Ieremia 23:1-40
23 “A na reke kaia taani kawakintiibu aika kamaunaia ao ni kamaenakoia tiibun au tawaana!” bon ana taeka Iehova.+
2 Mangaia ae e kangai ana taeka Iehova ae Atuan Iteraera n ekiianako taani kawakintiibu aika kawakinia au aomata: “Kam kamaenakoia au tiibu, ao kam teimatoa ni kamaeinikunia, ao kam aki mutiakinia.”+
“Mangaia ae N na katuuaaeingkami ibukin ami mwakuri aika bubuaka,” bon ana taeka Iehova.
3 “Ao N na ikotiia nikiraia au tiibu man aaba nako ake I kamaeinikunia nako iai,+ ao N na kaokiia nakon aia tawaana,+ ao a na kabatiaia aia kariki ma ni kamwaitiia.+
4 Ao N na kateirakeia taani kawakintiibu i aoia aika a na boni kawakinia raoi.+ A na aki manga maaku ke ni maakunrang, ao akea ae e na bua,” bon ana taeka Iehova.
5 “Noria! A a roko boong,” bon ana taeka Iehova, “ae N na kateirakea iai te bwebwe* ae raoiroi man ana kariki Tawita.+ Ao e na tautaeka te uea+ ao e na kaota te ataibwai, ma ni kateimatoa te kaetitaeka ae riai ma te raoiroi n te aba.+
6 E na kamaiuaki Iuta n ana bong,+ ao e na maeka Iteraera ma te mweraoi.+ Ao aio te ara ae e na aranaki iai: Iehova Bon Ara Raoiroi.”+
7 “Ma a a roko boong,” bon ana taeka Iehova, “ae a nang aki iai manga kangai, ‘Ngkai bon iai Iehova, are e kairiia tibun Iteraera ni kaotinakoia man te aba are Aikubita!’+
8 ma a nang kangai: ‘Ngkai bon iai Iehova, are e kairiia kanoaia tibun Iteraera ni kaotinakoia, ao ni kairiia n oki man te aba are i meang ao man aaba ni kabane ake e kamaenakoia nako iai,’ ao a na maeka n oin abaia.”+
9 Ni kaineti ngkanne ma burabeti:
E a uruaki nanou i nanou.
A a ruru riiu ni kabane.
Kaanga ai aron te mwaane ngai ae koro ni manging,Ao ai aron te mwaane ae taonakinako n te wain,
Ibukin Iehova ao ibukin ana taeka aika tabu.
10 Bwa e a onrake te aba irouia taani wene ni kimoa.+
E tanginiwenei te aba anne ibukini karekeani kaina,+Ao a a mwautakataka tawaana ake n te rereua.+
A bubuaka kawaia, ao a kabongana buaka mwaakaia.
11 “A uaia ni kabarekaaki* te burabeti ao te ibonga.*+
I kunea naba buakakaia i nanon au auti,”+ bon ana taeka Iehova.
12 “Mangaia ae e na roo kawaia+ ao ni maranran.
A na kebutuaki ao a na bwaka.
Bwa N na karokoa te kabuanibwai i aoiaN te ririki ni katuuaa,” bon ana taeka Iehova.
13 “Ao I nora te bwai ae koro n ribaaki irouia burabeti ake i Tamaria.+
A ueke aia taetae ni burabeti mairouni Baara,Ao a katiotionakoia au aomata aika tibun Iteraera.
14 I nori baika rangi ni buakaka irouia burabeti ake i Ierutarem.
A wewene ni kimoa+ ma n tataekini keewe,+A kaungaia* taani kakaraoa ae buakaka,Ao a aki rairakinako mani buakakaia.
Irou titeboo ngaiia ni kabane ma Totom,+Ao titeboo kaaina ma Komora.”+
15 Mangaia ae e kangai ana taeka Iehova ae Atuaia taanga ni buaka* n ekiianako burabeti:
“Noria ae I a kaamwarakeia n te kai ae mao,Ao n angania te ran ae boitin bwa a na nimma.+
Bwa e butanako ni kabutaa te aba te tannako man te koaua, mairouia burabeti ake i Ierutarem.”
16 E kangai ana taeka Iehova ae Atuaia taanga ni buaka:
“Tai ongo n aia taeka burabeti ake a taetae ni burabeti nakoimi.+
A mwamwanaingkami,*Ao te miitara are a taekinna e bon nako mai nanoia,+Ao tiaki mai win Iehova.+
17 A okioki ni kangai nakoia te koraki ake a aki karineai,‘E taku Iehova: “Ane kam na rau.”’+
Ao a kangai nakoia te koraki nako ake a bon iririi imanonon nanoia,‘Akea te kabuanibwai ae e na roko i aomi.’+
18 Bwa antai ae e a tia n tei i buakoia te koraki aika kaan ma Iehova,Bwa e na nora ao n ongora n ana taeka?
Antai ae e a tia ni mutiakina ana taeka bwa e aonga n ongora iai?
19 Noria! E na otinako ana angibuaka Iehova ma te un ae korakora.
E na uka aon atuia akana buakaka n aron te ukeukennanti.+
20 E na aki rairakinako unin IehovaNi karokoa ae e tia ni karaoi ao ni kakororaoi baike e kani karaoi nanona.
Ane kam na ota raoi n te baei ni kabaneani boong.
