Ieremia 52:1-34
52 Bon 21 ana ririki Tetekia+ ngke e riki bwa te uea, ao e tautaeka i Ierutarem i nanon 11 te ririki. Aran tinana Amutara+ are natin Ieremia are kaain Ribena.
2 E teimatoa ni karaoa ae buakaka teuaei i matan Iehova, ni kaineti ma bwaai ni kabane ake e karaoi Ieoiakim.+
3 A riki baikai i Ierutarem ao i Iuta ibukin unin Iehova, ni karokoa ae e bon tewenakoia mai matana.+ Ao e karitei Tetekia nakon ueani Baburon.+
4 N ana karuaiwa n ririki n tautaeka Tetekia, n te katebwina n namwakaina ae tebwina iai bongin te namwakaina, ao e a roko Nebukaneta* are Ueani Baburon ma ana taanga ni buaka ni kabane n ekaanako Ierutarem. A kaembwa n ekianako ao a katea te oo ni buaka n otabwaninia ni kabutaa.+
5 Ao e a otabwaniniaki te kaawa ni karokoa ana ka-11 n ririki n tautaeka te Uea are Tetekia.
6 N te kaaua n namwakaina n te karuaiwa ni bong+ ao e a korakora te rongo n te kaawa, ao ai akea te amwarake ibukia kaain te aba.+
7 N tokina ao e a uruakaki ni kabwangabwangaaki oon te kaawa ao a a bane tautia ni birinako ngke e a bong, n rinanoni mataroan te oo are i marenan oo ake uoua ake i rarikin ana onnaroka te uea, ngke a tabe I-Kareria n otabwaninia te kaawa. Ao a touaanako kawaia ni kawain te Arabaa.*+
8 Ma a kakioa te uea aia taanga ni buaka I-Kareria, ao a ooa Tetekia+ n rereuan Ieriko ake a aoraoi, ao a bane n uamaenako ana taanga ni buaka mai rarikina.
9 Ao a taua te uea ao a kairia nakon ueani Baburon i Ribera n te aba ae Amata, ao e bairea taekana.
10 Ao ueani Baburon e kamateia natin Tetekia mwaane bon i matana, ao e bane naba ni kamateia tokan Iuta ikanne i Ribera.
11 Ao ueani Baburon e kamataki matan Tetekia+ ma ni kabaea teuaei ni bwaai ni kabaewae aika taiani buraati, ao e kairia nako Baburon, ao e kamatawarikia ni karokoa te bong are e mate iai.
12 N te kanimaua n namwakaina ae tebwina iai bongin te namwakaina, ae i nanon ana ka-19 n ririki n tautaeka te Uea are Nebukaneta* are ueani Baburon, ao e a roko i Ierutarem Nebutaratan are mataniwia taan tantani, are ana toro ueani Baburon.+
13 E kabueka ana auti Iehova+ ma ana auti* te uea, ao auti ni kabane ake i Ierutarem. E bane naba ni kabueki aia auti aomata nako aika kakannato.
14 Ao a kabwakaaki oo ake a katobibia Ierutarem irouia aia taanga ni buaka I-Kareria ni kabane, ake a raona mataniwia taan tantani.+
15 Ao Nebutaratan are mataniwia taan tantani e kairiia bwa taenikai tabeman mai buakoia aomata aika mangori, ao nikiraia aomata ake a tiku n te kaawa. E kairiia naba naake a birinako ma ni mena n ana itera ueani Baburon, n ikotaki ma nikiraia taani karaobwai aika mwaatai.+
16 Ma Nebutaratan are mataniwia taan tantani e katikuia tabeman mai buakoia kaain te aba aika taiani kabanea ni maiu ni kainnano, bwa a na riki bwa taani mwakuria te nne ni kureebe ao taani mwakuri aika tautoronaki.+
17 Ao I-Kareria a ibeibei boua ake buraati+ ake n ana auti Iehova, ao kaa n uabwai+ ma nnen te ran ae buburakaei are arana Taari ae te buraati+ ake n ana auti Iehova, ao a uotiinako buraati ni kabane nako Baburon.+
18 A anai naba nnen taiani mannang, tiaabora, taati ibukini kamatean taura, boora,+ mwangko,+ ao bwaai ni mwakuri ni kabane aika taiani buraati ake a kabonganaaki n te mwakuri n te tembora.
