Ieremia 41:1-18
41 N te kaitiua n namwakaina, ao Itimaera+ are natin Netania are natin Eritiama are man te kanoa ake bwaanuea,* ao temanna ngaia i buakoia ana rorobuaka te uea aika kakannato, e roko ma rorobuaka tabeman riki aika tengaun nakoni Ketaria are natin Aikam i Mitiba.+ Ngke a tabe n amwarake i Mitiba,
2 ao e teirake Itimaera are natin Netania ma rorobuaka ake tengaun ake raona, ao a kamatea Ketaria are natin Aikam are natin Tiaban n te kabaang. Mangaia are e a kamatea teuare mwiokoaki iroun ueani Baburon bwa e na mataniwi n te aba.
3 E kamateia naba I-Iutaia ni kabane Itimaera ake raoni Ketaria i Mitiba, n ikotaki naba ma tautiani Kareria ake ikekei.
4 N te kauoua ni bong imwini kamateani Ketaria, imwain ae e ataia temanna,
5 ao a roko mwaane aika 80 mai Tekem,+ mai Tiro,+ ao mai Tamaria.+ E a tia n imanaki buaia, a raeuaaki aia kunnikai, a a tia ni korokoreiia i bon irouia,+ ao iai i baia te karea ae te amwarake ma te ribano*+ bwa a na uotia nakon ana auti Iehova.
6 Mangaia are e a otinako Itimaera are natin Netania mai Mitiba bwa e na kawariia, ao e tang ngke e nakonako. Ngke e a kaitiboo ma ngaiia ao e taku nakoia: “Nakomai nakoni Ketaria are natin Aikam.”
7 Ma ngke a a rin i nanon te kaawa, ao e a kamateia naba naakai Itimaera are natin Netania ma ana rorobuaka, ao ni karenakoia nako nanon te mwarua n ran.
8 Ma iai rorobuaka aika tengaun i buakoia ake a taku nakon Itimaera: “Tai kamateira, bwa ti a tia ni karabai uita, baare, oera, ao aia karewe manibeeru,* n te tawaana.” Ngaia are e a aki kamateia n ikotaki ma tariia.
9 Ao Itimaera e tewenakoi rabwataia ni kabane rorobuaka ake e kamateia nako nanon te mwarua n ran ae buburakaei, are e karaoia te Uea are Ata ibukini Baata are Uean Iteraera.+ Aio te mwarua n ran are e kaonna Itimaera are natin Netania irouia rorobuaka aika kamateaki.
10 Ao Itimaera e kairiia nikiraia aomata ni kabane ake i Mitiba+ bwa taenikai, n ikotaki ma natin te uea ake aine ao aomata ni kabane ake a tiku i Mitiba, ake a kaakaki i aan ana kairiri Ketaria+ are natin Aikam iroun Nebutaratan are mataniwia taan tantani. E kairiia naakai Itimaera are natin Netania bwa taenikai, ao a mwananga nakon iterana are teuana nakoia tibun Ammon.+
11 Ngke e a ongo Ioaanan+ are natini Karea ma mataniwi ni kabane n te taanga ni buaka ake raona, taekani bwaai ni kabane aika bubuaka ake e karaoi Itimaera are natin Netania,
12 ao a kairiia rorobuaka ni kabane ao a nako bwa a na buakana Itimaera are natin Netania, ao e reke irouia i rarikin raan aika abwabwaki* i Kibeon.
13 A kimwareirei aomata ni kabane ake a mena i rarikin Itimaera ngke a nora Ioaanan are natini Karea ma mataniwi ni kabane n te taanga ni buaka ake raona.
14 Ao a rairaki aomata ni kabane ake a kairaki bwa taenikai iroun Itimaera mai Mitiba,+ ao a oki rikaaki ma Ioaanan are natini Karea.
15 Ma e rabanako Itimaera are natin Netania ma ana rorobuaka aika waniman mairoun Ioaanan, ao a nako nakoia tibun Ammon.
16 Ao Ioaanan are natini Karea ma mataniwi ni kabane n te taanga ni buaka ake raona, a airi ma nikiraia aomata mai Mitiba, ake te koraki ake a a tia ni kamaiuia mairoun Itimaera are natin Netania, imwin tiana ni kamatea Ketaria+ are natin Aikam. A kairiia rorobuaka, tautia, aine, ataei, ao mataniwi, ni kaokiia mai Kibeon.
17 Ngaia are a nako ao a tiku n ana tabo ni motirawa Kimam ae uakaan ma Betereem,+ bwa a iangoa te nako Aikubita+
18 ibukia I-Kareria. Bwa a maakuia, kioina ngke Itimaera are natin Netania e kamatea Ketaria are natin Aikam, are e mwiokoia ngkoa ueani Baburon bwa e na mataniwi n te aba.+
Taiani Kabwarabwara Mai Nano
^ Ebera, “ana kariki te tautaeka n uea.”
^ Nora Nanon Taeka.
^ Nora Nanon Taeka.
^ Ke tao, “te nei ae buburakaei.”
