Ieremia 49:1-39
49 Bwa e kangai ana taeka Iehova ibukia tibun Ammon:+
“Te koaua bwa akea natin Iteraera aika mwaane?
Ke akea te tia bwaibwai imwina?
E aera Marekam+ ngkai e a abana abani Kata?+
Ao a aera ana aomata ngkai a a maeka n ana kaawa Iteraera?”
2 “‘Mangaia ae noria! a a roko boong,’ bon ana taeka Iehova,‘Ae N na kaongongo iai karongoaan te buaka* n ekaanako Rabaa+ are aia kaawa tibun Ammon.+
E na riki neiei bwa te tabuki ae kamaroaeaki,Ao a na kabuekaki n te ai kaawa ake a mena i aana.’*
‘Ao Iteraera e na anaa abaia te koraki ake a anaa abana,’+ bon ana taeka Iehova.
3 ‘Tanginiwenei ngkoe ae Etiibon, bwa e a kamaunaaki Ai!
Takarua n tang ngkami aika kaawa ake a mena i aan Rabaa.
Karina te raerobwa.*
Tanginiwenei ao tiotionako i buakon oo ni man aika atibu,*Bwa e na irinako bwa te taenikai Marekam,Ngaia ma naake ana ibonga ao ana aomata aika tooka.+
4 E aera ngkai ko kamoamoa ibukin taiani mwarua,*Ibukin am tabo ae aoraoi ae raanga iai te ran, ngkoe ae te nati te aine ae aki kakaonimaki,Ae onimakini kaubwaina,Ao e kangai: “Antai ae e na roko n ekainako?”’”
5 “‘Akea bwa I a karokoa te bwai ae kakamaaku i aom,’ bon ana taeka te Uea ae Moan te Rietata ae Iehova ae Atuaia taanga ni buaka,*‘Mairouia aomata ni kabane akana i rarikim.
Ko na kamaeinikunaki nakon taabo aika kakaokoro nako,Ao akea ae e na ikotiia te koraki ake a birinako.’”
6 “‘Ma imwina riki ao N na ikotiia taenikai aika tibun Ammon,’ bon ana taeka Iehova.”
7 E kangai ana taeka Iehova ae Atuaia taanga ni buaka, ni kaineti ma Etom:
“Ai akea riki te wanawana i Teman?+
E a mauna te taeka n reirei ae raoiroi mairouia aomata aika ataibwai?
E a mka wanawanaia?
8 Birinako, ao rairaki!
Naako ao maeka n taabo aika nano, ngkami aika kaain Tetan!+
Bwa N na karokoa te kabuanibwai i aon Etau,Ngkana e a roko au tai ni katuuaaea.
9 Ngkana a rinnakoiko taan ikotii kureebe,Tiaki a na katikui tabeua bwa a na karemremwaki?
Ngkana a roko taan iraa n te bong,Ao a na karaoa te urubwai n aron are a bon tangiria.+
10 Ma N na buuta karabaan Etau.
N na kaotaraei ana tabo ni karabaBwa e aonga n aki kona ni karabaa.
A na bane ni kamaunaaki natina ma tarina ao kaain rarikina,+Ao e nangi bon akea.+
11 Katikuia natim aika akea tamaia,Ao N na kateimatoai maiuia,Ao a na onimakinai am aine aika a a tia ni mate buuia.”
12 Bwa e kangai ana taeka Iehova: “Noria! Ngkana a riai ni moi te koraki ake a aki katuuaaeaki bwa a na moi n te mwangko, ao te koaua bwa ko na aki katuuaaeaki ngkoe? Tiaki n ae ko na aki katuuaaeaki, bwa ko bon riai ni moi iai.”+
13 “Bwa I taetae n tuea i bon irou,” bon ana taeka Iehova, “bwa e na riki Botira bwa te bwai ni kakamaaku,+ te bwai ni kabuakakaaki, te tabo ae uruaki, ao te katoto ibukia akana karekeaki kaia. Ao a na riki kaawana ni kabane bwa taabo aika uruaki n aki toki.”+
14 I a tia n ongo te rongorongo mairoun Iehova,E kanakoaki te tia tei nako buakoia natannaomata ao e kangai:
“Ikotiingkami ao ekaanako neiei,Katauraoi nakon te buaka.”+
15 “Bwa noria! I kamangoriko i buakoia natannaomata,Ao ko ribaaki i buakoia aomata.+
16 E mwamwanaiko te kakamaaku are ko kauekea,Ao ana kan rarabakau nanom,Ngkoe ae ko maeka n tabwenan te bwaa,Ae ko maeka n te tabuki ae te kabanea n rietata.
E ngae ngke ko katea ngaom n te tabo ae rietata n aron te ikare,Ma N na karuoko mai ikanne,” bon ana taeka Iehova.
17 “Ao e na riki Etom bwa te bwai ni kakamaaku.+ A na bane naake a rirarikina ni karekea taraana ma te maaku, ao ni katiitii ibukin rekenikaina ni kabane.
18 N aroni kamaunaan Totom ma Komora ma kaawa ake i rarikia,”+ bon ana taeka Iehova, “ao akea naba ae e na maeka ikanne, ao akea te aomata ae e na mena ikanne.+
19 “Noria! E na waerake temanna n aron te raian+ man taiani buakoako aika matenten ake i rarikin te Ioretan, n ekinako tawaana aika mano raoi, ma N na kabirinakoa n tii teuana te tekan mairoun neiei. Ao teuare rineaki N na mwiokoia i aon neiei. Bwa antai ae ai arou, ao antai ae kona ni kaitaraai? Antai te tia kawakintiibu ae kona n tei imwaiu?+
20 Mangaia ae ongora ngkami aika aomata, n ana moti* Iehova are e karaoia n ekaanako Etom, ao n te bwai are e baireia n ekiianako kaain Teman:+
A na bon uaakinaki nako bunin te nanai.
