Etita 8:1-17
8 N te bong anne ao te Uea are Aatueruti e a anga ana bwai ni kabane Aman+ are te tia kairiribai nakoia I-Iutaia,+ nakon te Ueannaine are Etita. Ao e a rin Moretekai i matan te uea, ibukina bwa e a tia Etita ni kaota irekerekena ma teuaei.+
2 Ao te uea e buuta ana mwamwa ae kanikinaean nakoana+ are e anaia mairoun Aman ao e angani Moretekai. Ao Etita e mwiokoa Moretekai n ana bwai ni kabane Aman.+
3 Irarikin anne, e a manga taetae riki Etita nakon te uea. E katorobubua i rarikini waena ao e tang ma ni bubutiia bwa e na kamauna te buakaka are e karaoia Aman are tibun Akaka, ma ana babaire n ekiianako I-Iutaia.+
4 E arora okona ae te koora te uea nakon Etita,+ ao e a teirake Etita ma n tei i matan te uea.
5 E taku neiei: “Ngkana e kukurei iai te uea, ao ngkana e reke akoau irouna, ao ngkana e taraa n riai iroun te uea ao I tangiraki i matana, ao e bia koreaki te tua bwa e na kamaunaaki ana koroboki Aman+ are te tia bairei iango aika bubuaka, are natin Ammetata are tibun Akaka,+ are e koreia bwa e na kamaunaia I-Iutaia ake n ana aono* ni kabane te uea.
6 Bwa N na kangaa ni kona n taraa te kabuanibwai ae nang roko i aoia au aomata, ao N na kangaa ni kona n taraa kamaunaaia au koraki?”
7 Mangaia are e taku te Uea are Aatueruti nakon te Ueannaine are Etita ao Moretekai are te I-Iutaia: “Noria! I a tia n anga ana bwai ni kabane Aman nakon Etita,+ ao n tua bwa e na tauraki i aon te kai+ ibukin ana babaire n ekiianako* I-Iutaia.
8 Kam kona ngkai ni korei baike kam bon taku ibukia I-Iutaia n aran te uea, ao ni kanikinaea n ana mwamwa te uea ae kanikinaean nakoana, bwa e bon aki kona ni kamaunaaki te tua are koreaki n aran te uea ma ni kanikinaeaki n ana mwamwa te uea ae kanikinaean nakoana.”+
9 Mangaia are a weteaki ana tia koroboki te uea n te tai anne, n te katenua n namwakaina ae te namwakaina ae Tiwan,* n te ka-23 ni bong, ao a korei nakoia I-Iutaia bwaai ni kabane ake e tua Moretekai, ao nakoia naba taian teterabi,*+ kowana, ao natinuea mwaane ake n aono* ake mai Inria nako Itiobia, aika aono*+ aika 127, nakon te aono* teuana ma teuana n oin ana koroboki,* ao nakon te botannaomata teuana ma teuana n oin ana taetae, ao nakoia I-Iutaia n oin aia koroboki* ma aia taetae.
10 E korea te baei teuaei n aran te Uea are Aatueruti ao e kanikinaea n ana mwamwa te uea ae kanikinaean nakoana.+ E kanakoi koroboki akekei ni baia taan uataeka ake a toka i aoia aoti. Ao a nako i aoia aoti aika birimwaaka, aika kaikawaaki ibukin te beku ibukin te uea.
11 E anga te kariaia te uea rinanoni baikai nakoia I-Iutaia ake ni kaawa aika kakaokoro bwa a na ikotaki ni buaka ibukini maiuia,* ao ni kamaunaia, n tiringia, ao ni kamateia aia taanga ni buaka te botannaomata teuana ke te aono* teuana are e na buakania, n ikotaki ma aine ao ataei, ao a na taui aia bwai.+
12 E na karaoaki anne n te bong ae tii teuana n ana aono* ni kabane te Uea are Aatueruti, n 13 iai bongin te ka-12 n namwakaina, ae te namwakaina ae Ata.*+
13 E riai ni kaotaki bwa te tua kanoan* te koroboki aei n aono* ni kabane. E riai ni katanoataaki nakoia botannaomata ni kabane, bwa a aonga n tauraoi I-Iutaia n te bong anne ni karekei kaia aiaia.+
14 A ienikuri n nako taan uataeka n aoti ake a kabonganaaki n te beku ibukin te uea ma ni kabirimwaakaia n aron are e tua te uea. E kateaki naba te tua i Tiutian*+ ae te tabo ae nonoaki.*
15 Ao Moretekai e a kitana matan te uea ni kunnikainna n te kunnikai n uea ae buruu ma te rinen, ao e kabongana te baunuea ae bubura ae te koora, ao te ninira ae te kunnikai ae raoiroi ae karaoaki man te karai ae beboo ae buraen te tiibu.+ Ao a takarua ni kimwareirei kaain te kaawa ae Tiutian.*
16 Bwa irouia I-Iutaia, e a roko te kabebeteaki* ao te kimwareirei, te kakatonga ao te karineaki.
17 Ao a a kimwareirei I-Iutaia ma ni kakatonga n aono* ni kabane ma kaawa ni kabane ake e roko iai ana moti te uea ma ana tua, ao a a karaoi taiani baka n amwarake ma taiani bukamaru. A bati i buakoia botannaomatan te aba ake a taekinia bwa ngaiia I-Iutaia,+ bwa e bwakariia maakaia I-Iutaia.
Taiani Kabwarabwara Mai Nano
^ Ke, “aono aika tautaekanaki.”
^ Ebera, “ibukina bwa e arora baina n ekiianako.”
^ Ke, “te aono ae tautaekanaki.”
^ Ke, “tein aia koroboki.”
^ Ke, “tein ana koroboki.”
^ Ke, “aono aika tautaekanaki.”
^ Nora Nanon Taeka.
^ Ke, “aono aika tautaekanaki.”
^ Ebera, ne’phesh, nora Nanon Taeka.
^ Ke, “te aono ae tautaekanaki.”
^ Ke, “aono aika tautaekanaki.”
^ Ke, “katoton.”
^ Ke, “aono aika tautaekanaki.”
^ Ke, “Tiutia.”
^ Ke, “te baareti; te tabo ni kamaiu.”
^ Ke, “Tiutia.”
^ Ebera, “te oota.”
^ Ke, “aono aika tautaekanaki.”
