Ieremia 6:1-30
6 Kataningkami, ngkami aika tibuni Beniamin, birinako mai Ierutarem.
Katanga te buu+ i Tekoa,+Ao kauraa te ai ae te kanikina i aoni Betaakerim!
Bwa e kanenei te rawawata mai meang, ae te kabuanibwai ae korakora.+
2 E katotonga te aine ae baaraoi ao ae kakateke natin Tion te aine.+
3 A na roko taani kawakintiibu ma aia nanai.
A na katei aia umwanrianna i rarikin neiei ni kabutaa,+Ao a kaamwarakeia aia nanai n aia tabo ngaiia n tatabemania nako.+
4 “Katauraoi* ibukini buakanan neiei!
Teirake ao ti na buakana neiei n te tawanou!”
“Ke e reke kaira bwa e a kaan toki te ngaina,Bwa e nang roko roon te tairiki!”
5 “Teirake ao ti na buaka n te bong,Ao ni kamaunai tauan neiei aika nonoaki.”+
6 Bwa e kangai ana taeka Iehova ae Atuaia taanga ni buaka:*
“Korea te kai ni kabwakaa ao katea te nono ni buaka n ekaanako Ierutarem.+
Neiei bon te kaawa ae riai ni katuuaaeaki,Akea riki te bwai teuana i nanona ma tii te karawawata.+
7 N aron te mwarua n ran ae kateimatoa mwaitoron* ranna,Ao ai aron naba neiei bwa e kateimatoa mwaitoroni* buakakana.
E ongoraeaki te tiritiri ma te urubwai i nanona,+Ao e teimatoa te aoraki ao te rekenikai i matau.
8 Butimwaea kaetam ngkoe ae Ierutarem bwa I* kaawa n tannako mairoum bwa I koro n ribaiko.+
N na karaoiko bwa te aba ae kamaroaa ae akea kaaina.”+
9 E kangai ana taeka Iehova ae Atuaia taanga ni buaka:
“A na ikotii raoi nikiraia tibun Iteraera bwa kaanga nikirani kureebe i aon te kai ae te kureebe.
Manga arora baim n ai aron te aomata ae ikotii kureebe mani kaai aika kureebe.”
10 “Antai ae I riai n taetae nakoina ao n anga te kauring nakoina?
Antai ae e na ongo?
Noria! A bono* taningaia ngaia ae a aki kona ni kakauongo.+
Noria! E riki ana taeka Iehova irouia bwa te bwai ae a kabuakakaa,+Akea kukureia iai.
11 Mangaia ae I a onrake n unin Iehova,Ao I a kua n taotaona nanou.”+
“Kabwaroa i aon te teei i nanon te kawai,+I aoia te koraki n rorobuaka n ataei ake a ikoikotaki.
A na bane n tauaki, te mwaane n ikotaki ma buuna,Ao ake a a kara n ikotaki ma ake a a karatingotingo.*+
12 Ao aia auti a na anganaki tabemwaang,N ikotaki ma aia tawaana ao aine ake buuia.+
Bwa N na arora baiu n ekiianako kaain te aba,” bon ana taeka Iehova.
13 “Bwa a karekea aia raka n te babakanikawai ngaiia n tatabemania nako, mairoun ae te kabanea ni mangori ni karokoa ae te kabanea ni kakannato,+Ao a babakanikawai ngaiia n tatabemania nako, mairoun te burabeti ni karokoa te ibonga.*+
14 Ao a kataia ni kaoka uruakia* au aomata, n aki akaka,* ngke a kangai,‘Iai te rau! Iai te rau!’
Ao bon akea te rau.+
15 Te koaua bwa a maamaa ni baika riribaaki ake a karaoi?
Bon akea naba maamaaia teutana!
A aki naba ataa namakinan te bwainrang!+
Mangaia ae a na bwaka i buakoia akana bwaka.
Ao a na tatanako ngkana I karokoa i aoia te katuuaaeaki,” bon ana taeka Iehova.
16 E kangai ana taeka Iehova:
“Teei i tutani kawai ao noria.
Titiraki ibukini kawai ake ngkoangkoa,Titiraki bwa e nga te kawai ae raoiroi ao nakonako iai,+Ao karekei motirawami iai.”
