Ieremia 5:1-31
5 Ririaki ni kawain nako Ierutarem.
Taratara nako ao mutiakinna.
Kakaae ni maraen nako neiei ao ko na noriaBwa ngkana ko kona ni kunea te aomata ae bwabwaina te kaetitaeka ae riai,+Ae e ukoukora bwainan te kakaonimaki,Ao N na kabwaraa ana bure neiei.
2 E ngae ngke a kangai: “Ngkai bon iai Iehova!”
Ma a bon taetae naba n tuea ni kewe.+
3 Iehova, tiaki a ukoukora te kakaonimaki matam?+
Ko oreiia, ma akea rotakia* iai.
Ko kamaunaia ma a rawa ni butimwaea te reirei ni kairiri.+
A kamatoatoai riki ubuia nakon te bwaa,+Ao a rawa n rairaki.+
4 Ma I kangai i bon irou: “Bon aomata aika mangori naakai.
A karaoa te aro n nanobaba, bwa a aki ataa kawain Iehova,Ae ana motikitaeka Atuaia.
5 N na nakoia mwaane aika kakannato ao n taetae ma ngaiia,Bwa a bae ni mutiakina kawain Iehova,Ae ana motikitaeka Atuaia.+
Ma a a bane n tia n otea te amo,Ao ni motiki bwaai n tutuki.”*
6 Anne bukina ae a ewekaki iai iroun te raian are man te buakonikai,Ao e teimatoa ni kuribwaiia te kameaanti man rereua ake a aoraoi,Ao e wenewene n aki matu te rebwari i rarikin aia kaawa nako.
A bane n raebitiaki te koraki ake a otinako mai iai,Bwa a a bati aia bure,Ao a a rangi ni bati aia mwakuri n aki kakaonimaki.+
7 N na kangaa ni kabwaraa am bure ibukin te baei?
A kitanai natim mwaane,Ao a tuea iroun ae tiaki te Atua.+
I kanuaiia ni baika a kainnanoi,Ma a teimatoa ni wene ni kimoa,Ao a roko ni mwaiti n ana auti te aine ae kakabooaki.
8 Ibukini kororaken aia kaibwabwaru n ai aroia aoti mwaane,Ao a a rimwin te aine ae buun te mwaane temanna.+
9 “Tiaki I riai ni kaetii taekaia ibukini baikai?” bon ana taeka Iehova.
“Tiaki I* riai n irantangaai ni karekea kain te aeka n natannaomata anne?”+
10 “Waerake n ekinako rabeen ana nne ni kureebe neiei ao urui,Ma tai kamaunai raoi.+
Anai bwebwena ake a kawakawanako,Bwa bon tiaki ana bwai Iehova.
11 Bwa a a bon tia n aki kakaonimakiTibun Iteraera ao tibun Iuta,” bon ana taeka Iehova.+
12 “A kakeaa Iehova, ao a teimatoa ni kangai,‘Akea te bwai ae e na karaoia.*+
E na aki roko te kabuanibwai i aora,Ao ti na aki nora te kabaang ke te rongo.’+
13 A onrake burabeti n te ang,Ao e aki mena te taeka* i nanoia.
Ke e riki aei nakoia!”
14 Mangaia ae e kangai ana taeka Iehova ae Atuaia taanga ni buaka:
“Ibukina bwa a taekina anne mwaane aikai,Ao I a karaoi au taeka bwa te ai i nanoni wim,+Ao aomata aikai bon te aia,Ao e na kabuekiia te ai.”+
15 “Ae I a karokoa iroumi ngkami aika tibun Iteraera te natannaomata man te tabo ae raroanako,”+ bon ana taeka Iehova.
“Bon te natannaomata ae teimatoa.
Bon te natannaomata mangkoangkoa,Ae te natannaomata ae kam aki ataa aia taetae,Ao kam aki kona n ota n aia taetaenikawai.+
16 Kaanga te ruanimate ae uki nnen aia kainikatebe,Ao bon taani buaka ngaiia ni kabane.
17 Ane a na kana am uaa ae taiaki ao am kariki.+
Ane a na kaniia natim mwaane ma natim aine.
