Etekiera 30:1-26
30 Ao e a manga roko naba ana taeka Iehova irou, ae kangai:
2 “Natin te aomata, taetae ni burabeti ao kangai, ‘E kangai ana taeka te Uea ae Moan te Rietata ae Iehova:
“Tanginiwenei, ‘Akea bwa e a roko te bong!’
3 Bwa e a kaan te bong, eng, e a kaan ana bong Iehova.+
Bon te bong ae uananginang,+ ae aia tai natannaomata ae baireaki.+
4 E na ekaanako Aikubita te kabaang, ao e na taonaanako Itiobia te nakonnano ngkana a a bwaka aika kamateaki i aon Aikubita,A anaaki kaubwaina, ao a a urubekebekeaki aana.+
5 A na bane ni bwaka n te kabaangItiobia,+ Buta,+ Rata, ao botannaomata nako aika kakaokoro,*Ao Kuba n ikotaki ma naati mwaane ake man te aba ake a kabaeaki n te berita.”’*
6 E kangai ana taeka Iehova:
‘A na bwaka naba taani boutokaa Aikubita,Ao e na kamangoraki mwaakana ae kainikatonga iai.’+
“‘A na bwaka n te kabaang n te aba, ni moa mai Miketora+ ni karokoa Tewene,’+ bon ana taeka te Uea ae Moan te Rietata ae Iehova.
7 ‘A na riki bwa taiani kabanea ni kamaroaa i buakon aaba, ao a na riki kaawana bwa taiani kabanea n urubekebeke ni kaawa.+
8 Ao a na ataia bwa bon Iehova ngai ngkana I kauraa te ai i Aikubita, ao a bane ni kamanatuaaki akana iraorao ma ngaia.
9 N te bong anne, N na kanakoia taan uataeka n taiani kaibuke ni karurubenebenea Itiobia are e rangi n onimakinna i bon irouna, e na taonianako te nakonnano n te bong are e a motikaki iai taekan Aikubita, bwa e na bon roko.’
10 “E kangai ana taeka te Uea ae Moan te Rietata ae Iehova: ‘N na karokoia n tokia ana koraki aika mwaitikurikuri Aikubita, ni bain Ueani Baburon ae Nebukaneta.*+
11 E na kairaki ma ana taanga ni buaka, aika karotoia natannaomata aika akea aia nanoanga+ bwa a na kamauna te aba. A na buutii aia kabaang n ekaanako Aikubita, ao ni kaona te aba irouia aomata aika kamateaki.+
12 N na bitii kawain ranin te Naire+ nakon aontano ae mwauteretere, ao N na anga* te aba nako nanoni baia mwaane aika buakaka. N na kamaroaea te aba ma bwaina nako ni baia ianena.+ I a tia n taetae ngai ae Iehova.’
13 “E kangai ana taeka te Uea ae Moan te Rietata ae Iehova: ‘N na kamaunai naba taiani bouannanti aika kamwara,* ao ni karokoia n tokia atuan Nobi* aika akea manenaia.+ E nang akea te natinuea* te mwaane man te aba ae Aikubita, ao N na kaaki te maaku n te aba ae Aikubita.+
14 N na kamaroaea Bateroti+ ao N na kauraa te ai i Toan, ao N na karokoa te motikitaeka i aon No.*+
15 N na kabwaroa uniu ae korakora i aon Tin ae ana nono Aikubita, ao ni kamaunaia botannaomatan No.
16 N na kauraa te ai i Aikubita, ao e na taonaki Tin n te maakunrang, ao e na urubekebeke nanon No, ao e na ekakinako Nobi* i aan ootan te ngaina!
17 A na bwaka n te kabaang rorobuaka n ataei mai On* ao Bibeteta, ao a na kataenikaiaki taiani kaawa.
18 E na rikirake n roo te ngaina i Taabaneti ngkana I otei amon Aikubita ikekei.+ E na roko n tokina mwaakan neiei are kainikatonga iai,+ e na rabunaki n naang, ao a na kataenikaiaki kaawana.+
19 N na karokoa te motikitaeka i aon Aikubita, ao a na ataia bwa bon Iehova ngai.’”
20 Ao n te ka-11 n ririki, n te moan namwakaina ae itiua iai bongin te namwakaina, ao e roko ana taeka Iehova irou, ae kangai:
21 “Natin te aomata, I otea anganibaini Barao are uean Aikubita, e na aki kabaeaki bwa e aonga ni mao ke ni bautaki n rabunaki bwa e aonga n tau korakorana n tabeka te kabaang.”
22 “Mangaia ae e kangai ana taeka te Uea ae Moan te Rietata ae Iehova: ‘Akea bwa I a ekaanako Barao are uean Aikubita,+ ao N na otei anganibaina, are e korakora ma are e mwaoto,+ ao N na kabwakaa te kabaang mai baina.+
23 Ao N na kamaenakoia I-Aikubita nako buakoia natannaomata ao ni kamaeinikunia nakon aaba.+
24 N na kakorakorai anganibain* ueani Baburon,+ ao N na kaaki au kabaang i nanoni baina,+ ao N na otei anganibaini Barao ao e na ngirangira n takarua i matana* n ai aron te aomata ae e a kaani mate.
25 N na kakorakorai anganibain ueani Baburon, ma a na nimamate anganibaini Barao, ao a na ataia bwa bon Iehova ngai ngkana I kaaki au kabaang i nanoni bain ueani Baburon, ao e kabongana n ekaanako iai te aba ae Aikubita.+
26 Ao N na kamaenakoia I-Aikubita nako buakoia natannaomata ao ni kamaeinikunia nakon aaba,+ ao a na ataia bwa bon Iehova ngai.’”
Taiani Kabwarabwara Mai Nano
^ Ke, “aomata nako man natannaomata ake tabeua.”
^ Tao e kaineti nakoia tibun Iteraera ake a iraorao ma Aikubita.
^ Ebera, “Nebukareta,” aroni koreana teuana.
^ Ebera, “kaboonakoa.”
^ Ke, “te mataniwi.”
^ Ke, “Membiti.”
^ Te taeka n Ebera aei tao e irekereke ma te taeka ibukin “te nakotaari,” ao e kabonganaaki bwa te taeka ni kabuakaka.
^ Ae taekan Tebeti.
^ Ke, “Membiti.”
^ Ae taekan Erioboriti.
^ Ke, “karikirakea mwaakana.”
^ Ae taekan ueani Baburon.
