Ieremia 17:1-27
17 “E koreaki aia bure kaain Iuta n te bwai ni koroboki ae te biti.
E kaaraki i aon nanoia n te bwai ni koroboki ae te taiman,Ao i aoni kooro ake n aia baonikarea nako,
2 Ngke a tabe natiia mwaane n uringi aia baonikarea ma aia kai aika tabu,*+I rarikin te kai ae manguroro, i aon tabuki aika rietata,+
3 I aoni maunga i tinanikun te kaawa.
N na anga ami bwai aika kakawaki ma kaubwaimi ni kabane bwa bwaai ni kuri,+Eng, ae bon ami tabo aika rietata ibukin te bure n ami aono nako ni kabutaa.+
4 Kam na kaaki taekan tibwangami i bon iroumi are I anganingkami.+
Ao N na karaoingkami bwa kam na toro irouia taani kairiribai nakoimi n te aba ae kam aki ataia,+Bwa kam kauraa uniu n aron te ai.*+
E na ura n aki toki.”
5 E kangai ana taeka Iehova:
“E na reke kain te aomata* ae onimakinia aomata,+Ao ae e mwiokoi korakoraia* aomata,+Ao ae e rairakinako nanona mairoun Iehova.
6 E na riki bwa ai aron te aroka ae tii ngaia n te rereua.
E na aki nora te bwai ae raoiroi ngkana e roko,Ma e na maeka n taabo aika mwauteretere n te rereua,N te aba ae tarika ike akea ae e kona ni maeka iai.
7 E na kakabwaiaaki te aomata* ae onimakina Iehova,Ae e aki nanokokoraki iroun Iehova.+
8 E na riki bwa ai aron te aroka ae unikaki i rarikin te ran,Ae e kabutiinako wakaana nakon te karaanga.
E na aki tabe ma rokon te kabuebue,Ma a na maiureirei baana n taai nako.+
Ao e na aki tabeaianga n ririkin te mwautakataka,Ao e na aki naba toki ni karikiuaa.
9 E rangi ni kamwamwane* riki te nano nakoni bwaai ni kabane, ao e karuanikai.*+
Antai ae kona n ataa arona?
10 I nenera te nano ngai ae Iehova+Ma n tuoi iango aika raba,*Bwa N na angan temanna ma temanna ni kaineti ma kawaina nako,Ao ni kaineti ma uaan ana mwakuri.+
11 N aron te mannikiba ae te bateriti ae ikotii bunnimoa aika tiaki bunna,Ao ai aron naba te aomata ae karekei kaubwaina n te babakanikawai.*+
A na kitanna baikai ngkai e bon teimatoa naba ni korakora marurungini maiuna,Ao n tokina e na riki bwa te nanobaba.”
12 Bon ara tabo ae tabuTe kaintokanuea ae mimitong ae karietataaki man te moantai.+
13 Ngkoe ae Iehova ae ana kantaninga Iteraera,A na kamaamaeaki akana kitaniko ni kabane.
A na koreaki araia i buakoni bubun te tano akana kabwaoua te koaua n tannako mairoum,*+Ibukina bwa a kitana Iehova, ae nibwan te ran ni kamaiu.+
14 Kamarurungai ngkoe ae Iehova, ao N na marurung.
Kamaiuai ao N na maiu,+Bwa boni ngkoe ae N na karaoiroiko.
15 Noria! Iai te koraki aika kangai nakoiu:
“E nga ana taeka Iehova?+
Ke e nakomai, taiaoka!”
16 Ma ngai I aki birinako man irirakim ngkai te tia kawakintiibu ngai,Ao I aki naba kariariaa te bong ni kabuanibwai.
Ko atai bwaai nako ake e taekini wiu,A bane n riki i matam!
17 Tai riki bwa te bwai ae N na maakunrang iai.
Bon au tabo ni kamanomano ngkoe ni bongin te rawawata.
18 Ke a kamaamaeaki taani bwainikirinai,+Ma tai kariaia bwa N na kamaamaeaki.
Ke a taonakinako n te maakunrang,Ma tai kariaia bwa N na maakunrang.
Karokoa bongin te rawawata i aoia,+Ao kamanatuaia ma ni kamaunaia raoi.*
19 E tuangai Iehova ae kangai: “Naako ao teei ni mataroan aia oo natiia aomata are a riirin ao n otiotinako mai iai uean Iuta, ao ni mataroan oon Ierutarem ni kabane.+
20 Ko riai ni kangai nakoia, ‘Ongora n ana taeka Iehova, ngkami aika uean Iuta, ngkami aika kaain Iuta ni kabane, ao kaain Ierutarem ni kabane, aika riirin mani mataroan te oo aikai.
21 E kangai ana taeka Iehova: “Tarataraingkami, ao tai uota te uota teuana n te bongi n Taabati ke n uotia rinanoni mataroan oon Ierutarem.+
22 Kam na tai uota te uota teuana mani mwengami n te bongi n Taabati, ao kam na tai karaoa te mwakuri naba teutana.+ Kawakina te bongi n Taabati ni katabua, n aron are I tua nakoia ami bakatibu.+
23 Ma a aki ongo ke ni katanimai taningaia, ao a imanono n rawa* n ongeaba ke ni butimwaea te reirei ni kaetieti.”’+
24 “‘“Ma ngkana kam bon ongeaba raoi irou,” bon ana taeka Iehova, “ao kam aki uota te uota rinanoni mataroan oon te kaawa aei n te bongi n Taabati, ao kam kawakina te bongi n Taabati ni katabua n aromi n aki mwakuri iai,+
25 ao ueea ma tooka ake a tekateka i aon ana kaintokanuea Tawita,+ a na bon rin naba rinanoni mataroan oon te kaawa aei, n toka i aon te kaa ni buaka ao i aoia aoti, ngaiia ma aia toka, mwaane aika tibun Iuta, ao kaain Ierutarem,+ ao e na kaainaki te kaawa aei n taai nako.
26 Ao a na roko aomata mani kaawa ake i Iuta, man taabo ake i rarikin Ierutarem, man abani Beniamin,+ man te aba ae aoraoi,+ man te aono ae maungaunga, ao man te Nekebo,* n uotii karea ni kabuekaki aika bwanin,+ taiani karea,+ te karea ae te amwarake,+ te ribano,* ao karea ni katituaraoi, nako nanon ana auti Iehova.+
27 “‘“Ma ngkana kam aki ongeaba irou ni kawakinan te bongi n Taabati ni katabua, ao n aki uotii uota ao ni karin rinanoni mataroan oon Ierutarem n te bongi n Taabati, ao N na kaurai mataroan oon neiei n te ai ao e na boni kabueki tauan Ierutarem+ aika nonoaki, ao e na aki tiringaki.”’”+
Taiani Kabwarabwara Mai Nano
^ Nora Nanon Taeka.
^ Ke tao, “Bwa kam kauraaki n uniu n aron te ai.”
^ Ke, “te aomata ae korakora.”
^ Ebera, “karekea te iriko bwa baina.”
^ Ke, “te aomata ae korakora.”
^ Ke, “mwamwanaa te aba.”
^ Ke tao, “aki kona ni kamarurungaki.”
^ Ke, “namakin aika rangi n raba.” Ebera, “kirine.”
^ Ke, “ma tiaki n te kaetitaeka ae riai.”
^ Ebera, “mairou,” n taraana e kaineti nakon Iehova.
^ Ke, “kamaunaia uoua te tai.”
^ Ebera, “a kamatoatoai roroaia.”
^ Ke, “maiaki.”
^ Nora Nanon Taeka.