Ane a na kang am nanai n tiibu ma am kao.
Ane a na kang arokam aika kureebe ao arokam aika biiku.
Ane a na kamaunai n te kabaang am kaawa aika nonoaki ake ko onimakin.”
18 “Ma ni boong naba akanne,” bon ana taeka Iehova, “Ao N na aki kamaunaingkami ni kabane.+
19 Ao ngkana a titiraki ni kangai, ‘E aera Iehova ae Atuara ngkai e karaoi baikai ni kabane nakoira?’ ao ko riai ni kaekaia ni kangai, ‘N aron are kam kitanai ao n toro iroun te atua ae ianena i abami, ao ai arona naba bwa kam na toro irouia ianena n te aba ae tiaki abami.’”+
20 Taekina aei nakoia tibun Iakoba,Ao katanoataa i Iuta, ni kangai:
21 “Ongora n aei ngkami aika aomata aika nanobaba ma n nanoroo:*+
Iai mataia ma a aki kona n noraaba.+
Iai taningaia ma a aki kona n ongo.+
22 ‘Kam aki maakai?’ bon ana taeka Iehova,‘Tiaki kam riai n rurubenebene i matau?
Boni ngai are I kaaki te tano bwa tian taari,Ae te tua ae teimatoa ae e aki kona n riaona.
E ngae ngke a mareburebu naona, ma a aki kona n tokanikai.
E ngae ngke a rurunga, ma a aki kona n riaona.+
23 Ma a imanono ao a karitei nanoia aomata aikai.
A rairakinako ao a uotii oini kawaia.+
24 Ao a aki kangai i nanoia:
“Ti na maaka ngkai Iehova ae Atuara,Are Teuare anganga te karau n taina,Ae te moani karau ao te karau are imwina riki,Are Teuare kawakin ibukira wiki ake a baireaki ibukin te mwakuri n tai.”+
25 A tuki rokoni baikai oin ami kairua,Ao ami bure a taua mairoumi te bwai ae raoiroi.+
26 Bwa iai mwaane aika buakaka i buakoia au aomata.
A teimatoa ni kaninganinga, n aroia taani kamwaneia mannikiba ngkana a wene ni baraaki.
A katauraoa te bwai ni kamwane ae kamamate.
Bon aomata aika a kamwaneia.
27 N aron te oo ae onrake irouia mannikiba,Ao ai aron naba aia auti bwa a onrake n te mwamwanaa te aba.+
Anne bukina ae a a mwaaka iai ao ni kaubwai.
28 A a rikirake ni marika ao ni maratirati.
A onrake n te buakaka,Ao a aki tei ibukin aia tangitang akana akea tamaia,+Bwa e aonga n reke nakoraoin aroia,Ao a aki anga te kaetitaeka ae riai nakoia akana maiu ni kainnano.’”+
29 “Tiaki I riai ni kaetii taekaia ibukini baikai?” bon ana taeka Iehova,“Tiaki I* riai n irantangaai ni karekea kain te aeka n natannaomata anne?
30 E a riki te bwai ae kakubanako ao ae rangi ni buakaka n te aba:
31 A taetae ni burabetini keewe taiani burabeti,+Ao ibonga* a taui aroia aomata ni bon oini mwaakaia.
Ao a tangira te aekaki anne au aomata.+
Ma tera ae kam na karaoia ngkana e a roko te toki?”
Taiani Kabwarabwara Mai Nano
^ Ebera, “a aki mamaara.”
^ Ebera, “bwaai ni kabaebae.”
^ Ebera, ne’phesh, nora Nanon Taeka.
^ Ke tao, “Akea ngaia.”
^ Ae taekan ana taeka te Atua.
^ Ebera, “ngkami aomata aika kam baba aika akea nanomi.”
^ Ebera, ne’phesh, nora Nanon Taeka.
^ Nora Nanon Taeka.
