Etita 5:1-14
5 N te katenua ni bong+ ao e a karin ana kamwarai Etita ake kunnikaina n uea ao e tei ni katawanangin ana auti te uea are mai nanona, ni kaitaraa ana auti* te uea, ngke e tekateka te uea i aon ana kaintokanuea n ana auti ni kaitaraa te tabo n rin.
2 Ao te uea ngke e nora naba ngkekei te Ueannaine are Etita n tei n te katawanang, ao e reke akoan neiei irouna, ao e a arora okona ae te koora+ are i nanoni baina nakon Etita. E keerake ngkanne Etita ao e ringa tabon te oko.
3 E titiraki te uea nakon neiei ni kangai: “Etita ae te Ueannaine, tera ae riki? Tera am bubutii? E ngae naba ngkana ko bubutii iteran ueau, ma ko na bon anganaki naba!”
4 E kaeka ni kangai Etita: “Ngkana e kukurei iai te uea, ao e bia roko n te bong aei te uea ma Aman+ nakon te baka n amwarake ae I a tia ni katauraoia ibukina.”
5 Ngaia are e taku te uea nakoia ana rorobuaka: “Tuanga Aman bwa e na kawaekoaa n nakomai ni kaineti ma ana bubutii Etita.” Mangaia are e nako te uea ma Aman nakon te baka n amwarake are e katauraoia Etita.
6 Ngke e a boo te moi wain ao e a taku te uea nakon Etita: “Tera am bubutii? Ko na bon anganaki! Ao tera ae ko onnon ibukina? E ngae naba ngkana ko bubutii iteran ueau, ma e na boni karaoaki naba!”+
7 Ao e kaeka ni kangai Etita: “Aio au bubutii ma au onnon:
8 Ngkana ngaia bwa e reke akoau iroun te uea ao ngkana e kukurei te uea n anganai au bubutii ao ni karaoa nanon au onnon, ao e bia roko te uea ma Aman nakon te baka n amwarake ae N na karaoia ibukia ningabong, ao N na karaoa ningabong ae e taku te uea.”
9 N te bong anne ao e a otinako Aman ma te kimwareirei ao kukurein nanona. Ma ngke e nora Moretekai ni mataroan ana oo te uea, ao e noria Aman bwa e aki teirake ma ni maaku i matana, ao e kororake unin Aman irouni Moretekai.+
10 Ma e taotaona nanona Aman ao e nakon ana auti. Ao e a kanaanako bwa a na weteaki raoraona ao Tireti+ are buuna.
11 E kamoamoaa aron tamaroani kaubwaina Aman, natina mwaane aika mwaiti,+ ao aron te uea ni karikirakea ma ni karietataa riki i aoia tooka ma ana toro te uea.+
12 E reitia ni kangai Aman: “Irarikin anne, akea te aomata temanna ae kaoaki iroun te Ueannaine are Etita nakon te baka n amwarake are e katauraoia,+ ma bon tii ngai bwa N na raona te uea. I kaoaki naba ningabong bwa N na raona neiei ma te uea.+
13 Ma I aki rauaki ni baikai ni kabane, ngkai I nonora Moretekai are te I-Iutaia n tekateka ni mataroan ana oo te uea.”
14 Mangaia are e taku Tireti are buuna ma raoraona ni kabane nakoina: “Ko na tua bwa e na kateaki te kai ae 50 te mwanokunibai* rietana. Ao ko na tuanga te uea n te moaningabong bwa e riai n tauraki iai Moretekai.+ Ao ko na nako ma te uea ni kakimwareireiko n te baka n amwarake.” E taraa n raoiroi te iango aei iroun Aman, mangaia are e a tua katean te kai.
