Etita 9:1-32
9 N 13 iai bongin te ka-12 n namwakaina ae te namwakaina ae Ata,*+ ngke e nang karaoaki nanon ana taeka ma ana tua te uea,+ n te bong are a kantaningaia iai taani kairiribai nakoia I-Iutaia bwa a na tokanikai i aoia, ao e a riki ae kaitaraan anne, ao I-Iutaia a kataei aia kai taani kairiribai nakoia.+
2 A bane I-Iutaia n ikotaki n aia kaawa ake n ana aono* ni kabane te Uea are Aatueruti,+ bwa a na kaaki baia i aoia aomata ake a ukoukora karekeani kaia naakai, ao akea temanna te aomata ae kona n tei ni kaaitaraia, bwa e bwakariia botannaomata ni kabane maakaia naakai.+
3 Ao a bane tooka ake n taian aono,* teterabi,*+ kowana, ao naake a tararuai baike a irekereke ma te uea, ni boutokaiia I-Iutaia, bwa a maaka Moretekai.
4 E a rangi ni mwaaka Moretekai+ n ana auti* te uea, ao e a butanako kakannatona n aono* ni kabane, ibukina bwa e a tabe n ririkirake mwaakani Moretekai.
5 Ao I-Iutaia a kamateia ni kabane n te kabaang taani kairiribai nakoia, a tiringia ao a kamaunaia. A karaoi baike a tangiri nakoia taani kairiribai nakoia.+
6 Ao I-Iutaia a tiringia ao a kamaunaia rorobuaka aika 500 i Tiutian*+ ae te tabo ae nonoaki.*
7 A kamatea naba Baretiantata, Tarebon, Atibata,
8 Borata, Ataraia, Aritata,
9 Barematita, Aritai, Arirai, ao Waitata,
10 ake mwaane ake tengaun ake natin Aman are natin Ammetata, are te tia kairiribai nakoia I-Iutaia.+ Ma ngke a tia n tiringia ao a aki anai bwaai ni kuri.+
11 N te bong anne ao e a kaongoaki te uea mwaitiia ake a tiringaki i Tiutian* ae te tabo ae nonoaki.*
12 E taku te uea nakon te Ueannaine are Etita: “A a tia I-Iutaia n tiringia ao ni kamaunaia rorobuaka aika 500 ao natin Aman ake mwaane ake tengaun i Tiutian* ae te tabo ae nonoaki.* Ao tera ae a a tia ni karaoia n nikiran nako ana aono*+ te uea? Tera ngkai am bubutii? Ko na bon anganaki. Ao tera riki ae ko onnon ibukina? E na boni karaoaki.
13 E kaeka ni kangai Etita: “Ngkana e kukurei iai te uea,+ ao ke a kariaiakaki I-Iutaia ake i Tiutian* bwa a na karaoa ae kaineti ma te tua n te bong aei ningabong naba,+ ao ke a tauraki natin Aman mwaane ake tengaun i aon te kai.”+
14 Mangaia are e tua te uea bwa e na karaoaki anne. Ao e kateaki te tua i Tiutian,* ao a tauraki natin Aman ake mwaane ake tengaun.
15 A a manga ikotaki riki I-Iutaia i Tiutian* n 14 iai bongin te namwakaina ae Ata,+ ao a tiringia rorobuaka aika 300 i Tiutian,* ma a aki anai bwaai ni kuri.
16 A bane naba n ikotaki nikiraia I-Iutaia ake n ana aono* te uea, ao a buaka ibukini maiuia.+ A kamaunaia aiaia ao a kamateia 75,000 mai buakoia taani kairiribai nakoia,+ ma a aki anai bwaai ni kuri.
17 E riki anne n 13 iai bongin te namwakaina ae Ata, ao a motirawa n te ka-14 ni bong, ao a karikia bwa te bong ni baka n amwarake ao ni kimwareirei.
18 A ikotaki I-Iutaia ake i Tiutian* n te ka-13+ ao n te ka-14 ni bong,+ ao a motirawa n te ka-15 ni bong, ao a karikia bwa te bong ni baka n amwarake ao ni kimwareirei.
19 Anne bukina ae I-Iutaia ake a maeka ni kaawa ake i tinanikun te aono a karika te ka-14 ni bong n te namwakaina ae Ata bwa te bong ni kimwareirei ao ni baka n amwarake, te bong ni bukamaru,+ ao te tai are a tibwatibwai iai tibwanga aika amwarake i marenaia.+
20 E korei mwini baika riki aikai Moretekai+ ao e kanakoi reeta nakoia I-Iutaia ni kabane ake n ana aono* ni kabane te Uea are Aatueruti, ake a kaan ma ake a raroa.
