Etita 3:1-15
3 Imwin aei ao te Uea are Aatueruti e a karikirakea Aman+ are natin Ammetata are tibun Akaka,+ ao e karietataa teuaei n arona n anganna te nakoa ae rietata riki nakoia tooka ni kabane ake raona.+
2 Ao a bane ana toro te uea ake ni mataroan ana oo te uea ni katorobubua ni bobaraaki i aontano nakon Aman, bwa anne te bwai ae e tua te uea ibukin teuaei. Ma e rawa Moretekai ni katorobubua ni bobaraaki i aontano.
3 Mangaia are a taku ana toro te uea ake a mena ni mataroan ana oo te uea, nakoni Moretekai: “E aera ngkai ko kakeaa bongan ana tua te uea?”
4 A katoabong n tuangnga, ma e aki ongo irouia. Ngaia are a a tuanga Aman bwa e na noria bwa e na teimatoa aroaroni Moretekai aei ke e na aki,+ bwa e a tia n tuangia ae boni ngaia te I-Iutaia.+
5 Ao ngke e noria Aman bwa e rawa Moretekai ni katorobubua ni bobaraaki i aontano nakoina, ao e a kororake unin Aman.+
6 Ma e ribaa te iango are e na katiaa aron* tii Moretekai, bwa a a tia naba n tuangnga taekaia ana aomata Moretekai. Mangaia are e a ukoukora kamaunaaia I-Iutaia ni kabane Aman, ake ana aomata Moretekai, ake a mena n aaba ni kabane ake e tautaekan Aatueruti.
7 N te moan namwakaina are te namwakaina ae Nitian,* n ana ka-12 n ririki+ n tautaeka te Uea are Aatueruti, ao a ukoukora te Bura+ (ae taekan te Kaiwa) i matan Aman bwa a na kakaaea te bong ma te namwakaina, ao e bwakara raoi te ka-12 n namwakaina, ae Ata.*+
8 E taku ngkanne Aman nakon te Uea are Aatueruti: “Iai te botannaomata teuana ae kauamaeakinako ao a a maenako i buakoia botannaomata+ n aono* ni kabane aika ko tautaekan,+ ae a kaokoro aia tua ma aia tua botannaomata nako, ao a aki ongeaba n ana tua te uea, ao e aki raoiroi ibukin te uea ngkana e katikuia n aroia.
9 Ngkana e kakukureia te uea te baei, ao ke e koreaki te tua ae a na boni kamaunaaki. N na kabwakaa 10,000 te tarena* n tirewa nakoia mataniwi bwa a na karinna ni nnen ana bwai aika kakawaki te uea.”*
10 Ao te uea e buuta ana mwamwa mai baina ae kanikinaean nakoana+ ao e angan Aman+ are natin Ammetata are tibun Akaka,+ are te tia kairiribai nakoia I-Iutaia.
11 E taku te uea nakon Aman: “Ko anganaki te tirewa ma te botannaomata anne, bwa ko na karaoa nakoia ane ko bon taku.”
12 Ao a weteaki ana tia koroboki te uea+ n te ka-13 ni bong n te moan namwakaina. Ao a korei+ nakoia ana teterabi* te uea bwaai ni kabane ake e tua Aman, ao nakoia kowana ake a tararuai aono,* ma tooka mani botannaomata aika kakaokoro, nakon te aono* teuana ma teuana n oin ana koroboki,* ao te botannaomata teuana ma teuana n oin ana taetae. E koreaki te baei n aran te Uea are Aatueruti ao e kanikinaeaki n ana mwamwa te uea ae kanikinaean nakoana.+
13 A kanakoaki reeta rinanoia taan uataeka nakon ana aono* ni kabane te uea, ma n tua bwa a na kamaunaaki, a na tiringaki, ao a na kamateaki I-Iutaia ni kabane, ake a ataei ao ake a kara, ataei ao aine n te bong ae tii tebongina, ae 13 iai bongin te ka-12 n namwakaina, ae te namwakaina ae Ata,+ ao a na tauaki aia bwai.+
14 E na kaotaki katoton te koroboki arei bwa te tua n aono* nako, ao ni katanoataaki nakoia botannaomata ni kabane, bwa a aonga n tauraoi imwain te bong anne.
15 A waekoa n otinako taan uataeka+ i aan ana tua te uea, ao e kateaki te tua anne i Tiutian*+ ae te tabo ae nonoaki.* Ao e a tekateka te uea ma Aman ni moi, ma e a aki rau te kaawa ae Tiutian.*
Taiani Kabwarabwara Mai Nano
^ Ebera, “kaaki baia i aon.”
^ Ke, “aono aika tautaekanaki.”
^ Ke tao, “N na kabwakaa 10,000 te tarena ni nnen ana bwai aika kakawaki te uea ibukia akana karaoa te mwakuri aei.”
^ Nora Nanon Taeka.
^ Ke, “aono aika tautaekanaki.”
^ Ke, “te aono ae tautaekanaki.”
^ Ke, “tein ana koroboki.”
^ Ke, “aono aika tautaekanaki.”
^ Ke, “aono aika tautaekanaki.”
^ Ke, “Tiutia.”
^ Ke, “te baareti; te tabo ni kamaiu.”
^ Ke, “Tiutia.”
