Ieremia 44:1-30
44 Te taeka ae roko iroun Ieremia ibukia I-Iutaia ni kabane ake a maeka n te aba ae Aikubita,+ ake te koraki ake a maeka i Miketora,+ i Taabaneti,+ i Nobi,*+ ao n te aba ae Bateroti,+ ae kangai:
2 “E kangai ana taeka Iehova ae Atuaia taanga ni buaka,* ae Atuan Iteraera, ‘Kam a tia n nora te kabuanibwai ni kabane are I karokoa i aon Ierutarem+ ao i aoni kaawa ni kabane ake i Iuta, ao n te bong aei a a uruaki, ao ai akea kaaia.+
3 E riki aei ibukini baika bubuaka ake a karaoi ni kaunai iai n aroia n nako n angakarea+ ao n toro irouia atua riki tabeman ake a aki kinaia, ao kam aki kinaia, ao a aki naba kinaaki irouia ami bakatibu.+
4 I teimatoa ni kanakoia nakoimi au toro ni kabane aika burabeti, I okioki ni kanakoia,* ao ni kangai: “Taiaoka ma tai karaoa te bwai ae riribaaki aei ae I ribaia.”+
5 Ma a aki ongo ke ni katanimai taningaia bwa a na rairakinako mani buakakaia, bwa a na aki angakarea nakoia atua riki tabeman.+
6 Mangaia are e a kabwaroaki uniu ma marakin nanou ao e ura ni kaawa ake i Iuta ao ni kawai ake i Ierutarem, ao a a riki bwa te tabo ae uruaki ao te aba ae aki kona ni maekanaki, n aron ae riki n te bong aei.’+
7 “E a kangai ngkai ana taeka Iehova ae Atuaia taanga ni buaka, ae Atuan Iteraera, ‘E aera ngkai kam a kauekea te kabuanibwai ae korakora bon nakoimi, n te aro ae a nangi bane ni mate mwaane ma aine, ataei ao merimeri, i Iuta, ao akea nikirami ae e na tiku?
8 E aera ngkai kam a kaunai n aia mwakuri baimi n aromi n angakarea nakoia atua riki tabeman n te aba ae Aikubita, ike kam nako ni maeka iai? Kam na mate ao kam na riki bwa te katoto ibukia akana karekeaki kaia, ao te bwai ni kabuakakaaki i buakoia natannaomata nako aika n te aonnaba.+
9 Kam a mwaninga aia mwakuri aika bubuaka ami bakatibu ao aia mwakuri aika bubuaka uean Iuta+ ao aia mwakuri aika bubuaka buuia,+ n ikotaki ma oin ami mwakuri aika bubuaka ao aia mwakuri aika bubuaka aine ake buumi,+ ake a karaoaki n te aba ae Iuta ao ni kawai ake i Ierutarem?
10 Ni karokoa te bong aei ao a aki kananorinanoia,* a aki kaotiota te maaku,+ ke n nakonako n au tua ma au moti ake I katei i matami ma ami bakatibu.’+
11 “Mangaia ae e kangai ana taeka Iehova ae Atuaia taanga ni buaka, ae Atuan Iteraera, ‘Noria ae I a motikia bwa N na karokoa te kabuanibwai i aomi, ni kamaunaia kaain Iuta ni kabane.
12 Ao N na anaiia nikiraia kaain Iuta ake a motikia bwa a na nakon te aba ae Aikubita ni maeka iai, ao a na bane ni mate n te aba ae Aikubita.+ A na bwaka n te kabaang ao a na mate n te rongo, mairoun ae te kabanea ni mangori ni karokoa ae te kabanea ni kakannato, a na mate n te kabaang ao n te rongo. Ao a na riki bwa te katoto ibukia akana karekeaki kaia, te bwai ni kakamaaku, te bwai n aki karineaki, ao te bwai ni kabuakakaaki.+
13 N na katuuaaeia te koraki ake a maeka n te aba ae Aikubita n aron are I katuuaaea Ierutarem, n te kabaang, n te rongo, ao n te aoraki ae kamamate.+
14 Ao nikiraia kaain Iuta ake a nako ni maeka n te aba ae Aikubita a na aki rabanako ke ni maiu bwa a na okira te aba ae Iuta. A na rangi ni kan oki ao ni maeka iai, ma a na aki oki, ma bon tii tabeman aika a na reke birinakoia.’”
15 A kaekaa Ieremia ni kangai mwaane ni kabane ake a ataia ae a angakarea buuia nakoia atua riki tabeman, ao buuaine ni kabane ake a tei ikekei, ae te koraki ae rangi ni mwaiti, ao aomata ni kabane ake a maeka n te aba ae Aikubita,+ i Bateroti:+
16 “Ti na aki ongo n te taeka are ko taekinna nakoira n aran Iehova.
17 Ma ti na boni kakororaoi taeka nako ake a taekini wira, n angakarea nakon Ueannaineni Karawa,* ao ni kabwaroa te karea ae te moi nakon neiei,+ n aron ae ti kakaraoia, a kakaraoia ara bakatibu, ara uea, ao ara toka, ni kaawa ake i Iuta ao ni kawai ake i Ierutarem, ngke ti rauaki n te amwarake ao ti mweraoi, ao ngke ti aki nora te kabuanibwai naba teuana.
18 Man te tai are ti katoka iai te angakarea nakon Ueannaineni Karawa* ao kabwaroan te karea ae te moi nakon neiei, ao ti a bon tare naba ni bwaai nako, ao ti a mate n te kabaang ao n te rongo.”
