Etita 4:1-17
4 Ngke e a atai bwaai ni kabane ake a a tia ni karaoaki+ Moretekai,+ ao e a raeuai kunnikaina ao e karina te raerobwa* ma ni kaaki te mannang i aona. Ao e otinako nako nukan te kaawa ao e tang n takarua ma ni korakai.
2 Ao e tii toki ni mataroan ana oo te uea, bwa akea ae e kona n rinnako ni mataroan ana oo te uea ni kunnikainna n te raerobwa.
3 Ao e korakora te nanokawaki i buakoia I-Iutaia n aono* nako+ ake e roko iai ana taeka te uea ma ana tua, n ikotaki ma te aki mamatam,+ te tang, ao te tanginiwenei. A bati aika a wene i aon te raerobwa ao te mannang.+
4 Ngke a a rin ana toro Etita aika aine ma ana iunaki n tuangnga, ao e a korakora rawawatan te ueannaine. Ao e kanakoi kunnikai nakoni Moretekai bwa e na kabonganai n oneani mwin ana raerobwa, ma e aki butimwaei teuaei.
5 Ao Etita e wetea Aitaka are temanna i buakoia ana iunaki te uea, are e mwiokoia bwa e na beku iroun neiei, ao e tua neiei nakon teuaei bwa e na ongora irouni Moretekai bwa tera nanon te baerei ao tera ae riki.
6 Mangaia are e otinako Aitaka nakoni Moretekai ni maraen te kaawa are i moani mataroan ana oo te uea.
7 Ao Moretekai e tuanga teuaei bwaai ni kabane ake a riki nakoina ao te mwaiti raoi ni mwane+ are e berita Aman bwa e na kabwakaa ni nnen ana bwai aika kakawaki te uea, ibukini kamaunaaia I-Iutaia.+
8 E angan naba teuaei katoton te tua are e kaotaki i Tiutian*+ ibukin tiringaia. E riai ni kaotia nakon Etita ma ni kabwarabwaraa nakon neiei, ao n tuangnga+ bwa e na rin nakon te uea ma n onnonia ana akoi ao ni bubutiia ibukia ana aomata neiei.
9 E a oki Aitaka ao n tuanga Etita baike e taekini Moretekai.
10 E kaeka Etita nakon Aitaka ni kangai ma kaetieti ake e na tuanga Moretekai:+
11 “A bane n ataia ana toro te uea ma aomata ake n ana aono* nako te uea, bwa ngkana iai te mwaane ke te aine ae rin nakon ana katawanang te uea are mai nanona+ ao n aki weteaki, ao bon tii teuana te tua ae e na karaoaki nakoina: E riai ni kamateaki, ao e na tii maiu ngkana e arora okona te uea ae te koora nakoina.+ Ao ngai ngkai I tuai mani weteaki nakon te uea i nanoni boong aika 30.”
12 Ngke e tuangaki Moretekai te baere e taekinna Etita,
13 ao e kaekaa Etita ni kangai: “Tai taku bwa e na kai reke riki maium nakoia I-Iutaia ake tabemwaang, ngkai ko a mena ni batan te uea.
14 Bwa ngkana ko teimatoa ni kainabwabu n te tai aei, ao e na bon roko te ibuobuoki ma te kakamaiu nakoia I-Iutaia man te tabo teuana,+ ma ko na mate ngkoe ma kaain ana utu tamam. Bwa antai ae ataia ao tao ngaia ko riki bwa te ueannaine ibukin te tai ae aron aei?”+
15 E kaeka ngkanne Etita nakoni Moretekai ni kangai:
16 “Naako ao ikotiia I-Iutaia ni kabane ake i Tiutian,* ao kam na aki mamatam+ ibukiu. Tai amwarake ke ni moi i nanon tenibong,+ n te ngaina ao n te bong. Ao ngai ma au toro aika aine ti na aki naba mamatam. N na rin nakon te uea, ae te bwai ae ekaanako te tua, ao ngkana N na mate ao N na boni mate.”
17 Mangaia are e touaanako kawaina Moretekai ao e karaoi bwaai ni kabane ake e tuangnga Etita bwa e na karaoi.
Taiani Kabwarabwara Mai Nano
^ Nora Nanon Taeka.
^ Ke, “aono aika tautaekanaki.”
^ Ke, “Tiutia.”
^ Ke, “aono aika tautaekanaki.”
^ Ke, “Tiutia.”
