Ieremia 20:1-18
20 Ngke e taetae ni burabetini baikai Ieremia ao e ongora Batiura ae natin Immera, ae te ibonga* ao te mataniwi naba ae te tia kairiri n ana auti Iehova.
2 Ao Batiura e orea Ieremia are te burabeti ao e kaaki teuaei i nanon te bwai ni kabaewae+ are mena n te Mataroa ae Beniamin are Mai Eta, are n ana auti Iehova.
3 Ma n te bong are imwina ngke e a kainaomataaki Ieremia irouni Batiura man te bwai ni kabaewae, ao e taku Ieremia nakon teuaei:
“E a aki araniko Iehova bwa Batiura ma e a araniko bwa Te Maakunrang n Taabo Nako.*+
4 Bwa e kangai ana taeka Iehova, ‘N na karikiko bwa te bwai ni kakamaaku bon nakoim ao nakoia raoraom ni kabane, ao a na bwaka n aia kabaang aiaia ngke ko tabe ni mataku,+ ao N na anga kaain Iuta ni kabane nako nanoni bain ueani Baburon, ao e na kairiianako bwa taenikai i Baburon, ao e na kamateia n te kabaang.+
5 Ao N na anga kaubwain te kaawa aei ni kabane, bwaina ni kabane, ao bwaina aika rangi ni kakawaki ni kabane, ao kaubwaia ni kabane uean Iuta, nako nanoni baia aiaia.+ Ao a na kuribwaiia ao a na tauia naakai ao ni kairiia nako Baburon.+
6 Ao ni kaineti ma ngkoe ae Batiura, ao aomata nako ake a maeka n am auti, kam na kairakinako bwa taenikai. Ko na nako Baburon ao ko na mate ikekei, ao ko na kaiiaki naba ikekei ma raoraom ni kabane, ibukina bwa ko taetae ni burabetini keewe nakoia.’”+
7 Ko kamwaneai ngkoe ae Iehova, ao I a mwane.
Ko kabongana korakoram ni kaitaraai iai, ao ko tokanikai.+
I a riki bwa te bwai ni ngareakinaki ni kabongnga.
A a bane te koraki ni bwainingareai.+
8 Bwa n te tai are I taetae iai ao N na bae n takarua ao ni kangai,“Te iowawa ma te kamaunanakoaki!”
Irou e a riki ana taeka Iehova bwa ai kauekean te un ma te kakaniko ni kabongnga.+
9 Mangaia are I taku: “I a aki manga taekinna,Ao N nang aki manga taetae n arana.”+
Ma e a riki i nanou bwa ai aron te ai ae ura ae kainaki i nanon riiu,Ao I a kua n tautauaMa I a bon aki kona.+
10 Bwa I ongo rongorongo aika buakaka aika mwaitiAo e a otabwaniniai te maakunrang.+
“Kabuakakaa teuaei, ti na kabuakakaa!”
A bane aomata ake aongkoa a raoi ma ngai n tarataraa bwakau+ ao a kangai:
“Tao ane e na karaoa te kairua ae nanobaba,Ao ti na tokanikai ao ti na kaoka kaira n ekianako.”
11 Ma e memena Iehova irou n ai aron te tia buaka ae kakamaaku.+
Anne bukina ae a na bwaka iai te koraki aika bwainikirinai ao a na aki tokanikai.+
A na rangi ni kamaamaeaki bwa e na aki nakoraoi aia waaki.
E na aki mwanuokinaki bwaibwainrangia ae akea tokina.+
12 Ma ngkoe ae Iehova ae Atuaia taanga ni buaka,* ae ko nenera te aomata ae raoiroi,Ko nori iango aika raba* ao te nano.+
Kariaia bwa N na nora am karekekai i aoia,+Bwa I a tia n anganiko au tangitang.+
13 Anene nakon Iehova! Karaoiroa Iehova!
Bwa e kamaiua ane e maiu ni kainnano mai nanoni baia taani kakaraoa ae buakaka.
14 Ke e reke kain te bong are I bungiaki iai!
E bia aki kakabwaiaaki te bong are e bungiai iai tinau!+
15 Ke e reke kain te aomata are uota te rongorongo ae kakukurei nakon tamau, ni kangai:
“E a bungiaki natim te mwaane!”
Ni kakorakoraa kimwareireina iai.
16 E bia riki te aomata anne bwa kaanga taiani kaawa ake e kamaunai Iehova n akea uringaabana iai.
E bia ongo te aomata anne te tang n te moaningabong ao karongoaan te buaka* n te tawanou.
17 E aera ngke e aki tiringai i nanon te biroto,Bwa e aonga n riki tinau bwa nneu ni kaiiakiAo e na teimatoa ni bikoukou birotona?+
18 E aera ngkai I riai n otinako man te birotoBwa N na nora te kangaanga ma te rawawata,Bwa N na kabanei au bong i buakon te kamaamaeaki?+
Taiani Kabwarabwara Mai Nano
^ Nora Nanon Taeka.
^ Ke, “Makoramitabiba.”
^ Ke, “Tabaota.” Nora Nanon Taeka.
^ Ke, “namakin aika rangi n raba.” Ebera, “kirine.”
^ Ke tao, “karongoaan takaruaean te buaka.”