19 A reitia ni kangai naake aine: “Ao ngke ti angakarea nakoni Ueannaineni Karawa* ao ni kabwaroa te karea ae te moi nakon neiei, ao te koaua bwa akea aia kariaia buura ngke ti karaoi karea aika bwerena aika katotongan neiei, ao ni kabwaroa te karea ae te moi nakon neiei?”
20 E taku ngkanne Ieremia nakoia aomata ni kabane, nakoia mwaane ma buuia, ao nakoia aomata ni kabane ake a taetae nakoina:
21 “Karea ake kam karaoi ni kaawa ake i Iuta ao ni kawai ake i Ierutarem, ngkami ma ami bakatibu, ami uea, ami toka, ao kaain te aba,+ e bon uringi Iehova ao a rin i nanona!
22 N tokina ao e a aki kona Iehova n taotaona nanona n ami mwakuri aika bubuaka ao ni baika riribaaki ake kam karaoi, ao e a riki abami bwa te tabo ae uruaki, te bwai ni kakamaaku ao te katoto ibukia akana karekeaki kaia, ao ai akea kaaina, n aron ae e riki n te bong aei.+
23 E riki aei ibukina bwa kam karaoi karea aikai ao ibukina bwa kam bure nakon Iehova n aromi n aki ongo ni bwanaan Iehova ao n aki kakairi n ana tua, ana kaetieti, ao ana kauring, ngaia ae e a roko te kabuanibwai aei i aomi, n aron ae riki n te bong aei.”+
24 E reitia Ieremia ni kangai nakoia aomata ni kabane ao nakoia aine ni kabane: “Ongora n ana taeka Iehova, ngkami aika kaain Iuta ni kabane aika n te aba ae Aikubita.
25 E kangai ana taeka Iehova ae Atuaia taanga ni buaka, ae Atuan Iteraera, ‘Kam kakororaoi ni baimi baike kam taekin ni wimi ma buumi, bwa kam taku: “Ti na boni kakororaoi ara taeka ni bau n angakarea nakon Ueannaineni Karawa,* ao ni kabwaroa te karea ae te moi nakon neiei.”+ Ngkami aika aine, kam na boni kakoroi bukin ami taeka ni bau ma ni karaoi nanon ami taeka ni bau.’
26 “Mangaia ae kam na ongora n ana taeka Iehova, ngkami aika kaain Iuta ni kabane aika kam maeka n te aba ae Aikubita: ‘“Noria ae I a taetae n tuea ni bon oin arau ae kakannato,” bon ana taeka Iehova, “bwa e na aki manga atongaki arau n te taetae n tuea iroun temanna naba kaain Iuta+ n te aba ae Aikubita ni kabutaa ae e na kangai, ‘Ngkai bon iai te Uea ae Moan te Rietata ae Iehova!’+
27 I a tarataraiia ngkai bwa N nang karokoa te kabuanibwai, ao tiaki te bwai ae raoiroi.+ A na bane ni mate mwaane aika tibun Iuta ake n te aba ae Aikubita n te kabaang ao n te rongo, ni karokoa ae a boni mauna.+
28 Tii tabeman aika a na reke birinakoia man te kabaang ao a na oki man te aba ae Aikubita nakon te aba ae Iuta.+ Ao nikiraia kaain Iuta ni kabane ake a roko n te aba ae Aikubita ni maeka iai, a nang ataia bwa antai ana taeka ae koro bukina, ngai ke ngaiia!”’”
29 “‘Ao aio te kanikina ibukimi,’ bon ana taeka Iehova, ‘bwa N na katuuaaeingkami n te tabo aei, bwa kam aonga n ataia bwa a na boni koro bukin au taeka ake I beritana iai te kabuanibwai n ekingkami nako.
30 E kangai ana taeka Iehova: “Noria ae I a anga Barao Obeira are uean Aikubita, nako nanoni baia aiana ao te koraki ake a ukoukora anaakini maiuna,* n aron are I anga Tetekia are Uean Iuta nako nanoni bain Nebukaneta* are Ueani Baburon, are aiana ae ukoukora anaakini maiuna.”’”*+
Taiani Kabwarabwara Mai Nano
^ Ke, “Membiti.”
^ Ke, “Tabaota.” Nora Nanon Taeka.
^ Ebera, “utimwaaka ni kanakoia.”
^ Ke, “namakina te kamanatuaaki.”
^ Nakoan te atua ae te aine ae taromauriaki irouia tibun Iteraera ake a tannako man te taromauri ae koaua, ae e iangoaki bwa atuan te kakariki.
^ Nakoan te atua ae te aine ae taromauriaki irouia tibun Iteraera ake a tannako man te taromauri ae koaua, ae e iangoaki bwa atuan te kakariki.
^ Nakoan te atua ae te aine ae taromauriaki irouia tibun Iteraera ake a tannako man te taromauri ae koaua, ae e iangoaki bwa atuan te kakariki.
^ Nakoan te atua ae te aine ae taromauriaki irouia tibun Iteraera ake a tannako man te taromauri ae koaua, ae e iangoaki bwa atuan te kakariki.
^ Ebera, ne’phesh, nora Nanon Taeka.
^ Ebera, “Nebukareta,” aroni koreana teuana.
^ Ebera, ne’phesh, nora Nanon Taeka.
