Ieremia 40:1-16
40 Te taeka ae roko iroun Ieremia mairoun Iehova ngke e tia Nebutaratan+ are mataniwia taan tantani ni kainaomataa teuaei mai Rama.+ E kairia nako ikekei ao e kabaeaki ni bwaai ni kabaebai, ao e mena i buakoia taenikai ni kabane ake kaain Ierutarem ao kaain Iuta, ake a kanakoaki nako Baburon.
2 Ao mataniwia taan tantani e kaira Ieremia ao e taku nakoina: “E a kaman taekina te kabuanibwai aei Iehova ae Atuam nakon te tabo aei,
3 ao Iehova e karaoa aron are e a tia n taekinna, ibukina bwa kam bure nakon Iehova ao kam aki ongo ni bwanaana. Anne bukina ae e riki iai aei nakoimi.+
4 I a kainaomatako n te bong aei mani bwaai ni kabaebai akana i baim. Ngkana ko taku bwa e raoiroi iroum bwa ko na irai nako Baburon ao ko na iri, ao N na tararuaiko. Ma ngkana ko aki kan irai nako Baburon ao tai iri. Noria! E mena i matam te aba ni kabutaa. Naako nakon te tabo ane ko rineia.”+
5 Imwain ae e oki Ieremia ao e a taku naba Nebutaratan: “Okira Ketaria+ are natin Aikam+ are natin Tiaban,+ are e mwiokoia ueani Baburon i aoni kaawa ake i Iuta, ao tiiku irouna i buakoia aomata, ke naako nakon te tabo ane ko rineia.”
Ao mataniwia taan tantani e angan teuaei kanana ma te bwaintangira ao e a kanakoa.
6 Mangaia are e nako Ieremia nakoni Ketaria are natin Aikam i Mitiba,+ ao e mena irouna i buakoia aomata ake a tiku n te aba.
7 Imwina riki ao a a bane n ongo mataniwi n te taanga ni buaka ake a mena n te tawaana ma aia rorobuaka, ae e a tia ueani Baburon ni mwiokoa Ketaria are natin Aikam i aon te aba, ao e mwiokoia i aoia mwaane ma aine ao ataei, ni moa mairouia aomata aika maiu ni kainnano ake n te aba, ake a aki kanakoaki nako Baburon.+
8 Mangaia are a a roko irouni Ketaria i Mitiba.+ Naakai bon Itimaera+ are natin Netania, Ioaanan+ ma Ionatan ake natini Karea, Teraia are natin Tanumeta, mwaane ake natin Ebai are te I-Netoba, ao Ietania+ are natin te I-Maakata, ao raoia aia rorobuaka.
9 Ao e berita n te taetae n tuea Ketaria are natin Aikam are natin Tiaban nakoia naakai ma aia rorobuaka ni kangai: “Tai maaka te beku irouia I-Kareria. Kam na maeka n te aba ao kam na toro iroun ueani Baburon, ao a na nakoraoi bwaai ni kabane ibukimi.+
10 Ni kaineti ngkanne ma ngai, N na tiku i Mitiba bwa N na tei ibukimi nakoia* I-Kareria ake a roko iroura. Ma kam riai n ikotii wain, uaanikai aika rereke n tain te kabuebue, ao te oera, ao kaaki ni nnen ami bwai ao maeka n taiani kaawa ake kam kairaki nako iai.”+
11 Ao I-Iutaia ni kabane ake i Moaba, ma ake i abaia tibun Ammon, ao i Etom, n ikotaki ma naake n aaba ni kabane, a ongo naba taekan ueani Baburon are e katikuia taian nikira i Iuta, ao e mwiokoa Ketaria are natin Aikam are natin Tiaban i aoia.
12 Mangaia are a a bane I-Iutaia n oki rikaaki man taabo nako ake a kamaenakoaki nako iai, ao a okira Iuta nakoni Ketaria i Mitiba. Ao a ikotii wain ma uaanikai aika rereke n tain te kabuebue aika rangi ni mwaitikurikuri.
13 Ao Ioaanan are natini Karea ma mataniwi ni kabane n te taanga ni buaka ake a mena n te tawaana, a nakoni Ketaria i Mitiba.
14 A taku nakoina: “Ko aki ataia ae Baariti are aia uea tibun Ammon,+ e kanakoa Itimaera are natin Netania bwa e na kamateko?”+ Ma e aki kakoauaia naakai Ketaria are natin Aikam.
15 Ao Ioaanan are natini Karea e karaba n tuanga Ketaria i Mitiba ni kangai: “I kan nako ni kamatea Itimaera are natin Netania, ao akea temanna ae e na ataia. E aera ngkai e na kamateko, ao e aera ngkai a na uamaenako kaain Iuta ni kabane aika ikotaki nakoim, ao a na mate nikiraia kaain Iuta?”
16 Ma e taku Ketaria+ are natin Aikam nakon Ioaanan are natini Karea: “Tai karaoa te baei, bwa bon te kewe te bwai ane ko taekinna ibukin Itimaera.”
Taiani Kabwarabwara Mai Nano
^ Ebera, “bwa N na tei i mataia.”
