Ieremia 36:1-32
36 N ana kaaua n ririki n tautaeka Ieoiakim+ are natin Iotia are uean Iuta, ao e roko iroun Ieremia te taeka aei mairoun Iehova, ae kangai:
2 “Anaa te nira ni boki ao korei iai taeka ni kabane aika I taekin nakoim n ekaanako Iteraera ma Iuta+ ao natannaomata ni kabane,+ man te moani bong are I taetae iai nakoim n ana bong Iotia ni karokoa te bong aei.+
3 Tao ngkana a ongo naake tibun Iuta taekan te kabuanibwai ni kabane ake I kani karokoi i aoia, ao tao ane a na rairaki mani kawaia aika bubuaka, bwa I aonga ni kabwarai aia kairua ma aia bure.”+
4 Ao Ieremia e wetea Baruka+ are natin Neria, ao e taekin taeka aikai ni kabane Ieremia ake e taekin Iehova nakoina, ao e korei Baruka n te nira ni boki.+
5 Ao e tua Ieremia nakoni Baruka ni kangai: “I a kainaki ao I a aki kona n rin n ana auti Iehova.
6 Mangaia ae ko riai ngkoe n rin ao ni wareki ana taeka Iehova ni kabaibati man te nira ni boki are ko koreia ngke I taekinna. Warekia bwa a na ongora aomata ake n ana auti Iehova n te bongi n aki mamatam, mangaia ae ko na warekia nakoia kaain Iuta ni kabane ake a roko man aia kaawa nako.
7 Tao ane e na roko iroun Iehova iai aia bubutii ni kan akoaki, ao ane a na rairaki, temanna ma temanna mani kawaina aika bubuaka, bwa e korakora te un ao te bononnano are e a tia n taekinna Iehova n ekiianako iai aomata aikai.”
8 Mangaia are e karaoi bwaai ni kabane Baruka are natin Neria ake e tua nakoina Ieremia are te burabeti. E wareki ana taeka Iehova ni kabaibati man te nira ni boki* n ana auti Iehova.+
9 N ana kanimaua n ririki n tautaeka Ieoiakim+ are natin Iotia, are uean Iuta, n te karuaiwa n namwakaina, ao a katanoataa te aki mamatam i matan Iehova kaain Ierutarem ni kabane, ao aomata ni kabane ake a roko i Ierutarem mani kaawa ake i Iuta.+
10 Ao Baruka e wareki ana taeka Ieremia ni kabaibati man te nira ni boki* n ana auti Iehova, n ana ruu* Kemaria+ are natin Tiaban+ are te tia kaewewe,* n te katawanang are mai eta, n te kawai n rin ni mataroan te oo ae boou are n ana auti Iehova,+ ao a ongora aomata ni kabane.
11 Ngke e ongo ana taeka Iehova ni kabane man te nira ni boki* Mikaia are natini Kemaria are natin Tiaban,
12 ao e ruo rikaaki nakon ana auti* te uea, nakon ana ruu te tia koroboki. Ao aikai tooka* ni kabane ake a tekateka ikekei: Eritiama+ are te tia koroboki, Teraaia are natin Temaia, Erenatan+ are natin Akebora,+ Kemaria are natin Tiaban, Tetekia are natin Aanania, ao ai tooka riki ake tabemwaang.
13 Ao Mikaia e tuangia taeka ni kabane ake e ongo ngke e wareware Baruka man te nira ni boki* ngke a ongora aomata.
14 Ao a bane tooka akekei ni kanakoa Ieuri are natin Netania are natin Teremia are natini Kutii nakoni Baruka, ni kangai: “Nakomai ao uota te nira ni boki are ko warekia ngke a ongora aomata.” Ao Baruka are natin Neria e anaa te nira ni boki ni baina ao e rinnako nakoia.
15 A taku nakoina: “Tekateka taiaoka, ao warekia ni kabaibati nakoira.” Mangaia are e a warekia nakoia Baruka.
16 Ngke a ongo naba ngkekei taeka akekei ni kabane, ao a itaramata ma te maakunrang, ao a taku nakoni Baruka: “Ti bon riai n tuanga te uea taeka aikai ni kabane.”
17 Ao a titirakina Baruka ni kangai: “Taiaoka ma tuangira bwa ko kangaa ni korei taeka aikai ni kabane. E tuangko Ieremia bwa ko na korei baikai ni kabane?”