E na kamaroaea aia tabo ni maeka ibukia naakai.+
21 E mwaeiei te aonnaba ni karongoaani bwakaia.
Iai te takarua!
E rokoroko n Taari ae Uraura+ ongoraean te karongoa anne.
22 Noria! E na taakina baina ni kiba i aoni Botira+N aron te ikare ae waerake ao ni baitii n titiku rikaaki.+
N te bong anne, ao a na riki nanoia taani buaka mai Etom,N ai aron nanon te aine ae bung.”
23 E kangai te rongorongo ibukin Tamateko:+
“A kamaamaeaki Amata+ ao Arebata,Bwa a ongo te rongorongo ae aki raoiroi.
A bwara nanoia n te maaku.
E mareburebu taari ae aki kona ni karauaki.
24 E a bwara nanon Tamateko.
E a rairaki ni birinako neiei, ma e taonakinako n te nakonnano.
E a tauaki n te rawawata ao n te maraki,N aron te aine ae e a bung.
25 E kangaa n aki kitanaki te kaawa ae kamoamoaaki,Ae te kaawa ni kakatonga?
26 Bwa a na bwaka ana rorobuaka n ataei neiei ni maraena nako,Ao a na bane ni mate tautia n te bong anne,” bon ana taeka Iehova ae Atuaia taanga ni buaka.
27 “N na kabueka oon Tamateko n te ai,Ao e na kabueki tauani Benataata aika nonoaki.”+
28 E kangai ana taeka Iehova ibukini Keta+ ao tautaeka n uea mai Atiora ake e kabwakai Nebukaneta* are Ueani Baburon:
“Teirake ao waerake nako Keta,Ao kamaunaia naati mwaane ake i Mainiku.
29 A na anaaki aia umwanrianna ma aia nanai,Ao kunnikain aia umwanrianna ma aia bwai ni kabane.
A na kairakinako aia kamero,Ao a na takarua ni kangai nakoia, ‘Te maakunrang n taabo nako!’”
30 “Birinako, naako nakon te tabo ae raroa!
Naako ao maeka i nano n taabo aika nano, ngkami aika kaain Atiora,” bon ana taeka Iehova.
“Bwa e a tia Nebukaneta* are Ueani Baburon, ni bairea te babaire n ekingkami nako,Ao e a tia n iangoa te babaire n ekingkami nako.”
31 “Teirake ao waerake n ekaanako te natannaomata ae rau,Ae maeka ma te mweraoi!” bon ana taeka Iehova.
“Akea mataroana ke kaai ni kamatoa. A maeka n tii ngaiia.
32 A na riki aia kamero bwa bwaai ni kuri,Ao aia nanai ni man aika bati bwa kokona n te buaka.
N na kamaenakoia nakon aang nako,*Te koraki ake a koreaki maninganingaia,+Ao N na karokoa te kabuanibwai irouia man taabo aika kakaokoro nako,” bon ana taeka Iehova.
33 “Ao e na riki Atiora bwa bwangaia tiakaore,*Ae te tabo ae kamaroaeaki n aki toki.
Akea ae e na maeka ikanne,Ao akea te aomata ae e na mena i nanon neienne.”
34 Aio ana taeka Iehova ae roko iroun Ieremia are te burabeti ni kaineti ma Eram,+ ngke e moan tautaeka Tetekia+ are Uean Iuta:
35 “E kangai ana taeka Iehova ae Atuaia taanga ni buaka, ‘Ae I a otea ana kainikatebe Eram,+ are nibwani* korakoraia.
36 N na karokoi i aon Eram aang ake aua mai taboni karawa ake aua, ao N na kamaenakoia nakon aang nako aikai. Akea te natannaomata teuana ae a na aki nako iai te koraki ake a kamaenakoaki ake kaain Eram.’”
37 “N na uruia I-Eram imwaia aiaia ao imwaia te koraki ake a ukoukora anaakini maiuia,* ao N na karokoa te kabuanibwai i aoia, ae uraraken uniu,” bon ana taeka Iehova. “Ao N na kanakoa te kabaang n rimwia ni karokoa ae I tia ni kamaunaia.”
38 “Ao N na katauraoa au kaintokanuea i Eram,+ ao N na kamauna mai ikanne te uea ma natinuea mwaane,” bon ana taeka Iehova.
39 “Ma ni kabaneani boong, ao N na ikotiia taenikai aika kaain Eram,” bon ana taeka Iehova.
Taiani Kabwarabwara Mai Nano
^ Ke tao, “karongoaan takaruaean te buaka.”
^ Ke, “ake a katobibia.”
^ Nora Nanon Taeka.
^ Ke, “ooia tiibu.”
^ Ke, “taabo aika aoraoi aika mena n te mwarua.”
^ Ke, “Tabaota.” Nora Nanon Taeka.
^ Ke, “reirei ni kairiri.”
^ Ebera, “Nebukareta,” aroni koreana teuana.
^ Ebera, “Nebukareta,” aroni koreana teuana.
^ Ke, “taabo aika kakaokoro nako.”
^ Nora Nanon Taeka, “Maan.”
^ Ebera, “moani.”
^ Ebera, ne’phesh, nora Nanon Taeka.
