Ieremia 28:1-17
-
Ieremia ni kaitaraa te burabeti ni kewe ae Aanania (1-17)
28 Ni bon te ririki naba anne, ngke e moan tautaeka Tetekia+ are Uean Iuta, n te kaaua n ririki n te kanimaua n namwakaina, ao e taku nakoiu te burabeti are Aanania are natin Atiura are kaaini Kibeon,+ n ana auti Iehova i mataia ibonga* ao aomata ni kabane:
2 “E kangai ana taeka Iehova ae Atuaia taanga ni buaka,* ae Atuan Iteraera, ‘N na otea ana amo ueani Baburon.+
3 Imwaini koron ririki aika uoua ao N na kaoki nakon te tabo aei bwaai ni kabane ake n ana auti Iehova, ake e anai Nebukaneta are Ueani Baburon man te tabo aei, ao n uotii nako Baburon.’”+
4 “‘Ao N na kaoka Iekonia+ are natin Ieoiakim+ are uean Iuta nakon te tabo aei, ma taenikai ni kabane aika kaain Iuta ake a nako Baburon,’+ bon ana taeka Iehova, ‘bwa N na otea ana amo ueani Baburon.’”
5 Ao e taetae Ieremia are te burabeti nakon Aanania are te burabeti, i mataia ibonga ao aomata ni kabane ake a tei n ana auti Iehova.
6 E taku Ieremia are te burabeti: “Amen!* E bia karaoa anne Iehova! E bia kakororaoi am taeka Iehova aika ko taetae ni burabetiia, n arona ni kaoki mai Baburon nakon te tabo aei bwaai ake n ana auti Iehova ao aomata ni kabane ake a taenikai!
7 Ma ongora n te rongorongo aei taiaoka, ae I a taekinna i taningam ao i taningaia aomata ni kabane.
8 Rimoarimoa ao burabeti ake imwaiu ao ake imwaim, a taneiai n taetae ni burabeti ibukin aaba aika bati ao tautaeka n uea aika kakannato, ni kaineti ma te buaka, te kabuanibwai, ao te aoraki ae kamamate.
9 Ngkana e taetae ni burabetiia te rau te burabeti temanna, ao e koro bukin ana taeka te burabeti anne, ao e na ataaki iai bwa e boni kanakoa te burabeti anne Iehova.”
10 Ao Aanania are te burabeti e anaa te amo mai aon roroan Ieremia are te burabeti ao e oteia.+
11 Ao e taku Aanania i mataia aomata ni kabane: “E kangai ana taeka Iehova, ‘N aron aei ao N na otea naba ana amo Nebukaneta are Ueani Baburon, mai aon roroaia natannaomata ni kabane i nanon uoua te ririki.’”+ Ao e touaanako kawaina Ieremia are te burabeti.
12 Ngke e tia Aanania are te burabeti n otea te amo ni kanakoa mai aon roroan Ieremia are te burabeti, ao e roko iroun Ieremia ana rongorongo Iehova ae kangai:
13 “Naako ao kangai nakon Aanania, ‘E kangai ana taeka Iehova: “Ko a tia n otei taian amo aika kaai,+ ma ko na karaoi taian amo aika biiti bwa oneani mwia.”
14 Bwa e kangai ana taeka Iehova ae Atuaia taanga ni buaka, ae Atuan Iteraera: “N na katokaa te amo ae te biti i aon roroaia natannaomata aikai ni kabane, bwa a na toro iroun Nebukaneta are Ueani Baburon, ao ane a na toro irouna.+ N na anga naba manin te tawaana aika moaanti nakon teuaei.”’”+
15 Ao e taku Ieremia are te burabeti nakon Aanania+ are te burabeti: “Taiaoka ma ongora, ngkoe ae Aanania! E bon aki kanakoko Iehova, ma ko a tia ni kairiia aomata aikai bwa a na onimakina te kewe.+
16 Mangaia ae e kangai ana taeka Iehova, ‘Noria! N na kanakoko mai aon te aba. Ko na mate n te ririki aei, bwa ko kauekea te karitei nakon Iehova.’”+
17 Mangaia are e a mate Aanania are te burabeti n te ririki anne n te kaitiua n namwakaina.
Taiani Kabwarabwara Mai Nano
^ Nora Nanon Taeka.
^ Ke, “Tabaota.” Nora Nanon Taeka.
^ Ke, “Ngaia anne!”
