Ieremia 15:1-21
15 E taku ngkanne Iehova nakoiu: “E ngae ngke a tei Mote ma Tamuera i matau,+ ma N na bon aki naba akoiia aomata aikai. Kanakoia mai matau. Ke a nako.
2 Ao ngkana a kangai nakoim, ‘Ti na nakea?’ ao ko riai ni kangai nakoia, ‘E kangai ana taeka Iehova:
“Ane e riai n reke irouna te rekenikai ae kamamate, ao ke e nakon te rekenikai anne bwa e na mate iai!
Ane e riai ni mate n te kabaang, ao ke e mate n te kabaang!+
Ane e riai ni mate n te rongo, ao ke e mate n te rongo!
Ao ane e riai ni kairakinako bwa te taenikai, ao ke e kairakinako bwa te taenikai!”’+
3 “‘Ao N na karokoi i aoia kabuanibwai aika aua,’*+ bon ana taeka Iehova, ‘te kabaang bwa e na tiritiri, kamea bwa a na katikiianako, ao mannikiba ake i annang ma manin te aonnaba bwa a na kaakang ma ni kakamauna.+
4 Ao N na karaoiia bwa te bwai ni kakamaaku nakoia tautaeka n uea ni kabane n te aonnaba+ ibukini Manate are natin Etekia, are uean Iuta, ibukin te bwai are e karaoia i Ierutarem.+
5 Antai ae e na nanoangaiko ngkoe ae Ierutarem,Antai ae e na kaota nanoangaam,Ao antai ae e na tei moa bwa e na titirakiniko arom bwa ko uara?’
6 ‘Ko a tia ni kitanai,’ bon ana taeka Iehova.+
‘Ko teimatoa n anga akum nakoiu.*+
Ngaia ae N na arora baiu n ekikonako ao ni kamaunako.+
I a kua n nanoangaiko.*
7 Ao N na kaaki kunia n te kainiwaiteke ni mataroan oon te aba aei.
N na anaiia natiia.+
N na kamaunaia au aomata,Kioina ngkai a rawa n rairaki mani kawaia nako.+
8 A na rangi ni bati riki nakon tanon taari i matau aia aine ake a a tia ni mate buuia.
N na kaira te tia kamauna te aba bwa e na ekiianako n te tawanou, e na ekiianako tiina ma rorobuaka n ataei.
N na rina ni karokoa i aoia te kiriwe ao te maaku.
9 E a mamaara te aine ae bungia natina aika itiman,Ao e* a rawerawea ikena.
E a tia ni bung ana taai neiei e ngae ngke e boni ngaina,Ao e karekea te maamaa ma te bwaibwainrang.’*
Ao te koraki ake tii tabeman ake nikiraiaN na anga ngaiia nakon aia kabaang aiaia,’ bon ana taeka Iehova.”+
10 Tinau, I kananoanga ibukina bwa ko bungiai,+Bwa te mwaane ngai ae I a bon rereke naba i buakon te kauntaeka ma te kaiangatoa ma te aba aei ni kabane.
I tuai man tangomwane ke n tangobwai,Ma a bane ni karekea kaiu.
11 E taku Iehova: “N na boni boutokaiko ibukin te raoiroi.
N na boni buokiko n tain te kabuanibwai,Ao n tain te rawawata, ni kaitaraa te tia kairiribai.
12 E kona temanna n urua te biti n ototeia,Ae te biti mai meang, ao te buraati?
13 N na anga ami bwai aika kakawaki ma kaubwaimi bwa bwaai ni kuri,+N akea booia ibukin ami bure ni kabane, ni kabutaa ami aono ni kabane.
14 N na anga nakoia taani kairiribai nakoimiBwa a na uotii nakon te aba ae kam aki ataia.+
Bwa e a kauraaki te ai n uniu,Ao e a urarake n ekingkami nako.”+
15 Ko ataa arou ngkoe ae Iehova,Uringai ao mutiakinai.
Ko na karekei kaia taani bwainikirinai.+
Tai kariaia bwa N na mate* ibukin iremwen unim.
Ko na ataia bwa I kekeiaki ma te kabuakaka aei ibukim.+
16 A reke am taeka, ao I kang,+Ao e a riki am taeka irou bwa kakatongan ao kimwareirein nanou,Bwa I ingoanaki n aram, ngkoe ae Iehova ae Atuaia taanga ni buaka.
17 I aki tekateka i buakoia te koraki aika ngangarengare ma ni kimwareirei.+
I tekateka n tii ngai ibukina bwa e mena baim i aou,Bwa ko kaonai n te un.*+
18 E aera ngkai e a wenemaan marakiu ao e a aki kona ni mao manekau?
E rawa ni kamaoaki.
Ko na riki nakoiu bwa kaanga te koburake n ran ae mwamwanaa te abaAe aki kona n onimakinaki?
19 Mangaia ae e kangai ana taeka Iehova:
“Ngkana ko oki ao N na manga akoiko,Ao ko na tei i matau.
Ngkana ko kaokoroa te bwai ae rangi ni kakawaki man te bwai ae akea manenana,Ao ko na riki bwa kaanga wiu.*
A na rairaki nakoim,Ma ko na aki rairaki nakoia.”
20 “I karaoiko bwa te oo ae te buraati ae nonoaki nakoia aomata aikai.+
A na boni buakanikoMa a na aki tokanikai i aom.*+
Bwa I memena iroum, ni kamaiuko ao ni kainaomatako,” bon ana taeka Iehova.
21 “Ao N na kamaiuko mai baia akana buakaka,Ao ni manga kabooko mai nanoni baia akana akea aia nanoanga.”
Taiani Kabwarabwara Mai Nano
^ Ke tao, “aeka ni motikitaeka aika aua.” Ebera, “utu aika aua.”
^ Ke tao, “teimatoa n nakonako ni kekerikaaki.”
^ Ke, “uringaaba ibukim.”
^ Ke tao, “E a maamaa ma ni maneang.”
^ Ebera, ne’phesh, nora Nanon Taeka.
^ Ebera, “Tai uotainako.”
^ Ke, “te rongorongo ae kaota te un.”
^ Ke, “riki bwa au tia taetae.”
^ Ke, “kataenikaiko.”
