Iobi 34:1-37
34 Mangaia are e reita ana kaeka Eriu ni kangai:
2 “Ongora n au taeka, ngkami aika kam wanawana,Kakauongo irou, ngkami aika a bati ami atatai.
3 Bwa e tuoi raoi taeka te taninga,N aron te newe* ngkai e nora kangkangin te amwarake.
4 Ti na neneria i bon iroura bwa tera ae eti,Ao ti na baireia i marenara bwa tera ae raoiroi.
5 Bwa e taku Iobi, ‘I bon eti,+Ma e aki anganai te kaetitaeka ae riai te Atua.+
6 Te koaua bwa I kona ni kewe ni kaineti ma te moti ae riai ni karaoaki nakoiu?
E aki kona ni mao ikoakiu e ngae ngke akea te bure.’+
7 Antai te mwaane ae ai aron Iobi,Ae nima te taetae ni kakaniko n ai aron te ran?
8 Bon raoraoia taani kakaraoa ae bure,Ao e iraorao ma mwaane aika buakaka.+
9 Bwa e taku, ‘E aki kabwaia te mwaaneNgkana e kataia ni kakukureia te Atua.’+
10 Mangaia ae ongora irou, ngkami aika mwaane aika kam ataibwai:*
E bon aki kona te Atua ae koaua n iangoa karaoan ae buakaka,+Ao Teuare Moan te Mwaaka bwa e na karaoa ae kairua!+
11 Bwa e na angan te aomata kaniwangana ni kaineti ma te bwai ae e karaoia,+Ao e na karokoi i aona mwin nako arona.
12 Bwa e bon aki karaoa ae buakaka te Atua,+Ao e aki kabwaoua te kaetitaeka ae riai Teuare Moan te Mwaaka.+
13 Antai ae mwiokoia bwa e na tararuaa te aonnaba,Ao antai ae rineia bwa te mataniwi i aon te aonnaba ni kabutaa?*
14 Ngkana e katurua ana iango i aoia,Ao ngkana e a manga bon anaa te korakora ae te maiu* are irouia ao te ikeike,+
15 A na bane ni mate aomata,*Ao a na okira te tano te botannaomata.+
16 Mangaia ae ngkana iai am ataibwai ao kakauongo nakon aei,Ongora raoi nakon te bwai ae I taekinna.
17 E kona n tautaeka te aomata ae riribaa te kaetitaeka ae riai,Ke ko na kabuakakaa te aomata ae mwaaka ae raoiroi?
18 Ko na kangai nakon te uea, ‘Bon akea uaam,’Ke nakoia bwaanuea, ‘Kam buakaka’?+
19 Bon iai Teuare aki kaotiota te inanonano nakoia natinuea aika mwaane,Ao e aki tatangiriia riki aika kaubwai nakoia aika maiu ni kainnano,*+Bwa bon ana mwakuri baina ngaiia ni kabane.+
20 A kona n rina ni mate+ n te nukanibong,+A rurubenebene ao a maunanako,A kamaunaaki naba aomata aika mwaaka, ma tiaki ni baia aomata.+
21 Bwa a memena matan te Atua i aoni kawain te aomata,+Ao E nori nakonakona ni kabane.
22 Akea te rotongitong ke te nuu ae matentenIke a kona ni karabaia iai taani kakaraoa ae bure.+
23 Bwa e aki motika te tai teuana ae baireaki te Atua ibukin te aomataBwa e na kaoti i matana ni motikaki taekana.
24 E uruia aika mwaaka n akea kainnanoan te kakaae,Ao e kateiia tabeman bwa oneani mwia.+
25 Bwa e ataa te bwai ae a karaoia,+E kabwakaia n te bong ao a kamanatuaaki.+
26 E oreiia ibukini buakakaiaN te tabo ae a kona n noraki iai irouia aomata nako,+
27 Ibukina bwa a a tia n rairakinako man irirakina,+Ao a aki mutiakini kawaina nako.+
28 A karika takaruaia aomata aika maiu ni kainnano nakoina,N te aro are e a ongo tangia aomata aika akea korakoraia.+
29 Ngkana e teimatoa ni kainabwabu te Atua, ao antai ae kona ni kabuakakaa?
Ao ngkana e karabaa matana, antai ae kona n noria?
Ngkana tao nakon te natannaomata ke te aomata, ma bon titeboo naba mwina,
30 Ngaia are e aki kona n tautaeka te aomata ae aki maaka te Atua,*+Ke ni kaaki bwaai ni kamwane imwaia aomata.
31 Bwa e na kangai temanna nakon te Atua,‘I katuuaaeaki e ngae ngke I aki karaoa ae bure,+
32 Reireinai te bwai ae I kabwaka n noria,Ao ngkana I a tia ni karaoa ae bure, N na aki manga karaoia’?
33 Te koaua bwa e na anganiko kaniwangam ngkana ko rawa nakon ana moti?
Ko riai ni baireia, ao tiaki ngai?
Mangaia ae tuangai te bwai ae ko ataia raoi.
34 A na kangai nakoiu mwaane aika ataibwai,Ao te mwaane ae wanawana ae ongora irou,
35 ‘E taetae n aki atatai Iobi,+Ao akea te ataibwai n ana taeka.’
36 Ke e kataaki Iobi* ni karokoa tiana ma tokina,Ibukina bwa titeboo ana kaeka ma aia kaeka mwaane aika buakaka.
37 E raona ana bure n te karitei,+Ao e kakaniko n ubouboi baina i matara,Ao e kabatiai ana taeka ni kaitaraa te Atua ae koaua!”+
Taiani Kabwarabwara Mai Nano
^ Ebera, “ngangarake.”
^ Ebera, “te nano.”
^ Ke, “te aonnaba ae maekanaki.”
^ Nora Nanon Taeka, “Taamnei.”
^ Ebera, “iriko.”
^ Ke, “bwaanuea nakoia aika mangori.”
^ Ke, “te tia tannako man te koaua.”
^ Ke tao, “Tamau, ke e kataaki Iobi.”
