Ieremia 51:1-64
51 E kangai ana taeka Iehova:
“Akea bwa I a kateirakea te ukeukennantiN ekaanako Baburon+ ma kaain Rebakamai.*
2 N na kanakoia nako Baburon taani kaaki kun,Ao a na kaaki kunin neiei ao ni kakeaia kaain abana.
A na roko n ekaanako neiei n itera ni kabane ni bongin te rawawata.+
3 E bia aki kabwaoua* ana kainikatebe te tia katebe.
Ao e bia aki teirake temanna ma ana kunnikai ni buaka.
Tai nanoangaiia ana rorobuaka n ataei neiei.+
Kamaunaia ni kabane ana taanga ni buaka.
4 Ao a na bwaka bwa a kamateaki i abaia I-Kareria,A ewaraki ni kawain nako neiei.+
5 Bwa a aki riki Iteraera ma Iuta bwa aine aika a a tia ni mate buuia, bwa e aki kitania Iehova ae Atuaia taanga ni buaka.*+
Ma n ana taratara Teuare Tabu iroun Iteraera, e onrake abaia* n te bure.
6 Kam na birinako mai nanoni Baburon,Ao rabanako n rawei maiumi.*+
Tai mate ibukin ana bure neiei.
Bwa bon ana tai Iehova ni karekekai.
E a angan neiei boon ana mwakuri ibukin te baere e a tia ni karaoia.+
7 E riki Baburon bwa te mwangko ae te koora i nanoni bain Iehova.
E kakoroia ni manging kaain te aonnaba ni kabane neiei.
A a koro ni manging natannaomata n ana wain neiei,+Anne bukina ae a rangirang iai natannaomata.+
8 E a rina ni bwaka Baburon ao e a mwaoto.+
Tanginiwenei ibukin neiei!+
Anaa te batiam* ibukini marakina, bwa tao ane e na kamarurungaki iai.”
9 “Ti kataia ni kamarurunga Baburon, ma e a aki kona ni kamarurungaki neiei.
Katikua ao ti a nako, temanna ma temanna nakon abana.+
Bwa e a rokoroko i karawa arona aika e riai ni motikaki iai taekana.
E a rietata n aron taian nang.+
10 E karokoa te kaetitaeka ae riai Iehova ibukira.+
Nakomai bwa ti na karakina i Tion ana mwakuri Iehova ae Atuara.”+
11 “Taimi kanoan te kainikatebe,+ ao tabeki otanga aika mronron.*
E kauekei nanoia ueani Miria Iehova,+Ibukina bwa e iangoia bwa e na kamauna Baburon.
Bwa bon ana karekekai Iehova, ae ana karekekai ibukin ana tembora.
12 Katea te kanikina*+ n ekinako ooni Baburon.
Kakorakoraa te tantani, ao kateiia taan tantani n aia tabo.
Katauraoiia taani karan.
Bwa e karioa te babaire Iehova,Ao e na kakororaoa te baere e beritanna n ekiianako iai kaaini Baburon.”+
13 “Ngkoe ae te aine ae ko maeka i aon raan aika bati,+Ma kaubwaim aika bati,+Ko a roko n tokim, ao tian* arom ni karekea am raka.+
14 E a tia Iehova ae Atuaia taanga ni buaka n taetae n tuea i bon irouna ni kangai,‘N na kaoniko irouia mwaane aika rangi ni bati n aroia rokati,Ao a na takarua n tokanikai i aom.’+
15 Boni ngaia te tia Karaoa te aonnaba ni mwaakana,Are Teuare katea ni kamatoaa te aba ae maiureirei ni wanawanana,+Ao e taakina karawa n ana ataibwai.+
16 Ngke e kaongongo bwanaanaAo a mareburebu raan ake i karawa,Ao e karaoi taian nang* bwa a na waerake mai tabon nako aonnaba.