21 E tuangia bwa a na kakauringa te ka-14 ni bong n te namwakaina ae Ata, ao te ka-15 ni bong naba ni katoa ririki,
22 ibukina bwa ni boong akanne ao a a motirawa iai I-Iutaia mairouia aiaia, ao anne te namwakaina are e a bitaki iai rawawataia nakon te kimwareirei ao nanokawakia+ nakon te bong ni bukamaru. A na karikii bwa boong ni baka n amwarake ao ni kimwareirei, ao te tai n tibwatibwai tibwanga aika amwarake i marenaia ma bwaintangira nakoia akana maiu ni kainnano.
23 Ao a kukurei I-Iutaia ni waakinaanako te bukamaru are a a tia ni moanna, ao ni karaoa te bwai are e koreia Moretekai nakoia.
24 Bwa e a tia Aman+ are natin Ammetata are tibun Akaka,+ are te tia kairiribai nakoia I-Iutaia ni kabane, ni babaire n ekiianako I-Iutaia bwa e na kamaunaia,+ ao e ukoukora te Bura,+ ae taekan te Kaiwa, bwa e na kanakoi nanoia ao ni kamaunaia.
25 Ma ngke e rin Etita i matan te uea, ao e anga te tua ae koreaki+ iai ae kangai: “Ke e oki ana babaire ae buakaka teuanne n ekiianako I-Iutaia,+ nako aon oin atuna,” ao a tauria ma natina mwaane i aon te kai.+
26 Anne bukina ae a arani iai boong aikai bwa Buurim, bwa ingoan te Bura.*+ Ngaia are ibukini bwaai ni kabane aika koreaki n te reta aei ao baike a nori ni kaineti ma te baei, ao baike a roko i aoia,
27 a kabaeia iai I-Iutaia i bon irouia ma kanoaia ao te koraki nako ake a raonia,+ bwa a na boni bukamarui boong aika uabong aikai, ao ni kakororaoa te baere e koreaki ibukia, n te tai are e a tia ni baireaki ni katoa ririki.
28 A na ururingaki boong aikai ao ni bukamaruaki n rooro nako, irouia utu nako, n te aono* teuana ma teuana, ao n te kaawa teuana ma teuana, ao a aki riai ni mauna boong aika bongini Buurim i buakoia I-Iutaia, ao e aki riai n toki kauringaakia i buakoia kanoaia.
29 Ao te Ueannaine are Etita are natin Abiaira e a koroboki ma Moretekai are te I-Iutaia ni kabongana mwaakaia, bwa a na kamatoaa te kauoua n reta ae kaineti ma Buurim.
30 E kanakoi teuaei reeta nakoia I-Iutaia ni kabane ake n aono* ake 127+ ake e tautaekan Aatueruti,+ n taeka aika kaota te raoi ao te koaua,
31 bwa e na kamatoaaki bukamaruani bongini Buurim n taia ake a a tia ni baireaki, n aron are e tuangia Moretekai are te I-Iutaia ma te Ueannaine are Etita bwa a na karaoia,+ ao n aron are a a tia naba ni kabaeia iai i bon irouia ma kanoaia bwa a na karaoia,+ n ikotaki ma te aki mamatam+ ao te kakorakora n tataro ni bubutii.+
32 Ao a kamatoaaki baike a kaineti ma Buurim+ n ana tua Etita, ao e koreaki mwina n te boki.
Taiani Kabwarabwara Mai Nano
^ Ke, “aono aika tautaekanaki.”
^ Ke, “aono aika tautaekanaki.”
^ Nora Nanon Taeka.
^ Ke, “baareti.”
^ Ke, “aono aika tautaekanaki.”
^ Ke, “Tiutia.”
^ Ke, “te baareti; te tabo ni kamaiu.”
^ Ke, “Tiutia.”
^ Ke, “te baareti; te tabo ni kamaiu.”
^ Ke, “Tiutia.”
^ Ke, “te baareti; te tabo ni kamaiu.”
^ Ke, “aono aika tautaekanaki.”
^ Ke, “Tiutia.”
^ Ke, “Tiutia.”
^ Ke, “Tiutia.”
^ Ke, “Tiutia.”
^ Ke, “aono aika tautaekanaki.”
^ Ke, “Tiutia.”
^ Ke, “aono aika tautaekanaki.”
^ “Bura,” ae nanona “te Kaiwa.” Ao ana bururare ae “Buurim,” e kaota aia toa I-Iutaia are e bukamaruaki n te ka-12 n namwakaina n te karenta ae tabu. Nora Buk. B15.
^ Ke, “te aono ae tautaekanaki.”
^ Ke, “aono aika tautaekanaki.”
