Ieremia 22:1-30
22 E kangai ana taeka Iehova: “Naako ruuo nakon ana auti* uean Iuta ao nikira te rongorongo aei.
2 Ko riai ni kangai, ‘Ongora n ana taeka Iehova, ngkoe ae uean Iuta ae tekateka i aon ana kaintokanuea Tawita, ngkoe ma am toro nako ao am aomata, ake te koraki ake a riirin ni mataroan te oo aikai.
3 E kangai ana taeka Iehova: “Kateimatoa te kaetitaeka ae riai ao te raoiroi. Kamaiua ane e kuribwaiaki mai nanoni bain te tia babakanikawai. Tai bwainikirina te aomata ae maeka n iruwa, ao tai kaikoaka te teei ae akea tamana* ke te aine ae e a tia ni mate buuna.+ Ao tai katutua raraan te aomata ae akea ana bure n te tabo aei.+
4 Bwa ngkana kam taratara raoi ni kakororaoa te taeka aei, ao ueea ake a tekateka i aon ana kaintokanuea Tawita,+ a na bon rin rinanoni mataroan oon te auti aei, n toka i aoni kaa ni buaka ao i aoia aoti, ngaiia ma aia toro ao aia aomata.”’+
5 “‘Ma ngkana kam aki ongeaba nakon taeka aikai, ao I taetae n tuea i bon irou,’ bon ana taeka Iehova, ‘bwa e na riki te auti aei bwa te tabo ae uruaki.’+
6 “Bwa e kangai ana taeka Iehova ni kaineti ma ana auti uean Iuta,‘Ko a riki bwa kaanga Kireata irou,N aron taubukin Rebanon.
Ma N na karaoiko bwa te rereua.
Akea teuana mai buakon am kaawa ae e na maekanaki.+
7 Ao N na kateirakeia* taan urubwai bwa a na ekikonako,Temanna ma temanna ma ana bwai ni buaka.+
A na korei am kai aika tiira ake taiani kabanea n tamaroaAo ni kabwakai nako nanon te ai.+
8 “‘Ao a na rirarikin te kaawa aei natannaomata aika bati ao a na kangai i marenaia: “Bukin tera ngkai e karaoa aei Iehova nakon te kaawa ae kakannato aei?”+
9 Ao a na kaeka ni kangai: “Ibukina bwa a kitana ana berita Iehova ae Atuaia ao a bobaraaki nakoia atua riki tabeman ma n toro irouia.”’+
10 Tai tang ibukin ane e mate,Ao tai kaota nanoangaana.
Ma ko na tang ni korakai ibukin ane e nako,Bwa e na aki manga oki n nora te aba are e bungiaki iai.
11 “Bwa e kangai ana taeka Iehova ni kaineti ma Tiarum*+ are natin Iotia, are uean Iuta, are e tautaeka n onea mwin tamana are Iotia,+ ao are e a tia n nako man te tabo aei: ‘E na aki manga okira ikanne.
12 Bwa e na mate n te tabo are a kairia nako iai bwa te taenikai, ao e na aki manga nora te aba aei.’+
13 Ke e reke kain te aomata ae katea ana auti n te aro ae aki riai,Ao ana ruu ake i eta n te babakanikawai,Ae e kammwakura raona n aomata n aki kabooa,Ae e rawa ni kabwakaa boona,+
14 Are teuare kangai, ‘N na katea au auti ae mwaawaMa ruuna ake i eta aika bubura nanoia.
N na karaoi kamaamana,Ao N na kanimwi iai kaai aika tiira, ao ni beenia n te uraura.’
15 Ko na teimatoa n uea ngkai ko kabatiaa riki kabonganaan te kai ae te tiira nakoia tabemwaang?
E amwarake naba tamam ao e moi,Ma e kateimatoa te kaetitaeka ae riai ma te raoiroi,+Ao e nakoraoi arona iai.
16 E tei ibukin ana tangitang ane e karawawataaki ao ane e maiu ni kainnano,N te aro are e a nakoraoi.
‘Tiaki ngaia anne ae e nanonaki n ataakiu?’ bon ana taeka Iehova.