18 E kaeka ni kangai Baruka nakoia: “E taekin taeka aikai ni kabane nakoiu, ao I korei n te ingke i nanon te nira ni boki* aei.”
19 A taku tooka aikai nakoni Baruka: “Naako ao karabako, ngkoe ma Ieremia, ao tai kaotia nakon temanna bwa kam mena ia.”+
20 Ao a nako n rin nakon te uea, nakon te katawanang, ao a karina te nira ni boki n ana ruu Eritiama are te tia koroboki, ao a kaongoa te uea bwaai ni kabane ake a a tia n ongo.
21 Ao te uea e kanakoa Ieuri+ bwa e na anaa te nira ni boki, ao e uotia man ana ruu Eritiama are te tia koroboki. E a warekia Ieuri ao e ongora te uea ma tooka ni kabane ake a tei i rarikin te uea.
22 E tekateka te uea n te auti are e memena iai n tain te kamwaitoro n te karuaiwa n namwakaina,* ma te ai ae ura ni nnen te ai i matana.
23 Ngke e tia Ieuri ni wareka tenua ke aua te rinan, ao te uea e a korea naba mwakorona anne n ana biti te tia koroboki, ao e karenakoa i nanon te ai are e ura ni nnen te ai, ni karokoa ae e boni bane ni bwaka i nanon te ai te nira ni boki arei.
24 Ao a aki maakunrang, ao a aki naba roko n te raeuai kunnikaia te uea ma ana toro ni kabane ake a ongo taeka akekei ni kabane.
25 E ngae ngke a bubutiia te uea Erenatan,+ Teraaia,+ ao Kemaria,+ bwa e na aki kabueka te nira ni boki, ma e aki ongo irouia.
26 Ao e tua te uea nakon Ierameera are natin te uea, Teraia are natin Aatiriera, ao Teremia are natin Abeteera, bwa a na taua Baruka are te tia koroboki ao Ieremia are te burabeti, ma e teimatoa ni karabaia Iehova.+
27 Imwin tian te uea ni kabueka te nira ni boki are kanoana taeka ake e korei Baruka ake e taekin Ieremia, ao e a manga roko naba ana taeka Iehova iroun Ieremia+ ae kangai:
28 “Anaa teuana riki te nira ni boki ao korei iai taeka ni kabane aika titeboo ma ake n te moan nira ni boki, are e kabuekia Ieoiakim are Uean Iuta.+
29 Ao ko riai n taetae n ekaanako Ieoiakim are Uean Iuta ni kangai, ‘E kangai ana taeka Iehova: “Ko a tia ni kabueka te nira ni boki aei ao ko kangai, ‘E aera ngkai ko korea iai ae kangai: “E na bon roko ueani Baburon ao ni kamauna te aba aei ao ni kakeaia kaaina aika aomata ma maan”?’+
30 Mangaia ae e kangai ana taeka Iehova nakon Ieoiakim are Uean Iuta, ‘E na akea ana aomata ae e na tekateka i aon ana kaintokanuea Tawita,+ ao e na katukaki rabwatana ngkana e mate n tawaaki i aan te riringa n te ngaina ao i aan te mwaitoro n te tairiki.+
31 N na kaeta taekan teuanne ma kanoana* ao ana toro ibukin aia bure, ao N na karokoa te kabuanibwai ni kabane i aoia are I taekinna nakoia, ao i aoia kaain Ierutarem, ao i aoia mwaane aika tibun Iuta,+ ma a aki ongo.’”’”+
32 E a manga anaa te nira ni boki riki teuana Ieremia ao e angani Baruka are natin Neria are te tia koroboki,+ ao ngke e taekin Ieremia ao ngaia e korei taeka ni kabane ake n te nira ni boki* are e kabuekia n te ai+ Ieoiakim are Uean Iuta. Ao a bati riki taeka n aron akekei aika karinaki.
Taiani Kabwarabwara Mai Nano
^ Ke, “man te boki.”
^ Ke, “man te boki.”
^ Ke, “tabo n amwarake.”
^ Ke, “tia koroboki.”
^ Ke, “man te boki.”
^ Ke, “mataniwi.”
^ Ke, “baareti.”
^ Ke, “man te boki.”
^ Ke, “i nanon te boki.”
^ Ebera, “ana kariki.”
^ Ke, “n te boki.”
