Ieremia 18:1-23
18 Aio te taeka ae roko iroun Ieremia mairoun Iehova:
2 “Teirake ao naako nakon ana auti te tia karaomwangko,+ ao N na kaongoraeko ikanne n au taeka.”
3 Mangaia are I ruo rikaaki nakon ana auti te tia karaomwangko, ao e tabe ni karaoa te mwangko.
4 Ma e uruaki i nanoni bain te tia karaomwangko te mwangko are e karaoia man te bokaboka, ngaia are e a manga karaoia te tia karaomwangko bwa te aeka ni bwai riki teuana, n aron ae e noria bwa e tau nako iai.*
5 Ao e roko ana taeka Iehova irou, ae kangai:
6 “‘Te koaua bwa I aki kona ni karaoa nakoimi ngkami aika tibun Iteraera, te bwai ae e karaoia te tia karaomwangko aei?’ bon ana taeka Iehova. ‘Noria! N aron te bokaboka i nanoni bain te tia karaomwangko, ao ai aromi naba ngkami aika tibun Iteraera, i nanoni baiu.+
7 N te tai are tao I taekina iai taekakini wakaan te natannaomata teuana ke te tautaeka n uea teuana, ma kabwakaana ao kamaunaana,+
8 ao te natannaomata ane I taetae n ekianako anne e a kitana naba buakakana, ao N na bita naba au iango* ni kaineti ma te kabuanibwai are I iangoia bwa N na karokoa n ekianako iai.+
9 Ma n te tai are I taekina iai katean te natannaomata teuana ke te tautaeka n uea teuana ao unikana,
10 ao e a karaoa naba ae buakaka i matau ao e aki ongo ni bwanaau, ao N na bita au iango* ni kaineti ma te bwai ae raoiroi are I iangoia bwa N na karaoia ibukina.’
11 “Ao kangai taiaoka nakoia mwaane aika tibun Iuta ao nakoia kaain Ierutarem, ‘E kangai ana taeka Iehova: “Akea bwa I a katauraoa* te kabuanibwai ma ni karioa te babaire teuana n ekingkami nako. Kam na rairaki taiaoka mani kawaimi aika bubuaka, ao kaetii kawaimi ma ami mwakuri.”’”+
12 Ma a taku: “E a kabwaranano!+ Bwa ti na nakonako n iririi oin ara iango, ao ti na karaoa ae kaineti ma imanonon nanora aika bubuaka, ngaira n tatabemanira nako.”+
13 Mangaia ae e kangai ana taeka Iehova:
“Titiraki i bon ibukimi taiaoka, i buakoia natannaomata.
Antai ae e a tia n ongo te aekaki aei?
E a tia te teinnaine ae te natannaomata ae Iteraera ni karaoa te bwai ae moan te buakaka.+
14 E a mauna te tino are i Rebanon are n taiani bwaa ake n rabeena?
Ke e na bwatakataka te ran ae mwaitoro are raanga mai kiraroa?
15 Ma a boni mwanuokinai au aomata.+
Bwa a angakarea* nakoni bwaai aika akea manenaia,+Ao a kabwakaia aomata ni kawaia, ake kawai ake ngkoangkoa,+Bwa a na nakonako ni kawai ake i buki ake a aki maran ao a aki aoraoi,*
16 Bwa a aonga ni karaoa abaia bwa te bwai ni kakamaaku+Ao te bwai ae e na katiitii te aba iai n aki toki.+
A na bane naake a rirarikina ni karekea taraana ma te maaku ao n ioioi atuia.+
17 N na kamaenakoia imwain te tia kairiribai n aron te angimainiku.
N na anga akuu nakoia ao tiaki moau, n aia bong ni kabuanibwai.”+
18 Ao a taku: “Nakomai bwa ti na karioa ara babaire n ekaanako Ieremia,+ bwa e na aki maunanako te tua* mairouia ara ibonga,* ke te reirei ni kairiri mairouia mwaane aika wanawana, ke te taeka mairouia burabeti. Nakomai bwa ti na taetae ni kaitaraa,* ao ti na aki mutiakina te bwai ae e taekinna.”
19 Ko na mutiakinai ngkoe ae Iehova,Ao kakauongo nakon te bwai ae a taekinna taani kaitaraai.
20 E na kabooaki mwin te raoiroi n te buakaka?
Bwa a a tia ni kena te mwarua ibukini maiuu.*+
Uringa arou ngke I tei i matam n taekina te bwai ae raoiroi ibukia,N rairaanako unim mairouia.
21 Mangaia ae ko na anga natiia nakon te rongo,Ao ko na anga ngaiia nakoni korakoran te kabaang.+
Ke a riki buuia bwa aine aika anaaki natiia ao aine aika a a tia ni mate buuia.+
Ke a tiringaki aia rorobuaka n te aoraki ae kamamate,Ao ke a tiringaki aia rorobuaka n ataei n te kabaang n te buaka.+
22 Ke e ongoraeaki te tang man aia auti nako,Ngkana ko rina ni kairiia taani kuribwai nakoia.
Bwa a a tia ni kena te mwarua bwa a na kamwaneai iaiAo a kawenei bwaai ni kamwane imwaini waeu.+
23 Ma ngkoe ae Iehova,Ko bane n atai raoi aia babaire n ekainako bwa a na tiringai.+
Tai rabun aia kairua,Ao tai kamaunai aia bure mai matam.
Ke a tatanako i matam+Ngkana ko a ekiianako n unim.+
Taiani Kabwarabwara Mai Nano
^ Ebera, “n aron ae e riai i matan te tia karaomwangko bwa e na karaoia.”
^ Ke, “uringaaba.”
^ Ke, “uringaaba.”
^ Ebera, “karaoa.”
^ Ke, “aki karaoaki.”
^ Ke, “kabueki karea ni kabubui.”
^ Ebera, “orea teuaei n te newe.”
^ Nora Nanon Taeka.
^ Ke, “kaetieti.”
^ Ebera, ne’phesh, nora Nanon Taeka.
