Iobi 22:1-30
22 E kaeka ni kangai Eribati+ are te I-Teman:
2 “E kona ni bongana te mwaane iroun te Atua?
Ao e kona ni manena irouna temanna ae iai ana ataibwai?+
3 Te koaua bwa e tabe Teuare Moan te Mwaaka* ngkai ko raoiroi,Ke iai te bwai ae e na reke irouna ngkai ko teimatoa ni bwabwaina te aro ae eti?+
4 E na katuuaaekoAo ni kateiko n te boowi ibukini karineana iroum?
5 Tiaki ibukina bwa e a rangi ni korakora buakakam,Ao akea tokin am bure?+
6 Bwa ko taumatoaa te bwai ni kakoaua mairouia tarim n akea bukina,Ao ko buutii aia kunnikai aomata ao a a tiku n akea karabaaia.+
7 Ko aki angan ane e a kua nimana te ran,Ao ko taua te amwarake mairoun ane e a baki.+
8 Te aba bon ana bwai te mwaane ae korakora,+Ao e maeka iai ane e tatangiraki riki.
9 Ma ko kanakoia aine ake a a tia ni mate buuia n akea uotaia,Ao ko kamanatuai baia ataei ake akea tamaia.*
10 Anne bukina ae ko otabwaniniaki iai ni bwaai ni kamwane,+Ao a kakamaakuko bwaai ni kakamaaku aika karina.
11 Anne bukina ae e a rangi n roo ao akea te bae ko kona n noria,Ao e rabuniko ranin te ieka.
12 Tiaki e mena te Atua i etani karawa?
Ao tarai rietatan itoi ni kabane.
13 Ma ko taku: ‘Te koaua bwa iai ana atatai te Atua?
E kona ni motikitaeka ribuakon te rotongitong ae matenten?
14 E tukaki n naang mangaia are akea te bae e noria,Ngke e nanakonako ni mronronin karawa.’
15 Ko na iraanako te kawai are mangkoa,Are a nakonako iai mwaane aika buakaka,
16 Ake mwaane ake a buritaki n anaaki* imwain aia tai,Ake a uotakinako aaia n te ieka?*+
17 A taku nakon te Atua ae koaua: ‘Katikuira ma arora!’
Ao ‘Tera ae e kona ni karaoia Teuare Moan te Mwaaka nakoira?’
18 Ma boni Ngaia ae e kaoni aia auti ni baika raraoi.
(E raroa ma au iango te aeka n iango ane buakaka anne.)
19 A na nora aei aomata aika raoiroi ao a na kimwareirei,Ao aomata aika akea aia bure a na kakanikoia ma ni kangai:
20 ‘A a tia ni kamaunaaki taani kaaitaraira,Ao a na kabuekaki n te ai nikiran aia bwai.’
21 Karekea kinaakin te Atua ao ko na rau,Ao a na roko iroum baika raraoi.
22 Butimwaea te tua mai wina,Ao kawakin ana taeka i nanom.+
23 Ngkana ko okira Teuare Moan te Mwaaka, ao ko na manga kaokaki nakon arom,+Ngkana ko kaaki te buakaka man am umwanrianna,
24 Ao ngkana ko karenakoa am koora ae kakawaki* nakon te tano,Ao kooran Obira*+ nakoni mwarua aika riribwa,
25 E na riki ngkanne Teuare Moan te Mwaaka bwa am koora,*Ao e na riki bwa am tirewa ae te kabanea n tamaroa.
26 Bwa ane ko na rangi ni kimwareirei iroun Teuare Moan te Mwaaka,Ao ko na euta matam nakon te Atua.
27 Ko na bubutiia ao e na ongo iroum,Ao ko na kakororaoi am taeka ni bau.
28 E na nakoraoi te baere ko baireia bwa ko na karaoia,Ao e na oota te oota i aoni kawaim.
29 Bwa ko na kamaamaeaki ngkana ko taetae ni kamoamoako,Ma e na kamaiua te aomata ae nanorinano.*
30 E na kamaiuia te koraki aika akea aia bure,Mangaia ae ngkana a itiaki baim, ao ko na boni kamaiuaki.”
Taiani Kabwarabwara Mai Nano
^ Ke, “Te koaua bwa e kimwareirei Teuare Moan te Mwaaka.”
^ Ke, “ataei ake a a tia ni mate aia karo.”
^ Ke, “ake a kakimototoaki maiuia.”
^ Ebera, “te karaanga.”
^ Ke, “maibibi ni koora.”
^ Te tabo ae rangi n ataaki bwa e bati iai te koora aika taiani kabanea n raoiroi.
^ Ke, “maibibi ni koora.”
^ Ke, “te aomata ae mata n rawawata.”
