Ieremia 2:1-37
2 Ao e roko ana taeka Iehova irou, ae kangai:
2 “Naako ao katanoataa ae kangai bwa e na ongo Ierutarem, ‘E kangai ana taeka Iehova:
“I uringa raoi am kakaonimaki* ngke ko roro n rikirake,+Ao te tangira are ko kaotia ngke ko kabaeaki bwa ko na mare,+Ao arom n irirai n te rereuaN te aba ae tuai n unikaki iai te koraa.+
3 E itiaki* Iteraera iroun Iehova,+ ae te moan uaa man ana uaa aika taiaki.”’
‘A na reke n te bure akana kabwauta teuaei.
E na roko te kabuanibwai i aoia,’ bon ana taeka Iehova.”+
4 Ongora n ana taeka Iehova ngkami aika tibun Iakoba,Ao ngkami utu ni kabane aika tibun Iteraera.
5 E kangai ana taeka Iehova:
“Tera au bure ae reke irouia ami bakatibu,+Ngkai a a tiotionako n rangi ni kararoaia mairou,Ao a ririmwini bouannanti aika akea manenaia+ ao a a riki naba n akea manenaia?+
6 A aki titiraki ni kangai, ‘E nga IehovaAre Teuare kairira ni kaotinakoira man te aba are Aikubita,+Are e kairira rinanon te rereua,Rinanon te aba ae rereua+ ao ni mwaruarua,Rinanon te aba ae mwautakataka+ ao e mena iai te rotongitong ae korakora,Rinanon te aba ae akea te aomata ae mwamwananga iaiAo akea aomata aika maekanna?’
7 I kairingkami ngkanne nakon te aba ae a unikaki iai kainnamwarake,Bwa kam na kang uaaia ao baika raraoi ake iai.+
Ma kam roko iai ao kam kamwaraea abau.
Kam karaoa tibwangau bwa te bwai ae riribaaki.+
8 A aki titiraki ni kangai ibonga,* ‘E nga Iehova?’+
A aki ataai te koraki ake a tabe ma te Tua,A karitei nakoiu taani kawakintiibu,+A taetae ni burabeti irouni Baara taiani burabeti,+Ao a iriia ake a aki kona ni karekea te kabwaia.
9 ‘Mangaia ae N na kauntaeka riki ma ngkami,’+ bon ana taeka Iehova,‘Ao N na kauntaeka ma natiia natimi.’
10 ‘Ma mwananga nakon aaba ake i rarikin taari* i Kitim+ ao noria.
Eng, kanaanako nako Keta+ ao iangoia raoi.
Noria ngkana e a tia n riki te aekaki aei ke e tuai.
11 E a tia te natannaomata teuana ni bitii atuana nakon aika bon tiaki atua?
Ma a a tia au aomata ni kaaibibita mimitongiu ma te bwai ae akea manenana.+
12 Taraa te baei ma te miroaroa, ngkoe ae karawa,Ao rurubenebene ni maakunrang,’ bon ana taeka Iehova,
13 ‘Ibukina bwa a karaoi baika uoua aika buakaka au aomata:
A kitanai ngai ae nibwan te ran ni kamaiu,Ao a keni* aia mwarua n ran,+Aika mwarua n ran aika uruaki aika aki kona n taua te ran.’
14 ‘Te koaua bwa te toro Iteraera, ke te kaaunga ae bungiaki n te mwenga?
E aera ngkanne ngkai e a kanakoaki nakon te kuribwaiaki?
15 A bekorara nakoina raian aika ataei,+Ao a kanenei bwanaaia.
A karaoa aban teuaei bwa te bwai ni kakamaaku.
Ao a kabuekaki ana kaawa n te aro are ai akea kaaia.
16 A amwamwarake kaain Nobi*+ ao Taabaneti+ i aon taubukin atum.
17 Tiaki ko boni karokoa te baei i aomNgke ko kitana Iehova ae Atuam,+Ngke e tabe ni kaiririko n te kawai?
18 E aera ngkanne ngkai ko tangira te kawai nako Aikubita+Bwa ko na nima ranin Tiiora?*
E aera ngkai ko tangira te kawai nako Aturia+Bwa ko na nima ranin te Karaanga?*
19 E na kaetiko buakakam,Ao e na boaiko am aki kakaonimaki.
Ko na nora ao n ataa buakakan ao kananokawakini+Kitanakin Iehova ae Atuam.
Ko aki kaota maakakiu,’+ bon ana taeka te Uea ae Moan te Rietata ae Iehova ae Atuaia taanga ni buaka.*
20 ‘Bwa I ototea amom ngkoangkoa,+Ao I motiki taurekerekem.
Ma ko taku: “N na aki beku,”Bwa ko wene n aroriko ni kakabooaki ibukin te wene ni bure,+I aon tabuki nako ao i aan nako kaai aika manguroro.+
21 I unikiko bwa te kai ae te kureebe ae uraura+ ae rangi n raoiroi, ae bon te koraa ni koaua,Ko a kangaa ngkanne ni bitaki n riki bwa taiani bwebwe aika rikirake ni buakaka aika bwebwen te kai ae te kureebe ae ianena, i matau?’+
22 ‘E ngae ngke ko kaitiakiko n te taoro* ao ni kabongana te tobu* ae bati,Ma e na teimatoa am bure n riki bwa te memea i matau,’+ bon ana taeka te Uea ae Moan te Rietata ae Iehova.
