Iobi 24:1-25
24 “E aera Teuare Moan te Mwaaka ngkai e aki bairea te tai ni motikitaeka,+Ao a aera naake a ataa teuaei ngkai a aki nora ana bong?*
2 A kamwaingi kanikinaean tian abaia aomata,+Ao a kairiianako nanai ni man nakon aia tawaana.
3 A kakioianako aia taongki ataei ake akea tamaia,Ao a taumatoaa ana kao mwaane te aine ae e a tia ni mate buuna, bwa te bwai ni kaboomwi ibukin ana tangobwai.+
4 A kakioianako akana maiu ni kainnano man te kawai,A na karabaia kaain te aonnaba akana akea korakoraia mairouia.+
5 A ukoukora kanaia akana maiu ni kainnano n aroia taongki aika moaanti+ n te rereua.
A kakaaea te amwarake ibukia natiia n te rereua.
6 A na rikoriko n ana tawaana temanna,*Ao a na karemrem n aia nne ni kureebe akana buakaka.
7 Akea karabaaia ni kangainaa bwa akea aia kunnikai,+Akea rabunaia ibukin te mwaitoro.
8 A maratingo n te karau man te maunga,Ao a nimti taiani bwaa ibukin akeani katanaia.
9 E buritakinako te teei ae akea tamana mani mammana,+Ao a anaaki kunnikaia akana maiu ni kainnano bwa te bwai ni kaboomwi ibukin aia tangobwai,+
10 A kairoroiia bwa a na tiotionako n akea karabaaia, bwa akea aia kunnikai,Ma ni bora ni baki ngke a uouota te bwabwati ni uita.*
11 A korakai ni mwakuri i marenan oon te nne ni kureebe i aani kabuebuen te ngaina.*
A toutoui kureebe n te nne ni kamanti kureebe ma a bora n taka.+
12 A teimatoa ni ngirangira naake a a kaani mate i nanon te kaawa,Ao a tangitang ni kani buokaki naake a ikoaki kakaiaki,+Ma e bon aki iangoa te baei te Atua bwa te bwai ae aki riai.*
13 Iai ake a karitei nakon te oota,+Ao a aki atai kawaina,Ao a aki naba toui mwini kawaina.
14 E teirake te tia tiriaomata ngke e tabwena mainiku,E tiringia akana akea korakoraia ma akana maiu ni kainnano,+Ao e iraa n te bong.
15 E tataningaa te airoo matan te tia wene ni kimoa,+Ao e taku, ‘Akea ae e na norai!’+
Ao e rabuna ubuna.
16 A nini* taian auti n te rotongitong,Ao a kainia n te ngaina.
A ianena nakon te oota.+
17 Bwa titeboo te moaningabong irouia ma te rotongitong ae korakora,Ao a rangi n atai ana bwai ni kakamaaku te rotongitong ae korakora.
18 Ma a waekoa n uotakinako n te ran.*
Ao tibwangaia n te aba, e na boni kamaraiaaki.+
A na aki okiri aia nne ni kureebe.
19 N aron te mwautakataka ao te kabuebue ae uotaanako te tino ae e a ran,E uotiianako naba akana bure te Ruanimate!*+
20 E na mwanuokinna tinana,* ao a na baka n amwarake i aona iino.
E na aki manga uringaki.+
Ao a na mwaoto aomata aika aki raoiroi, n aron te aroka.
21 E tabarea te aine ae kanoabo,Ao e bwainikirina te aine ae e a tia ni mate buuna.
22 E na kabongana korakorana te Atua ni katiai aroia iai aomata aika korakora,Ma e ngae ngke a na teirake, ma bon akea kakoauaan ae a na maiu.
23 E kariaia te Atua bwa a na aki nanokokoraki ao a na mweraoi,+Ma a memena matana i aoni bwaai ni kabane ake a karaoi.*+
24 A karietataaki teutana te tai, ao imwina ai akea naba ngaiia,+A karinanoaki+ ao ni mate n ai aroia aomata nako.
A koreakinako n ai aron te amwi ni uita.
25 Antai ngkanne ae kona n taekinai bwa te tia keweKe ni kakewea au taeka?”
Taiani Kabwarabwara Mai Nano
^ Ae taekan ana bong ni motikitaeka.
^ Ke tao, “rikoa kanan aia man n te tawaana.”
^ Ke, e kona n nanona “te baare.”
^ Ke tao, “A katiinakoa te oera i marenan oon te nne ni kureebe.”
^ Ke tao, “te Atua e aki bukina temanna bwa e bure iai.”
^ Ebera, “keniken nako nanon.”
^ Ebera, “E butimwaaka riaon te ran.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Ebera, “te biroto.”
^ Ebera, “i aon aroaroia.”
