I-Karatia 1:1-24
1 Ngai ae Bauro ae te abotoro, tiaki mairouia aomata ke mairoun temanna, ma mairoun Iesu Kristo+ ao te Atua ae te Tama,+ are e kautia mai buakoia maate.
2 I koroboki ma taari ni kabane aika mena i rarikiu, nakoia ekaretia ake i Karatia:
3 Ke e mena iroumi te akoi ae rianako ma te rau mairoun te Atua ae Tamara, ao te Uea ae Iesu Kristo.
4 E anga ngaia ibukin ara bure,+ n ai aron nanon Atuara ma Tamara+ bwa e aonga ni kainaomataira man te waaki ae buakaka ae ngkai i aon te aba,*+
5 are ana bwai te neboaki n aki totoki. Amen.
6 I mimi ngkai kam waekoa ni kitana* Teuare weteingkami n ana akoi ae rianako Kristo, nakon te aeka n rongorongo ae raoiroi teuana.+
7 Tiaki n ae aongkoa iai riki te rongorongo ae raoiroi teuana, ma iai te korakina ake a tabareingkami,+ ma ni kani kabwaoua te rongorongo ae raoiroi are taekan te Kristo.
8 Ma ngkana iai temanna i buakora ke te anera mai karawa ae e taekina nakoimi te rongorongo ae raoiroi ae kaokoro ma te rongorongo ae raoiroi are ti taekinna ngkoa nakoimi, ao ke e maraia.
9 N aron are ti a tia n taekinna mai mwaina, I a manga kangai riki, Ane e taekina te rongorongo ae raoiroi nakoimi ae kaokoro ma are kam a tia ni kakoauaa, ao ke e maraia.
10 I kataia ngkai n anai nanoia aomata, ke nanon te Atua? Ke I kani kakukureiia aomata? Ngkana ngaia bwa I kakukureiia aomata, ao tiaki ana toro Kristo ngai.
11 Bwa I tangiria bwa kam na ataia taari, bwa te rongorongo ae raoiroi are I tataekinna nakoimi, bon tiaki mairouia aomata,+
12 bwa I aki karekea mairoun te aomata, ao I aki naba reireinaki taekana, ma e kaotia Iesu Kristo nakoiu.
13 Kam a bon tia n ongo arou ngkoa ngke I kaaina te Aro n Iutaia,+ ao I teimatoa ni kakorakoraai* ni bwainikirina ana ekaretia te Atua, ma n ururua.+
14 Ao e raka riki arou n te Aro n Iutaia nakoia tabonrorou aika bati n au reeti, bwa e bati riki ingaingan nanou n aia katei au bakatibu.+
15 Ma te Atua are kariaia bwa N na bungiaki ao e weteai rinanon ana akoi ae rianako,+ ngke e nora riaini
16 kaotan Natina rinanou bwa I aonga n tataekina te rongorongo ae raoiroi ibukin Iesu Kristo nakoia aomata aika tiaki Iutaia,+ ao I aki waekoa n nako ni kakaaea buokau iroun te aomata,*
17 ao I aki naba waerake nako Ierutarem nakoia naake a a kaman riki bwa abotoro imwaiu, ma I nako Arabia, ao imwina I a manga okira Tamateko.+
18 Tenua te ririki imwina ao I waerake nako Ierutarem+ ni kawara Keba,*+ ao I tiku irouna i nanon 15 te bong.
19 Ma akea riki abotoro aika I noriia ma tii Iakobo+ are tarin te Uea.
20 I tuangingkami i matan te Atua, bwa I bon aki kewe ni kaineti ma baika I korei nakoimi.
21 Imwin anne ao I nako n aonon Turia ao Kirikia.+
22 Ma I aki kinaaki n ekaretia ni Kristian* ake i Iutaia.
23 A a tii ongongo naba ae kangai: “Teuare bwainikirinira+ ngkoa e a tataekina ngkai te rongorongo ae raoiroi ae taekan te onimaki are e kan urua ngkoa.”+
24 Mangaia are a a neboa te Atua ibukin arou.
Taiani Kabwarabwara Mai Nano
^ Ke, “te tai ae buakaka.” Nora Nanon Taeka, “Waaki ae ngkai.”
^ Ke, “kam waekoa ni kamwawaaki mairoun.”
^ Kuriiti, “e rangi n riao arou n teimatoa.”
^ Kuriiti, “iroun te iriko ma te raraa.”
^ E aranaki naba bwa Betero.
^ Kuriiti, “ekaretia ake i Iutaia ake i nanoni Kristo.”