E karaoa te iti ibukin te karau,Ao e kaotinakoa te ang man ana auti ni kaikobwai.+
17 A bane aomata ni karaoi aia waaki ma te ronnano ao akean te atatai.
A na bane ni kamaamaeaki taani mwakuria te biti, ibukin te bouannanti ae kaaraki.+
Bwa bon te kewe aia bouannanti ae te biti*Ao akea te taamnei* i nanoia.+
18 Boni baika kewe,*+ ae baika karaoaki aika tau ni kakanikoaki,A na mauna ngkana e roko aia bong ni katuuaaeaki.
19 Ma e kaokoro Atuan* Iakoba ma baikai,Bwa boni Ngaia ae karikii bwaai nako,Ao tibwangana naba ae te kabanea ni kakawaki.+
Arana bon Iehova ae Atuaia taanga ni buaka.”+
20 “Au kai n oro ngkoe ibukin te buaka, ae te bwai ni buaka,Bwa N na ibeibeiia natannaomata iroumAo N na kamaunai tautaeka n uea iroum.
21 N na ibeibea te aoti ma te tia toka i aona iroum.
N na ibeibea te kaa ni buaka ma te tia toka i aona iroum.
22 N na ibeibea te mwaane ma te aine iroum.
N na ibeibea te unimwaane ma te teinimwaane iroum.
N na ibeibea te rorobuaka n ataei ma te aine iroum.
23 N na ibeibea te tia kawakintiibu ma ana nanai iroum.
N na ibeibea te tia ununiki ma ana man aika kakamarautano iroum.
N na ibeibeiia taiani kowana ma taan tautaeka aika taiani kauoman iroum.
24 Ao N na angani Baburon boona ma kaaini Kareria ni kabane,Ibukini mwakuri aika bubuaka ni kabane ake a karaoi i Tion i matami,”+ bon ana taeka Iehova.
25 “Akea bwa I a ekikonako+ ngkoe ae te maunga n urubwai,” bon ana taeka Iehova,“Ngkoe ae te tia kamauna te aonnaba ni kabutaa.+
N na arora baiu n ekikonako ao ni karabinoko rikaaki man taiani bwaa,Ao ni karaoiko bwa te maunga ae buetata.”
26 “Ao aomata a na aki anaa mairoum atibun te maninganinga ke te atibu ae aan te kateitei,Ibukina bwa ko na kamaroaeaki n aki toki,”+ bon ana taeka Iehova.
27 “Katea te kanikina* n te aba.+
Katanga te buu i buakoia natannaomata.
Mwiokoiia* natannaomata bwa a na ekaanako neiei.
Weteiia tautaeka n uea ake i Ararata,+ Minni, ao Atikenati,+ bwa a na ekaanako neiei.
Mwiokoa te mataniwi n tautia bwa e na ekaanako neiei.
Kawaerakeia aoti n aroia rokati aika kateketeke.
28 Mwiokoiia* natannaomata bwa a na ekaanako neiei,Ueani Miria,+ kowana ake iai, ao taan tautaeka ni kabane aika taiani kauoman ake iai,Ao aaba ni kabane ake a tautaekan.
29 Ao e na mwaeiei te aonnaba ma n ruru,Bwa a na kakororaoaki ana iango Iehova n ekaanako Baburon,Ni karaoa te aba ae Baburon bwa te bwai ni kakamaaku, ao e na akea kaaina.+
30 A a katoka aia buaka taani buaka mai Baburon.
A tekateka n aia nono.
Ai akea korakoraia.+
A a riki bwa kaanga aine.+
A kabuekaki mwengan neiei.
Ao a uruakaki kaini kamatoaan neiei.+
31 E biribiri te tia uataeka temanna bwa e na kaitiboo ma te tia uataeka are temanna riki,Ao te tia uota te rongorongo temanna ma te tia uota te rongorongo are temanna riki,Bwa a na kaongoa ueani Baburon ae e a tia n tauaki ana kaawa, man itera nako,+
32 A a tia n tauaki kaoran te karaanga,+A a tia ni kabuekaki n te ai booti aika karaoaki man te aroka ae riiriki n te ran,*Ao a a maakunrang tautia.”
33 “Bwa e kangai ana taeka Iehova ae Atuaia taanga ni buaka ae Atuan Iteraera:
“E a riki natini Baburon ae te aine bwa kaanga te tabo ni kaaki kun ni uita.
Aei te tai n toutoua neiei.
E a rangi ni kaan te tai ao e na roko te tai n tai ibukin neiei.”
34 “E kabwautai Nebukaneta* are Ueani Baburon.+
E kamangaongaoai.
E karaoai bwa kaanga te mwangko ae akea kanoana.
