Etita 1:1-22
1 N ana bong Aatueruti,* ae taekan Aatueruti are tautaeka i aon aono*+ aika 127, mai Inria nako Itiobia,*
2 ni boong akanne ngke e tekateka te Uea are Aatueruti i aon ana kaintokanuea i Tiutian*+ ae te tabo ae nonoaki,*
3 n ana katenua n ririki n tautaeka ao e a karaoa te baka n amwarake ibukia ni kabane ana aomata ake tooka ao ana toro. A mena i matana te taanga ni buaka mai Botia+ ma Miria,+ bwaanuea, ao taiani kowana man taian aono,*
4 ao i nanoni boong aika bati aika 180 te bong, ao e kaota nakoia kaubwain ana tautaeka n uea ae kakannato, ma karinean ao tamaroan raoiroina.
5 Ao ngke a koro boong aikai, ao e a karaoa te baka n amwarake te uea i nanon itibong ibukia aomata ni kabane ake a mena i Tiutian* ae te tabo ae nonoaki,* mairoun ane te kabanea ni kakannato ni karokoa ane te kabanea ni mangori, ni katawanangin te onnaroka are n ana baareti te uea.
6 Ao iai taian rinen, kunnikai aika raraoi, ao kunnikai aika buruu aika tauaki n roobu aika karaoaki mani kunnikai aika raraoi, ao kunnikai aika karaoaki man te karai ae beboo ae buraen te tiibu, ao a kabaeaki baikai ni mwaamwa aika tirewa aika nim ma boua aika mabora. Ao iai kaintekateka aika koora ma tirewa aika mena i aon te nangoa ae te bobiri,* mabora, bwaeao, ao mabora aika roroo.
7 E kabutaki te wain i nanoni mwangko aika koora, ao e kakaokoro te mwangko teuana ma teuana, ao e rangi ni bati ana wain te uea n aron are e kona ni karekea te uea.
8 Akea temanna ae kairoroiia* bwa a na moi n aron ae boraoi ma te tua, bwa e a tia ni baireia te uea ma mataniwi n ana baareti bwa e riai temanna ma temanna ni karaoa are e bon taku.
9 E karaoa naba te baka n amwarake te Ueannaine are Watiti+ ibukia aine ake a mena n ana auti* te Uea are Aatueruti.
10 N te kaitiua ni bong ngke e a kimwareirei nanon te uea ibukin te wain, ao e a tuanga Meuman, Bitita, Arebona,+ Bikita, Abaketa, Tietara, ao Karekati, ake mataniwi ake itiman ake a bebeku i matan te Uea are Aatueruti,
11 bwa a na kaira te Ueannaine are Watiti nako matan te uea ma ana baunuea* i aona, bwa e na kaota tamaroana nakoia botannaomata ao tooka, bwa e bon rangi ni baaraoi neiei.
12 Ma e teimatoa n rawa n roko te Ueannaine are Watiti, ni kaineti ma are e tua te uea rinanoia mataniwi n ana auti. Ngaia are e a rangi n un te uea ao e a urarake unna ae korakora i nanona.
13 E maroro ngkanne te uea ma mwaane aika wanawana ake iai aia ataibwai ni kaineti ma baika a tia ni karaoaki rimoa* (bwa aei aroni kaotan ana kangaanga te uea i mataia aomata nako ake a rabakau n te tua ao n taian tangitang,
14 ao naake a rangi ni kaan ma ngaia, aika Karetiena, Tetara, Atemata, Taretiti, Mereti, Maretena, ao Memukan, ake tooka ake itiman+ ake mai Botia ao Miria, ake a katoatai n nanako matan te uea, ao a taui nakoa ake taiani kabanea n rietata n te tautaeka n uea).
15 E titiraki ni kangai te uea: “Tera ae e na karaoaki nakon te Ueannaine ae Watiti ni kaineti ma te tua, ibukina bwa e aki ongo n te baere e tua te Uea ae Aatueruti are kaotaki rinanoia mataniwi n ana auti te uea?”
16 E kaeka ni kangai Memukan i matan te uea ma tooka: “E aki karaoa ae kairua te Ueannaine are Watiti tii nakon te uea,+ ma nakoia naba tooka ni kabane ao nakoia botannaomata ni kabane aika n ana aono* ni kabane te Uea ae Aatueruti.
17 Bwa ane e na ataaki te baere e karaoia te ueannaine irouia buuaine ni kabane, ao ane a na ribaiia buuia ao a na kangai, ‘E tuatua te Uea are Aatueruti bwa e na kairaki te Ueannaine are Watiti nako matana, ma e rawa neierei n roko.’
18 N te bong naba aei ao buuia tooka ake mai Botia ma Miria ake a ataa taekan te baere e karaoia te ueannaine, a na taetae n te aro naba anne nakoia ana aomata te uea ake tooka, ao e na korakora iai te kakaniko ma te un.
19 Ngkana e taku te uea bwa e raoiroi irouna, ao ke e nako te moti mairoun te uea, ao ke e koreaki i buakon tuani Botia ma Miria ae e aki kona ni manga onikaki,+ ae e aki kona ni manga rinnako Watiti i matan te Uea ae Aatueruti. Ao ke e anga te uea nakoan neiei n uea nakon te aine temanna ae raoiroi riki nakoina.
20 Ao ngkana e ongo te aba ana moti te uea n aaba ni kabane ake e tautaekan, ao a na bane buuaine ni karineia buuia, mairoun ane te kabanea ni kakannato ni karokoa ane te kabanea ni mangori.”
21 E kakukureia te uea ma tooka te iango aei, ao e karaoa te uea te baere e taku Memukan.
22 Mangaia are e kanakoi reeta nakon aono*+ ni kabane ake e tautaekan te uea, nakon te aono* teuana ma teuana n oin ana koroboki,* ao nakon te botannaomata teuana ma teuana n oin ana taetae, bwa a riai buumwaane nako n riki bwa taani kairiri* n oin aia utu, ao n taetae n oin aia taetae kaain abaia.
Taiani Kabwarabwara Mai Nano
^ E ataaki bwa Tokititi te Moan ae natin Taraiati te Kakannato (Taraiati Itatibiti).
^ Ke, “aono aika tautaekanaki.”
^ Ke, “Kuti.”
^ Ke, “Tiutia.”
^ Ke, “te baareti; te tabo ni kamaiu.”
^ Ke, “aono aika tautaekanaki.”
^ Ke, “Tiutia.”
^ Ke, “te baareti; te tabo ni kamaiu.”
^ Te aeka n atibu ae rangi ni matoatoa, ae n angiin te tai e uraura ma ni kirimainaina, ao e rangi ni kakawaki.
^ Ke, “taui aroia.”
^ Ke, “baareti.”
^ Ke, “te bwara ae te kunnikai.”
^ Ke, “aroni karaoani bwaai rimoa.” Ebera, “taian tai.”
^ Ke, “aono aika tautaekanaki.”
^ Ebera, “aono aika tautaekanaki iroun te uea.”
^ Ke, “aono aika tautaekanaki.”
^ Ke, “tein ana koroboki.”
^ Ke, “tooka.”
