Ieremia 33:1-26
33 E roko ana taeka Iehova iroun Ieremia n te kauatai, ngke e bon teimatoa naba ni kainaki n Aia Katawanang Taan Tantani,+ ae kangai:
2 “E kangai ana taeka Iehova ae te tia Karaoa aonnaba, ae Iehova ae ngaia ae karikia ao e kateia ni kamatoaa, bon Iehova arana,
3 ‘Weteai ao N na kaekako ao N na tauraoi n tuangko baika kakannato ma ni kangaanga te ota iai aika ko tuai n atai.’”+
4 “Bwa e kangai ana taeka Iehova ae Atuan Iteraera ni kaineti ma auti aika n te kaawa aei, ma aia auti uean Iuta ake a kabwakaaki ao ni karaoaki iai te bwai ni kamanomano man aia nono ni buaka ao aia kabaang taani kairiribai,+
5 ao ni kaineti ma te koraki ake a roko ni buakania I-Kareria, ni kaon taabo aikai n rabwataia naake a mate ake I kamateia n uniu ao ni marakin nanou, ake te koraki ake a kairai ni buakakaia bwa N na karabaa ubuu man te kaawa aei:
6 ‘Akea bwa I a karokoa te mauri ma te marurung nakon te kaawa aei,+ ao N na kamarurungia ao ni kaota nakoia te rau ae bati ao te koaua.+
7 Ao N na kairiia ni kaokiia taenikain Iuta ao taenikain Iteraera,+ ao N na kakorakoraia n aron are I karaoia rimoa.+
8 Ao N na kaitiakiia man aia kairua nako ake a bure iai nakoiu,+ ao N na kabwarai aia bure ni kabane ma aia kairua nakoiu.+
9 Ao e na riki aran te kaawa aei bwa kakatongau, karaoiroau, ao neboakiu i mataia natannaomata nako aika n te aonnaba, ake a na ongo baika raraoi ni kabane aika I karokoi i aoia.+ Ao ane a na maaku ao a na rurubenebene+ ibukini baika raraoi ni kabane ma te rau are I karokoa i aon te kaawa aei.’”+
10 “E kangai ana taeka Iehova: ‘N te tabo aei ae kam na taekinna bwa te aba ae aki kona ni maekanaki, ae akea iai te aomata ke te nanai ni man, ni kaawa ake i Iuta ao ni kawai ake i Ierutarem aika uruaki, ae akea iai te aomata ke kaaina ke te nanai ni man, ao ane e na manga ongoraeaki iai
11 te bwanaa ni kakatonga ao te bwanaa ni kimwareirei,+ bwanaan te tia mare te mwaane ao bwanaan te tia mare te aine, ao bwanaaia akana kangai: “Katituaraoa Iehova ae Atuaia taanga ni buaka,* bwa e raoiroi Iehova,+ bwa e teimatoa n aki toki ana tangira ae koaua!”’*+
“‘Ane a na uotii karea ni katituaraoi nakon ana auti Iehova,+ bwa N na kairiia ni kaokiia taenikai n te aba, n aron are rimoa,’ bon ana taeka Iehova.”
12 “E kangai ana taeka Iehova ae Atuaia taanga ni buaka: ‘N te aba ae aki kona ni maekanaki aei, ae akea iai te aomata ke te nanai ni man, ao ni kaawana ni kabane, ao ane a na manga reke iai tawaana ibukia taani kawakintiibu bwa a na kamotirawaia iai aia nanai.’+
13 “‘Ane a na manga warekiia aia tiibu taani kawakintiibu, ni kaawa ake n te aono ae maungaunga, ni kaawa ake n te aba ae rinano, ni kaawa ake i maiaki, n abani Beniamin, n taabo ake i rarikin Ierutarem,+ ao ni kaawa ake i Iuta,’+ bon ana taeka Iehova.”
14 “‘Noria! A a roko boong,’ bon ana taeka Iehova, ‘ae N na kakororaoa iai te berita ae raoiroi are I taekinna ni kaineti ma tibun Iteraera ao tibun Iuta.+
15 Ni boong akanne ao n te tai anne, ao N na kabwebwerakea te bwebwe* ae raoiroi ibukin Tawita,+ ao e na karaoa teuanne te kaetitaeka ae riai ao te raoiroi i aon te aba.+
16 Ni boong akanne ao e na kamaiuaki Iuta+ ao e na maeka ma te mweraoi Ierutarem.+ Ao e na aranaki neiei n aei: Iehova Bon Ara Raoiroi.’”+
17 “Bwa e kangai ana taeka Iehova: ‘E na bon teimatoa n iai temanna mani kanoan Tawita ae e na tekateka i aoni kaintokanuean Iteraera,+
18 ao e na teimatoa naba n iai temanna mai buakoia ibonga* aika tibun Rewi ae e na tei i matau bwa e na anga taiani karea ni kabuekaki aika bwanin, e na kabueka te karea ae te amwarake, ao e na anga taiani karea.’”
19 Ao e a manga roko naba ana taeka Iehova iroun Ieremia, ae kangai:
20 “E kangai ana taeka Iehova, ‘Ngkana kam kona n urua au berita ni kaineti ma te ngaina, ao au berita ni kaineti ma te bong, bwa kam na totokoa rokon te ngaina ma te bong n taia aika riai,+
21 ao e kona naba ngkanne n uruaki au berita ma au toro are Tawita,+ n te aro are e na aki reke natina te mwaane ae e na tautaeka bwa te uea i aon ana kaintokanuea,+ ao ai aron naba au berita ma ibonga aika tibun Rewi, ake au tabonibai.+
22 N aroni bwaini karawa aika aki kona ni warekaki ao tanon taari ae aki kona n ataaki mwaitina, ao ai arona naba bwa N na kamwaitiia kanoan* au toro are Tawita ao tibun Rewi aika bebeku irou.’”
23 Ao e a manga roko naba ana taeka Iehova iroun Ieremia, ae kangai:
24 “Ko aki ongo aia taeka aomata aikai ae a kangai, ‘E na rawa Iehova nakoia utu aika uoua ake e rineiia’? Ao a aki karineia au aomata ao a aikoa iangoiia bwa te natannaomata teuana.
25 “E kangai ana taeka Iehova: ‘N aron ae I a bon tia ni karaoa au berita ni kaineti ma te ngaina ao te bong,+ aika tuua* ibukini karawa ma aonnaba,+
26 ao ai arona naba bwa N na bon aki kona n rawa nakoni kanoan* Iakoba ma kanoan au toro are Tawita, ao N na anaa temanna mai buakoia kanoana* bwa e na tautaeka i aoia kanoan* Aberaam, Itaaka, ao Iakoba. Bwa N na ikotiia ni kaokiia aia taenikai+ ao N na nanoangaiia.’”+
Taiani Kabwarabwara Mai Nano
^ Ke, “Tabaota.” Nora Nanon Taeka.
^ Ke, “tangira ae kona n onimakinaki.”
^ Ke, “te tia bwaibwai.”
^ Nora Nanon Taeka.
^ Ebera, “ana kariki.”
^ Ke, “kaetieti.”
^ Ebera, “ana kariki.”
^ Ebera, “ana kariki.”
^ Ebera, “ana kariki.”
