Ieremia 21:1-14
21 E roko ana taeka Iehova iroun Ieremia ngke e tia te Uea ae Tetekia+ ni kanakoia nakon teuaei, Batiura+ ae natini Marekiia ao Tebania+ ae natini Maateia, are te ibonga,* bwa a na bubutii ni kangai:
2 “Taiaoka ma titirakina Iehova ibukira, ibukina bwa e a buakanira Nebukaneta* are Ueani Baburon.+ Tao e na karaoa te mwakuri teuana Iehova ibukira mai buakon ana mwakuri aika kamimi, bwa e aonga ni kitanira teuaei.”+
3 E taku Ieremia nakoia: “Kam riai ni kangai nakon Tetekia,
4 ‘E kangai ana taeka Iehova ae Atuan Iteraera: “Noria ae I a rairi ni kaoki nakoimi bwaai ni buaka ake i nanoni baimi, ake kam buakana iai ueani Baburon+ ao I-Kareria ake a mena i tinanikun te oo n otabwaniningkami. Ao N na ikotii nako nukan te kaawa aei.
5 Ao boni ngai ae N na buakaningkami+ n te bai ae aroraki ao n te bai ae korakora, ma te bononnano ao te marakinnano ao te un ae korakora.+
6 N na oreiia kaain te kaawa aei, aika aomata ma maan. Ao a na mate n te aoraki ae rangi ni kamamate.”’+
7 “‘“Ao imwin anne,” bon ana taeka Iehova, “N na anga Tetekia ae Uean Iuta ma ana toro ao aomata aika n te kaawa aei, ake te koraki ake a reke maiuia man te aoraki ae kamamate, te kabaang, ao te rongo, nako nanoni bain Nebukaneta* are Ueani Baburon, ao nako nanoni baia aiaia, ao nako nanoni baia te koraki ake a ukoukora anaakini maiuia.*+ E na oreiia n te kabaang. E na aki nanokawaki ibukia, ke ni kaota te atataiaomata nakoia ke n nanoangaiia.”’+
8 “Ao ko riai ni kangai nakoia aomata aikai, ‘E kangai ana taeka Iehova: “Noria ae I a kaaki i matami te kawai nakon te maiu ao te kawai nakon te mate.
9 A na boni mate n te kabaang, n te rongo, ao n te aoraki ae kamamate, te koraki ake a tiku n te kaawa aei. Ma e na teimatoa ni maiu ane e otinako ao n taenikai nakoia I-Kareria ake a otabwaniningkami, ao e na reke maiuna* bwa konana.”’*+
10 “‘“Bwa I kaeta matau n ekaanako te kaawa aei n te kabuanibwai ao tiaki n te bwai ae raoiroi,”+ bon ana taeka Iehova. “E na anga te aba nako nanoni bain ueani Baburon,+ ao e na kabuekia n te ai.”+
11 “‘Kangai nakoia kaaini batan uean Iuta: Ongora n ana taeka Iehova.
12 Ngkami aika kaaini batan Tawita, e kangai ana taeka Iehova:
“Kateimatoa te kaetitaeka ae riai ni katoa ingabong,Ao kamaiua ane e kuribwaiaki mai nanoni bain te tia babakanikawai,+Bwa e aonga n aki urarake uniu n aron te ai,+Ao n ura ao akea ae e kona n tiringnga,Ibukin ami mwakuri aika bubuaka.”’+
13 ‘Noria ae I a ekikonako, ngkoe ae kaain te mwarua,*Ngkoe ae te bwaa n te aba ae aoraoi,’ bon ana taeka Iehova.
‘Ni kaineti ngkanne ma ngkami aika kam kangai: “Antai ae e na ruo n ekiranako?
Ao antai ae e na nini ara tabo ni maeka?”
14 N na kaetii taekamiNi kaineti ma ae bon riai n reke man ami mwakuri,’+ bon ana taeka Iehova.
‘Ao N na kaurarakea buakonikain neiei,Ao e na kabueki bwaai ni kabane ake i rarikina.’”+
Taiani Kabwarabwara Mai Nano
^ Nora Nanon Taeka.
^ Ebera, “Nebukareta,” aroni koreana teuana.
^ Ebera, “Nebukareta,” aroni koreana teuana.
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ke, “e na rabanako ma maiuna.”
^ Ke, “te tabo ae aoraoi ae mena n te mwarua.”