Etekiera 2:1-10
2 E taku ngkanne nakoiu: “Natin te aomata,* teirake i aoni waem bwa N na taetae ma ngkoe.”+
2 Ngke e taetae nakoiu teuaei, ao I kaonaki n te taamnei ao e kateirakeai i aoni waeu+ n te aro are I a kona n ongora iroun Teuare taetae nakoiu.
3 Ao e reitia ni kangai nakoiu: “Natin te aomata, I a kanakoko nakoia tibun Iteraera,+ nakoia natannaomata aika taani karitei ake a karitei nakoiu.+ A bure nakoiu ma aia bakatibu ni karokoa te bong naba aei.+
4 I a kanakoko nakoia naati aika rarawa* ao aika matoatoa nanoia,+ ao ko riai ni kangai nakoia, ‘E kangai ana taeka te Uea ae Moan te Rietata ae Iehova.’
5 Ao ngaiia ngkana a ongo ke a rawa n ongo—bwa bon te koraki aika karitei ngaiia+—ma a na bon ataia bwa e a mena te burabeti i buakoia.+
6 “Ma ngkoe ae natin te aomata, tai maakuia+ ao tai maakui aia taeka, e ngae ngke ko a otabwaniniaki ni kaai aika kateketeke ma aroka aika kateketeke*+ ao ni maeka i buakoia tikaobian. Tai maakui aia taeka+ ao tai maakunrang n ubuia,+ bwa bon te koraki aika karitei ngaiia.
7 Ko riai n taekin au taeka nakoia, e ngae ngke a ongo ke a aki, bwa bon aomata aika karitei ngaiia.+
8 “Ma ngkoe ae natin te aomata, ongora n te bwai ae I a taekinna nakoim. Tai karitei n aroia te koraki aika karitei aikai. Kaurea wim ao kana te bwai ae I a anganiko.”+
9 Ngke I mataku, ao I nora te bai ae aroraki nakoiu,+ ao I nora i nanona te nira ni boki ae korobokiaki.+
10 Ngke e taakinna i matau, ao e korobokiaki nanona ma tinanikuna.+ A koreaki i aona baika kananokawaki,* baika kauekea te tanginiwenei ao te bwaebwaeti.+
Taiani Kabwarabwara Mai Nano
^ “Natin te aomata”, aei te moantai ni kaoti te taeka aei i buakon okiokina ae 93 mwaitina n Etekiera.
^ Ke, “matoatoa ubuia.”
^ Ke tao, “e ngae ngke a imanono aomata ao a riki n ai aroni bwaai aika kateketeke nakoim.”
^ Ke, “anene n tanginiwenei.”