23 Ko kangaa ni kangai, ‘I aki kamwaraeai.
I aki ririmwia taiani Baara’?
Nora kawaim ane n te mwarua.
Iangoa te bwai ae ko a tia ni karaoia.
Kaanga te kamero aine ae ataei ngkoe ae birimwaaka,Ae bibiribiri n aki akaka ni kawaina nako,
24 Ao te taongki ae moaanti ae taneiai n te rereuaAe e kaaneneboia te ang n ana tai ni kaibwabwaru.
Antai ae kona n tukia ngkana e a roko kan ieinna?
Akea i buakoia te koraki ake a ukoukoria ae a na kakuaia i bon irouia,Bwa e na bon reke irouia ngkana e a roko ana tai.*
25 Kawakina waem bwa e na aki nakonako n akea nangoana,Ao buuam man te bwatakataka.
Ma ko taku: ‘E a kabwaranano!+
Tiaki ngaia anne! I a bwaka n tangiriia ianena,*+Ao N nang ririmwia.’+
26 N aroni maamaan te tia iraa ngkana e reke,Ao ai aroia naba tibun Iteraera bwa a a tia ni kamaamaeaki,Ngaiia ma aia uea ao aia toka,Ao aia ibonga ma aia burabeti.+
27 A taku nakon te aroka ‘Bon tamau ngkoe,’+Ao nakon te atibu, ‘Ko bungiai.’
Ma a anga akuia nakoiu ao tiaki moaia.+
Ao n aia tai ni kabuanibwai ao a na kangai,‘Teirake ao kamaiuira!’+
28 A nga atuam ake ko karaoi i bon ibukim?+
Ke a teirake ngkana a kona ni kamaiuko n am tai ni kabuanibwai,Bwa a a rangi ni bati atuam n aroni mwaitin am kaawa, ngkoe ae Iuta.+
29 ‘E aera ngkai kam teimatoa ni kauntaeka ma ngai?
E aera ngkai kam bane ni karitei nakoiu?’+ bon ana taeka Iehova.
30 I a tia n oreiia natimi mwaane ma e matebuaka.+
A aki butimwaea te reirei ni kaetieti.+
A kabwautiia ami burabeti oin ami kabaang,+N aron te raian ae ririaki ni kuribwai.
31 Te roro aei, kam na iangoa ana taeka Iehova.
I a riki bwa kaanga te rereua nakon Iteraera,Ke te aba ae korakora te rotongitong iai?
E aera ngkai a kangai naakai, aika au aomata, ‘Ti ririaki n akea tutukara.
Ti na aki manga kawariko’?+
32 E kona te aine ae tuai ni boo ma te mwaane ni mwaninga ana bwai ni katamaroa,Ao te tia mare te aine kabaean nukana?*
Ma a boni mwaninga taekau au aomata i nanoni boong aika aki kona ni warekaki.+
33 Ai rabakaura ngkoe ae te aine, ko katauraoa kawaim bwa ko na ukoukora te tangira!
Ko a tia ni kataneiako ni kawain nako te buakaka.+
34 A memea naba ririm n raraaia aomata aika akea aia bure, aika aomata* aika maiu ni kainnano.+
A aki tiringaki ibukina bwa a ninia te auti,Ma I kunei mwin raraaia i aon ririm ni kabane.+
35 Ma ko kangai, ‘Akea au bure.
E a bon rairakinako unna mairou.’
Ae I a karokoa ngkai motikan taekam,Ibukina bwa ko kangai, ‘I aki bure.’
36 E aera ngkai te bwai ae bebete iroum kawaim ae bibitaki?
Ane ko na maamaa naba iroun Aikubita,+N aron are ko maamaa iroun Aturia.+
37 Ibukin anne naba ao ko na otinako ma baim i aon atum,+Bwa e rawa Iehova irouia te koraki ake ko onimakinia.
A na aki kanakoraoa arom.”
Taiani Kabwarabwara Mai Nano
^ Ke, “tangira ae kona n onimakinaki.”
^ Ke, “tabu.”
^ Nora Nanon Taeka.
^ Ke, “abamwakoro.”
^ Ke, “ekei,” n taraana man te bwaa.
^ Ke, “Membiti.”
^ Ae taekani mwaangan te Karaanga ae te Naire.
^ Ae taekan te Iuberetiti.
^ Ke, “Tabaota.” Nora Nanon Taeka.
^ Te taeka n te taetae n Ebera ikai e kaineti nakon te kemikoro ae arana te soda.
^ Ae te aeka n tobu ae karaoaki man te mannang.
^ Ebera, “ana namwakaina.”
^ Ke, “atua aika ianena.”
^ Te bwai ni katamaroa ae te kabaea n nuka ae bwabwainaki n te bong ni mare.
^ Ebera, ne’phesh, nora Nanon Taeka.
