Ieremia 26:1-24
26 Ngke e moan tautaeka Ieoiakim+ are natin Iotia, are uean Iuta, ao e roko te taeka aei mairoun Iehova:
2 “E kangai ana taeka Iehova, ‘Teei ni katawanangin ana auti Iehova, ao taetae ni kaineti ma* aomata ni kabane ake ni kaawa ake i Iuta, ake a roko bwa a na taromauri* n ana auti Iehova. Tuangia bwaai nako aika I tua nakoim, ao tai kakeea te taeka teuana.
3 Tao ane a na ongo ao e na rairaki temanna ma temanna mani kawaina ae buakaka, ao N na bita au iango ni kaineti ma* te kabuanibwai are I iangoia bwa N na karokoa i aoia ibukin aia mwakuri aika bubuaka.+
4 Kangai nakoia: “E kangai ana taeka Iehova, ‘Ngkana kam aki ongo irou ni kakairi n au tua* are I kaaki i matami,
5 n ongo n aia taeka au toro aika burabeti, aika I okioki ni kanakoia* nakoimi, ake kam aki ongo irouia,+
6 ao N na karaoa te auti aei n ai aron Tiro,+ ao N na karaoa te kaawa aei bwa te katoto ibukia akana karekeaki kaia, nakoia natannaomata nako aika n te aonnaba.’”’”+
7 Ao a ongora ibonga* ma burabeti ao aomata ni kabane iroun Ieremia, ngke e taekin taeka aikai n ana auti Iehova.+
8 Mangaia are ngke e tia n taekini bwaai nako Ieremia ake e tua Iehova nakoina bwa e na taekin nakoia aomata ni kabane, ao a taua teuaei ibonga ma burabeti ao aomata ni kabane ao a taku: “Ko na boni mate.
9 E aera ngkai ko taetae ni burabeti n aran Iehova ni kangai, ‘E na riki te auti aei bwa ai aron Tiro, ao e na uruakaki te kaawa aei ao n tiku n akea kaaina’?” Ao a bane aomata n ikotaki n otabwaninia Ieremia n ana auti Iehova.
10 Ngke a ongo taeka aikai tokan Iuta, ao a mwananga man ana auti* te uea nakon ana auti Iehova, ao a tekateka n te kawai n rin ni mataroan te oo ae boou are n ana auti Iehova.+
11 Ao a taku ibonga ma burabeti nakoia tooka ao nakoia aomata ni kabane: “E bon tau n reke iroun teuaei te tuuaa ae te mate,+ ibukina bwa e taetae ni burabeti n ekaanako te kaawa aei n aron ae kam ongo n oin taningami.”+
12 Ao e taku Ieremia nakoia tooka ni kabane ao aomata ni kabane: “Bon Iehova ae kanakoai bwa N na taetae ni burabetini taeka ni kabane ake kam a tia n ongo, n ekaanako iai te auti aei ao n ekaanako te kaawa aei.+
13 Mangaia ae kaetii ngkai kawaimi ao aromi, ao kam na ongo ni bwanaan Iehova ae Atuami, ao ane e na bita ana iango Iehova ni kaineti ma* te kabuanibwai are e taekinna n ekingkami nako iai.+
14 Ma ngai I a mena i aani baimi. Karaoa nakoiu ane kam taku bwa e raoiroi ao e eti i matami.
15 Ma kam na ataia raoi bwa ngkana kam kamateai, ao kam na katokaa raraan te aomata ae akea ana bure i aomi ao i aon te kaawa aei ao i aoia kaaina, bwa ni koauana, e kanakoai Iehova nakoimi bwa N na taekin taeka aikai ni kabane bwa kam na ongora.”
16 Ao a taku tooka ma aomata ni kabane nakoia ibonga ma burabeti: “E aki tau n reke iroun teuaei te tuuaa ae te mate, bwa e taetae nakoira n aran Iehova ae Atuara.”
17 Irarikin anne, ao a teirake unimwaane tabeman ao a kangai nakon te botaki n aomata:
18 “E taetae ni burabeti ngkoa Mika+ are mai Moreteta n ana bong Etekia+ are Uean Iuta, ao e taku nakoia kaain Iuta ni kabane, ‘E kangai ana taeka Iehova ae Atuaia taanga ni buaka:*
“E na kamarauaki Tion n aron te tawaana,
Ao e na riki Ierutarem bwa te kaawa ae urubekebeke,+
Ao e na riki maungan te Auti* bwa kaanga taabo aika rietata n te buakonikai.”’+
19 “Te koaua bwa a kamatea teuaei Etekia are Uean Iuta ao kaain Iuta ni kabane? Tiaki e mamaaka Iehova ao e bubutiia Iehova ana akoi,* n te aro are e a bita ana iango Iehova ni kaineti ma* te kabuanibwai are e taekinna n ekiianako iai?+ Mangaia ae ti nang karokoa te kabuanibwai i aora.
20 “Ao iai riki te mwaane temanna are taetae ni burabeti ngkoa n aran Iehova, ae Uriia are natin Temaia are kaaini Kiriataearim,+ are e taetae ni burabeti n ekaanako te kaawa aei ao n ekaanako te aba aei, n taeka aika titeboo ma ana taeka Ieremia.
21 Ao te Uea are Ieoiakim+ ma ana rorobuaka ni kabane aika korakora ma tooka ni kabane a ongo ana taeka teuaei, ao e a ukoukora kamateana te uea.+ Ngke e ongo aei Uriia ao e a maaku, ao e a birinako nako Aikubita.
22 Ao te Uea are Ieoiakim e kanakoa Erenatan+ are natin Akebora nako Aikubita, ngaia ma mwaane riki tabeman.
23 Ao a anaa Uriia mai Aikubita ao a kairia nakon te Uea are Ieoiakim, ao e a kamatea naba n te kabaang+ ao ni karenakoa rabwatana nako nanon ruanimateia aomata aika mangori.”
24 Ma Aikam+ are natin Tiaban+ e boutokaa Ieremia, ngaia are e a aki kanakoaki nakoia aomata bwa e na kamateaki.+
Taiani Kabwarabwara Mai Nano
^ Ke, “bobaraaki.”
^ Ke, “nakoia.”
^ Ke, “uringaaba ibukin.”
^ Ke, “kaetieti.”
^ Ebera, “utimwaaka ni kanakoia.”
^ Nora Nanon Taeka.
^ Ke, “baareti.”
^ Ke, “uringaaba ibukin.”
^ Ke, “Tabaota.” Nora Nanon Taeka.
^ Ke, “maungan te tembora.”
^ Ke, “uringaaba ibukin.”
^ Ke, “kataia ni kamaraua ubun Iehova.”