21 I aki kanakoia burabeti, ma a boni biribiri naba.
I aki taetae nakoia, ma a bon taetae ni burabeti naba.+
22 Ma ngke arona bwa a tei i buakoia te koraki aika kaan ma ngai,Ao a na kamani kaongoia au aomata au taeka,Ao a na kamani kaokiia mani kawaia ae buakaka ao aia mwakuri aika bubuaka.”+
23 “Te koaua bwa tii te Atua ngai ae kaan,” bon ana taeka Iehova, “ao tiaki te Atua naba man te tabo ae raroanako?”
24 “E kona te aomata temanna ni karabaa n te tabo ae raba ike I aki kona n noria iai?”+ bon ana taeka Iehova.
“Tiaki I boni kaona karawa ma te aonnaba?”+ bon ana taeka Iehova.
25 “I ongo bwa a kangai burabeti ake a taetae ni burabeti ni kewe n arau, ‘I mii! I mii!’+
26 E na maanra ni mena te baei i nanoia burabeti, bwa a na taetae ni burabetini keewe? Boni burabeti ni mwamwanaa te aba ngaiia n oin nanoia.+
27 A iangoia bwa a na kairiia au aomata bwa a na mwanuokina arau n taiani mii ake a taekin i marenaia, n aroia tamaia ake a mwanuokina arau ibukini Baara.+
28 Ke e karakina te mii te burabeti ane mii, ma e riai n taekina au taeka ma te koaua te aomata ane iai irouna au taeka.”
“Tera ae a titeboo iai te uteute ae mwau ma te uita?”* bon ana taeka Iehova.
29 “Tiaki titeboo au taeka ma te ai,”+ bon ana taeka Iehova, “ao titeboo ma te aama ae katabwenaa te bwaa?”+
30 “Mangaia ae akea bwa I a ekiianako burabeti,” bon ana taeka Iehova, “aika kabwaouai au taeka bwa a aonga n taekini baike a bon taku nakoia aomata.”+
31 “Akea bwa I a ekiianako burabeti,” bon ana taeka Iehova, “ake te koraki ake a kabonganai neweia ni kangai, ‘E kangai ana taeka!’”+
32 “Akea bwa I a ekiianako burabeti aika taekini mii aika kewe,” bon ana taeka Iehova, “ake a karakini ao ni katiotionakoia au aomata ibukin aia kewe ao aia taetae ni kamoamoa.”+
“Ma I bon aki kanakoia ke n tua nakoia. Mangaia ae a na bon aki karekei naba teutana kakabwaiaaia aomata aikai,”+ bon ana taeka Iehova.
33 “Ao ngkana a titirakiniko aomata aikai ke te burabeti ke te ibonga, ni kangai, ‘Tera te uota ae rawawata* iroun Iehova?’ ao ko riai ni kaekaia ni kangai, ‘“Bon te uota ae rawawata ngkami! Ao N na tewenakoingkami,”+ bon ana taeka Iehova.’
34 Ao ni kaineti ma te burabeti ke te ibonga ke aomata aika kangai, ‘Aio te uota ae rawawata* iroun Iehova!’ N na boni katuuaaea te aomata anne ma kaaini batana.
35 Aio te bwai ae kam taekinna n tatabemaningkami nako nakoia raomi ao nakoia tarimi, ‘Tera ana kaeka Iehova? Ao tera ae e taekinna Iehova?’
36 Ma kam aki riai ni manga taekina te uota ae rawawata* iroun Iehova, bwa te uota ae rawawata* bon ana taeka temanna ma temanna, ao kam a tia ni bitii ana taeka te Atua ae maiu ae Iehova ae Atuaia taanga ni buaka, ae Atuara.
37 “Ko na taekina ae kangai nakon te burabeti, ‘Tera ana kaeka Iehova nakoim? Ao tera ae e taekinna Iehova?
38 Ao ngkana kam teimatoa ni kangai, “Te uota ae rawawata* iroun Iehova!” ao e kangai ana taeka Iehova: “Ibukina bwa kam kangai, ‘Te taeka aei bon te uota ae rawawata* iroun Iehova,’ imwin are I tuangingkami ni kangai, ‘Kam na tai kangai: “Te uota ae rawawata* iroun Iehova!”’
39 ao noria! N na tabekingkami ao ni karenakoingkami mai matau, ngkami ma te kaawa are I anganingkami ma ami bakatibu.
40 Ao N na karokoa i aomi te bwaibwainrang ae akea tokina, ao te kamaamaeaki ae akea tokina, ae e na aki mwanuokinaki taekana.”’”+
Taiani Kabwarabwara Mai Nano
^ Ke, “te tia bwaibwai.”
^ Ke, “riki bwa taan tannako man te koaua.”
^ Nora Nanon Taeka.
^ Ebera, “kakorakorai baia.”
^ Ke, “Tabaota.” Nora Nanon Taeka.
^ Ke, “A kaoningkami ni kantaninga aika akea uaaia.”
^ Ke, e kona n nanona “te baare.”
^ Ke, “te rongorongo ae karawawata.” Iai uoua nanon te taeka n Ebera aei: “ana taeka te Atua ae karawawata” ke “te bwai ae tinebu.”
^ Ke, “te rongorongo ae karawawata.”
^ Ke, “te rongorongo ae karawawata.”
^ Ke, “te rongorongo ae karawawata.”
^ Ke, “te rongorongo ae karawawata.”
^ Ke, “te rongorongo ae karawawata.”
^ Ke, “te rongorongo ae karawawata.”
