Ieremia 43:1-13
43 Ngke e tia n taetae Ieremia nakoia aomata aikai ni kabane n taekin taeka aikai ni kabane ake mairoun Iehova ae Atuaia, ake taeka nako ake e kanakoaki iai iroun Iehova ae Atuaia bwa e na tuangia,
2 ao Ataria are natin Otiaia, Ioaanan+ are natini Karea, ao mwaane ni kabane aika kan rarabakau a taku nakon Ieremia: “Bon te kewe te bwai ane ko taekinna! E aki kanakoko Iehova ae Atuara bwa ko na kangai, ‘Tai nako Aikubita ni maeka ikekei.’
3 Ma e kaungako Baruka+ are natin Neria bwa ko na kaaitaraira bwa ko na anga ngaira nakoia I-Kareria, bwa a na kamateira ke ni kairiranako bwa taenikai i Baburon.”+
4 Mangaia are e aki ongo Ioaanan are natini Karea ma mataniwi ni kabane n te taanga ni buaka ao aomata ni kabane, ni bwanaan Iehova are a na tiku n te aba ae Iuta.
5 Ma Ioaanan are natini Karea ma mataniwi ni kabane n te taanga ni buaka, a kairiia nikiraia kaain Iuta ake a a tia n oki mairouia natannaomata ni kabane ike a kamaenakoaki ngkoa nako buakoia, bwa a na maeka n te aba ae Iuta.+
6 A kairiia mwaane, aine, ataei, natin te uea ake aine, ao aomata* nako, ake e katikuia Nebutaratan+ are mataniwia taan tantani irouni Ketaria+ are natin Aikam+ are natin Tiaban,+ n ikotaki ma Ieremia are te burabeti ao Baruka are natin Neria.
7 Ao a rinnako n te aba ae Aikubita, bwa a aki ongo ni bwanaan Iehova, ao a nako ao a rokoroko i Taabaneti.+
8 Ao e roko ana taeka Iehova iroun Ieremia i Taabaneti, ae kangai:
9 “Anai i baim atibu aika bubura ao karabai n te kaman ae karaoaki man te buriki are i rarikini mataroan ana auti Barao i Taabaneti, ao rabuni n te timanti, i mataia rorobuaka aika I-Iutaia.
10 Ao kangai nakoia, ‘E kangai ana taeka Iehova ae Atuaia taanga ni buaka,* ae Atuan Iteraera: “Noria ae I a kanaanako nakon Nebukaneta* are ueani Baburon, are au toro,+ ao N na kaaki ana kaintokanuea i etan raoi atibu aika I karabai aikai, ao e na taakina ana umwanrianna ae tamaroa i aoia.+
11 Ao e na rin ao e na orea te aba ae Aikubita.+ Ane e riai n reke irouna te aoraki ae kamamate ao e na reke n te aoraki ae kamamate, ao ane e riai ni kairakinako bwa te taenikai ao e na nako bwa te taenikai, ao ane e riai ni mate n te kabaang ao e na mate n te kabaang.+
12 Ao N na kabueki aia auti* atuan Aikubita n te ai,+ ao e na kabuekiia ao e na kairiia bwa taenikai. E na niniria n te aba ae Aikubita, n aron te tia kawakintiibu ae niniria n ana kunnikai, ao e na kitana ikekei ma te rau.*
13 Ao e na ototei bouani* Betatemeti* n te aba ae Aikubita, ao e na kabueki aia auti* atuan Aikubita n te ai.”’”
Taiani Kabwarabwara Mai Nano
^ Ebera, ne’phesh, nora Nanon Taeka.
^ Ebera, “Nebukareta,” aroni koreana teuana.
^ Ke, “Tabaota.” Nora Nanon Taeka.
^ Ke, “tembora.”
^ Ke, “n aki ikoaki.”
^ Ke, “boua aika kanikina aika rietata.”
^ Ke, “Ana Auti (Tembora) Taai,” ae taekan Erioboriti.
^ Ke, “tembora.”