E kabwautai n aron te naeta ae bubura.+
E kaona birotona n au bwai aika raraoi.
E tebokainako ni kanakoai.
35 ‘E bia roko i aoni Baburon te iowawa are karaoaki nakoiu ao nakon rabwatau!’ bon ana taeka kaain Tion.+
‘Ao e bia mena raraau i aoia kaaini Kareria!’ bon ana taeka Ierutarem.”
36 Mangaia ae e kangai ana taeka Iehova:
“Akea bwa I a tei ibukin am tangitang,+Ao N na karokoa te karekekai ibukim.+
N na kabwatakatakaa marawan neiei ao ni kabwatakatakai mwanibwan neiei.+
37 Ao e na riki Baburon bwa te bwariko n atibu,+Bwangaia tiakaore,*+Te bwai ni kakamaaku, ao te bwai ae e na katiitii te aba iai,Ao e na akea kaaina.+
38 A na bane ni bekorara n aroia raian aika ataei.
A na tangitang n aroia bunia raian.”
39 “Ngkana e a roko nanoia, ao N na katauraoa aia baka n amwarake ao ni kakoroia ni manging,Bwa a aonga ni kakatonga.+
Imwina ao a na matu n te matu ae teimatoa,Ae a na aki uti mai iai,”+ bon ana taeka Iehova.
40 “N na karuoia rikaaki n aroia tiibutetei nakon te kamateaki,N aroia tiibu mwaane n ikotaki ma kooti.”
41 “E a tauaki kangaa Tetiaka,*+E a tauaki kangaa ana bwai ni Kamoamoa te aonnaba ni kabutaa!+
E a riki kangaa Baburon bwa te bwai ni kakamaaku i buakoia natannaomata!
42 E a roko taari i aoni Baburon.
E a rabunaki neiei n naona aika mwaitikurikuri.
43 A a riki kaawan neiei bwa te bwai ni kakamaaku, te aba ae akea te ran iai, ao te rereua.
Bon te aba ae akea temanna ae e na maeka iai, ao akea te aomata ae e na rinanona.+
44 N na rairakia Bere+ i Baburon,Ao N na kaotinakoa mai wina te baere e a tia n ongnga.+
A na aki manga raanga nakoina natannaomata,Ao e na bwaka ooni Baburon.+
45 Au aomata,+ kam na otinako mai nanon neiei!
Rabanako n rawei maiumi*+ man uraraken unin Iehova!+
46 A na tai nimamate nanomi ke ni maaku ibukin te rongorongo are e na ongoraeaki n te aba.
E na roko te rongorongo i nanon teuana te ririki,Ao manga te rongorongo riki teuana n te ririki are imwina,Ae taekan te iowawa n te aba, ao te tia tautaeka temanna ae ekaanako te tia tautaeka temanna.
47 Mangaia ae noria! a a roko boongAe N na rairakia iai bouannantini Baburon aika kaaraki.
E na kamaamaeaki aban neiei ni kabutaa,Ao a na bane ni bwaka i nanona ana aomata ake a kamateaki.+
48 A na takarua ni kimwareirei ibukini Baburon,Karawa ma te aonnaba ao bwaai ni kabane ake iai,+Bwa a na roko iroun neiei taani kakamauna mai meang,”+ bon ana taeka Iehova.
49 “E aki tii kabwakaia tibun Iteraera ake a kamateaki Baburon,+Ma a bwaka naba i Baburon aomata n te aonnaba ni kabutaa ake a kamateaki.
50 Ngkami aika reke birinakomi man te kabaang, waakinako, ao tai tei n aki kakammwakuri!+
Uringa Iehova man te tabo ae raroa,Ao kam bia manga uringa Ierutarem i nanomi.”+
51 “Ti kamaamaeaki bwa ti ongo taiani kakaniko.
A rabunaki ubura n te bwaibwainrang,Bwa a roko iabatera* n ekinako taabo aika tabu n ana auti Iehova.”+
52 “Mangaia ae noria! a a roko boong,” bon ana taeka Iehova,“Ae N na rairakia iai ana bouannanti neiei aika kaaraki,Ao a na ngirangira te koraki aika ikoaki i aban neiei ni kabutaa.”+
53 “E ngae ngkana e rietata nako karawa Baburon,+Ao e ngae ngkana e kamatoatoai ana nono aika rangi n rietata,Ma a na bon roko mairou taani kamauna neiei,”+ bon ana taeka Iehova.