19 Ao mataniwia taan tantani e anai beetin,+ baan ake nneni mwaakaron te ai, boora, nnen taiani mannang, kaintaura,+ mwangko, ao boora aika koora ma tirewa ni koaua.+
20 Ni kaineti ngkanne ma boua ake uaai, nnen te ran ae bubura are arana Taari, kaao mwaane ake 12+ ake a mena i aani nnen te ran ae bubura aei, ao kaa n uabwai ake e karaoi Toromon ibukin ana auti Iehova, e a rangi n riao rawawatani buraatini baikai ni kabane.
21 Ni kaineti ngkanne ma boua akanne, bon 18 te mwanokunibai* rietani kaka teaina te boua, ao bon 12 te mwanokunibai abwakin te kora ni baire ae kona ni katobibiaki iai,+ ao matentenna bon raababan aai te tabonibai,* ao e bwangabwanga nanona.
22 Ao te tiabita* are i aona bon te buraati, ao rietan teuana te tiabita bon nimaua te mwanokunibai,+ ao te warawara ma bamkuranete* ake a katobibia te tiabita ni kabutaa bon taiani buraati ni kabane. Anne naba aron te boua are te kauaai, ma bamkuranete ake iai.
23 Iai bamkuranete aika 96 i aon iteraia, ikotakini mwaitiia ni kabane bon 100 te bamkuranete aika katobibia te warawara.+
24 Ao mataniwia taan tantani e kairaanako naba Teraia+ are te mataniwi n ibonga,* Tebania+ are te kauoman n ibonga, ao taan teiakina te mataroa aika teniman.+
25 Ao e kairaanako man te kaawa te mataniwi temanna are mena i aoia tautia, raoraon te uea ni kaan aika itiman ake a kuneaki n te kaawa, n ikotaki naba ma ana tia koroboki te mataniwi n te taanga ni buaka, are e ikoikotiia kaain te aba, ao rorobuaka aika 60 mai buakoia kaain te aba aika mangori ake a kuneaki n te kaawa.
26 Ao Nebutaratan are mataniwia taan tantani e anaiia naakai ao e kairiia nakon ueani Baburon i Ribera.
27 Ao e oreiia naakai ueani Baburon ao e kamateia i Ribera+ n te aba ae Amata. Ngaia are a kairakinako kaain Iuta bwa taenikai mai abaia.+
28 Aikai aomata ake e kairiianako Nebukaneta* bwa taenikai, n ana kaitiua n ririki n tautaeka, bon I-Iutaia aika 3,023.+
29 N ana ka-18 n ririki n tautaeka Nebukaneta,*+ ao a kairaki aomata* aika 832 mai Ierutarem.
30 N ana ka-23 n ririki n tautaeka Nebukaneta,* ao Nebutaratan are mataniwia taan tantani e kairiia bwa taenikai I-Iutaia, aika 745 aomata.*+
Ikotaia ni kabane ake a kairakinako bwa taenikai bon 4,600 aomata.*
31 N ana ka-37 n ririki n taenikai Ieoiakin+ are Uean Iuta, n te ka-12 n namwakaina, ae 25 iai bongin te namwakaina, ao Ewiramerotaka are Ueani Baburon e a kainaomataa* Ieoiakin are Uean Iuta man te karabuuti, n te ririki are e a riki iai bwa te uea.+
32 E tataetae ma te akoi nakon teuaei, ao e karietataa riki ana kaintokanuea nakon aia kaintokanuea ueea ake tabemwaang ake raona i Baburon.
33 Mangaia are e buutii kunnikaina ni kabureaki Ieoiakin, ao e amwamwarake i matana ni kabane ana bong ni maiu.
34 E rereke kanana mairoun ueani Baburon ni katoabong, ni karokoa te bong are e mate iai, ni kabane ana bong ni maiu.
Taiani Kabwarabwara Mai Nano
^ Ebera, “Nebukareta,” aroni koreana teuana.
^ Ke, “te rereua ae aoraoi.”
^ Ebera, “Nebukareta,” aroni koreana teuana.
^ Ke, “baareti.”
^ Nora Nanon Taeka.
^ Nora Nanon Taeka.
^ Nora Nanon Taeka, “Mataniwi n ibonga.”
^ Ebera, “Nebukareta,” aroni koreana teuana.
^ Ebera, “Nebukareta,” aroni koreana teuana.
^ Ebera, ne’phesh, nora Nanon Taeka.
^ Ebera, “Nebukareta,” aroni koreana teuana.
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ebera, “tabekaarake atun.”