Ma a taku: “Ti na aki nakonako iai.”+
17 “Ao I rineiia taan tantani+ ake a taku,‘Kakauongo nakon tangin te buu!’”+
Ma a taku: “Ti na aki kakauongo.”+
18 “Mangaia ae ongora ngkami aika natannaomata!
Ao ngkami aika kam ikotaki,Ataa te bwai ae e na riki nakoia.
19 Ongora ngkoe ae te aonnaba!
Ae I a karokoa i aoia aomata aikai te kabuanibwai+Bwa uaan oin aia babaire,Bwa a aki mutiakin au taekaAo a rawa nakon au tua.”*
20 “Tera ae I tabe iai ngkai kam uotaamai te ribano* mai TiebaAo te kaitioka* man te aba ae raroanako?
A aki butimwaeaki ami karea ni kabuekaki aika bwanin,Ao a aki kakukureiai ami karea.”+
21 Mangaia ae e kangai ana taeka Iehova:
“Ae I a kaaki bwaai ni kabwakabwaka ibukia aomata aikai,Ao ane a na tatanako iai,Taama ma naati mwaane,Ao aomata nako ma raoia,Ao a na bane ni mate.”+
22 E kangai ana taeka Iehova:
“Noria! E a roko te natannaomata man te aba are i meang,Ao e na kautaki te natannaomata ae korakora man taabo aika taiani kabanea n raroanako n te aonnaba.+
23 A na taua te kainikatebe ma te koro.
A iowawa ao e na akea aia nanoanga.
E na rurunga bwanaaia n aron taariAo a toka i aoia aoti.+
A baireiia raoi ni baireaia taani buaka n aron te aomata ae buakaniko ngkoe ae natin Tion te aine.”
24 Ti ongo taekana.
A mamaara baira,+Ao e taoniranako te rawawataMa te maraki* n aron te aine ae nangi bung.+
25 Tai otinako nakon te tawaana,Ao tai nakonako i nanon te kawai,Bwa iai ana kabaang te tia kairiribaiAo e mena te maakunrang n taabo nako.
26 Ao ngkoe ae te aine ae natiia au aomata,Karina te raerobwa*+ ao rabinobino i buakon te mannang.
Ko na tang n te tanginiwenei ae korakora kaanga ibukin te nati te mwaane ae te rikitemanna,+Bwa e na rina n roko i aora te tia kamauna te aba.+
27 “I karaoiko* bwa te tia tuoa te biti i buakoia au aomata,Ae te aomata ae karaoa raoi te tutuo,Ao ko riai ni mutiakin ao n neneri raoi kawaia.
28 Boni mwaane ngaiia ni kabane aika taiani kabanea n imanono,+Aika nanakonako bwa taan uarao.+
Titeboo ngaiia ma te buraati ao te biti.
A bane ni babakanikawai.
29 E kakorakoraa temanna ni kaitiakiia,N te aro are a a bue naba ana bwai ni mwakuri.
Ma e matebuaka ana kakorakora ni kaitiakiia, ibukina bwa a bane ni buakaka.+
Bon tii te buange ae otinako man te ai.+
30 Ao aomata a na bon arania naakai bwa tirewa aika kaakiaki,Bwa e a kaaki taekaia Iehova.”+
Taiani Kabwarabwara Mai Nano
^ Ebera, “Katabu.”
^ Ke, “Tabaota.” Nora Nanon Taeka.
^ Ke, “booureirein.”
^ Ke, “booureireini.”
^ Ebera, ne’phesh, nora Nanon Taeka.
^ Ebera, “A aki korotobibiaki.”
^ Ebera, “koro raoi aia bong.”
^ Nora Nanon Taeka.
^ Ke, “n te aro ae aki tau.”
^ Ke, “mwaotoia.”
^ Ke, “kaetieti.”
^ Nora Nanon Taeka.
^ Bon te aroka ae boiarara. E aki ataaki raoi bwa tera te aeka n aroka aei.
^ Ebera, “te ariri ni maraki.”
^ Nora Nanon Taeka.
^ Ae taekan Ieremia.