54 “Ongora! Iai te tang mai Baburon,+Ae karongoaan te kabuanibwai ae korakora mai abaia I-Kareria,+
55 Bwa e a kamauna Baburon Iehova,E na kainabwabua bwanaana ae korakora,Ao a na rurunga naoia n aron raan aika bati.
E na ongo te aba karongoaani bwanaaia.
56 Bwa e na roko i aoni Baburon te tia kakamauna,+Ao a na tauaki ana tia buaka neiei,+Ao a na uruakaki aia kainikatebe.
Bwa Iehova bon te Atua ae kakarekekai,+E na bon angania booia.+
57 N na kakoroia ni manging tokan neiei ao ana rorobuaka aika wanawana,+Ana kowana ao ana tia tautaeka aika taiani kauoman ao ana tia buaka,Ao a na matu n te matu ae teimatoa,Ae a na aki uti mai iai,”+ bon ana taeka te Uea, ae arana Iehova ae Atuaia taanga ni buaka.
58 E kangai ana taeka Iehova ae Atuaia taanga ni buaka:
“E na bon uruakaki ooni Baburon e ngae ngke e raababa,+Ao a na kaurarakeaki n te ai mataroan oona e ngae ngke a rietata.
A na korakai botannaomata ibukin te akea,Ao a na kakuaia i bon irouia natannaomata tii ibukini kanaan te ai.”+
59 Aio te taeka ae e anga Ieremia are te burabeti bwa te tua nakon Teraia are natin Neria+ are natini Mateia, ngke e airi ma Tetekia are Uean Iuta nako Baburon, n ana kaaua n ririki n tautaeka. Teraia bon te mataniwi i aon ana bwai te uea.
60 E korei Ieremia n te boki teuana taekan te kabuanibwai ni kabane ake a na roko i aoni Baburon, a koreaki taeka aikai ni kabane n ekaanako Baburon.
61 Irarikin anne ao e taku Ieremia nakon Teraia: “Ngkana ko roko i Baburon ma n nora neiei, ao ko riai ni wareki taeka aikai ni kabane ni kabaibati.
62 Ao kangai, ‘Iehova, ko a tia n taetae n ekaanako te tabo aei bwa e na boni kamaunaaki ao e na tiku n akea kaaina, ae te aomata ke te man, ao e na kamaroaeaki n aki toki.’+
63 Ao ngkana ko tia ni wareka te boki aei, ao kabaea te atibu iai ao karenakoa nako nukan te Iuberetiti.
64 Ao kangai, ‘Anne aroni Baburon n iinako, ao e na aki manga otirake+ ibukin te kabuanibwai ae I a karokoa i aon neiei. Ao ane a na nimamate.’”+
Akanne kabanean ana taeka Ieremia.
Taiani Kabwarabwara Mai Nano
^ N taraana ao bon arani Kareria ni karaba.
^ Ebera, “toua.”
^ Ke, “Tabaota.” Nora Nanon Taeka.
^ Ae taekan abaia I-Kareria.
^ Ebera, ne’phesh, nora Nanon Taeka.
^ Nora Nanon Taeka.
^ Ke tao, “kaoni nneni kanoan taiani kainikatebe.”
^ Ke, “te kai ae te kanikina.”
^ Ebera, “mwaitin.”
^ Ke, “taiani buane.”
^ Ke, “te bouannanti ae kaburoaki n atoaki.”
^ Ke, “ikeike.” Nora Nanon Taeka, “Taamnei.”
^ Ke, “akea uaaia.”
^ Ebera, “tibwangan.”
^ Ke, “te kai ae te kanikina.”
^ Ebera, “Katabuia.”
^ Ebera, “Katabuia.”
^ Ebera, “babirati.” Te aroka ae riki n te neinei ao e kona ni beibeti kaina.
^ Ebera, “Nebukareta,” aroni koreana teuana.
^ Nora Nanon Taeka, “Maan.”
^ N taraana ao bon arani Babera (Baburon) ni karaba.
^ Ebera, ne’phesh, nora Nanon Taeka.
^ Ke, “ianena.”
