.”
^ Kuriiti, “ni kabaeaki.”
^ Ke, “ae I tatangiria.”
^ Kuriiti, “teuana te aoa.”
^ Kuriiti, “te tia ibuokanibwai ma ngai.”
^ Ke, “kabwaraaki nakoimi.”