17 ‘Ma a mena matam ma nanom tii i aon am karekemwane n te babakanikawai,I aoni katutuan raraaia aomata aika akea aia bure,Ao i aoni karaoan te babakanikawai ma te aonikai ni kuribwai.’
18 “Mangaia ae e kangai ana taeka Iehova ni kaineti ma Ieoiakim+ are natin Iotia, are uean Iuta,‘A na aki tanginiweneia ni kangai:
“Akea ngai, tariu! Akea ngai mwaaneu!”
A na aki tanginiweneia ni kangai:
“Akea ngai ngkoe ae au toka! Akea ngai ngkoe ae ko karineaki!”
19 E na kaiiaki n aroni kaiiakin te taongki,+N uaakinaki ao n tewenakoakiNako tinanikuni mataroan oon Ierutarem.’+
20 Waerake nako Rebanon ao takarua n tang,Kanenea bwanaam i Batian,Ao takarua n tang mai Abarim,+Bwa a a bane ni kamaunaaki naake am tangira ake a korakora aia kaibwabwaru.+
21 I taetae nakoim ngke ko namakina te mweraoi.
Ma ko taku, ‘N na aki ongeaba.’+
Ai bon aroarom naba aei mangke ko roro n rikirake,Bwa ko aki ongo ni bwanaau.+
22 E na ukiianako am tia kawakintiibu ni kabane te ang,*+Ao a na kairakinako bwa taenikai naake am tangira ake a korakora aia kaibwabwaru.
Ao ane ko na kamaamaeaki ma ni kabwainrangaki ibukini kabuanibwai ni kabane ake a na bwakariko.
23 Ngkoe ae ko maeka i Rebanon,+Ae ko katei ngaom i buakoni kaai aika tiira,+Ko a ngirangira kangaa ngkana e a roko te maraki i aom,Ae te maraki* ae ai aroni marakin te aine ae bung!”+
24 “‘Ngkai bon iai ngai,’ bon ana taeka Iehova, ‘ao e ngae ngke bon te mwamwa ae te bwai ni kanikina i baiu ae te atai Konia*+ ae natin Ieoiakim+ ae uean Iuta, ma N na boni buutiko ni kanakoko mai iai!
25 N na anga ngkoe nako nanoni baia te koraki ake a ukoukora anaakini maium,* nako nanoni baia te koraki ake ko maakuia, nako nanoni bain Nebukaneta* ae Ueani Baburon, ao nako nanoni baia I-Kareria.+
26 Ao N na tewenakoko ma tinam are bungiko, nakon te aba riki teuana ae kam aki bungiaki iai, ao kam na mate ikanne.
27 Ao a na bon aki okira te aba are a ingainga nako iai.+
28 Te koaua bwa te mwaane ae Konia bon tii te bwaata ae riribaaki ae uruaki,Ae te bwai ae ai akea ae e tangiria?
E aera ngkai e karenakoaki ma kanoanaAo n tewenakoaki nakon te aba ae a aki ataia?’+
29 Ngkoe ae te aonnaba,* te aonnaba, te aonnaba, ko na ongora n ana taeka Iehova.
30 E kangai ana taeka Iehova:
‘Kam na korea taekan te mwaane aei bwa akea natina,Bwa te mwaane ae e na aki nakoraoi arona n ana tai ni maiu,*Bwa akea i buakoia kanoana ae e na nakoraoi aronaN tekateka i aon ana kaintokanuea Tawita ao ni manga tautaeka i Iuta.’”+
Taiani Kabwarabwara Mai Nano
^ Ke, “baareti.”
^ Ke, “te teei ae a a tia ni mate ana karo.”
^ Ebera, “katabuia.”
^ E aranaki naba bwa Ieoaatia.
^ Ebera, “E na kawakinia am tia kawakintiibu ni kabane te ang.”
^ Ebera, “te ariri.”
^ E aranaki naba bwa Ieoiakin ao Iekonia.
^ Ebera, ne’phesh, nora Nanon Taeka.
^ Ebera, “Nebukareta,” aroni koreana teuana.
^ Ke, “te aba.”
^ Ebera, “ana bong.”
