Ioera 1:1-20
1 E kangai ana taeka Iehova ae roko iroun Ioera* are natini Betiuera:
2 “Ongora n aei ngkami aika unimwaane,Ao kakauongo ngkami ni kabane aika kaain te aba.*
E a tia n riki te aekaki aei n ami bong,Ke n aia bong ami bakatibu?+
3 Taekinna nakoia natimi,Ao ke a taekinna natimi nakoia natiia,Ao natiia nakon te roro are imwina.
4 Nikirani kanan te rokati ae kaakang e kanna te nna n rokati,+Ao nikirani kanan te nna n rokati e kanna te rokati ae akea baina ni kiba,Ao nikirani kanan te rokati ae akea baina ni kiba e kanna te rokati ae riao amwamwarakena.+
5 Kam na uti ngkami aika taani kokoro ni manging+ ao kam na tang!
Tanginiwenei ngkami ni kabane aika taani moi wain,Ibukina bwa e a anaaki mai wimi te wain ae karewe.+
6 Bwa e a tia n roko i abau te natannaomata teuana ae korakora, ao e aki kona ni warekaki.+
Wina boni win te raian,+ ao mwangaina boni mwangain te raian.
7 E a tia n urua arokau ae te kureebe, ao e bita arokau ae te biiku nakon tii botona,E kuoti raoi kunia ao ni kakarenakoi,Ao a a tiku ni mainaina mwaangaia.
8 Tanginiwenei n aron ae e karaoia te aine* ae kunnikainna n te raerobwa* ae tuai ni boo ma te mwaane,Ibukin ana kabae* mangke te roro n rikirake.
9 A a toki man ana auti Iehova te karea ae te amwarake*+ ao te karea ae te moi.+
Ao a a nanokawaki ibonga* ake ana tabonibai Iehova.
10 E uruakaki te tawaana, ao e nanokawaki aontano,+Bwa e a rotakibuaka te uita,* ao e a bwatakataka te wain ae boou, ao e a bane te oera.+
11 A bwara nanoia taan ununiki, ao a tanginiwenei taan ribanaa te kureebeIbukin te uita ao te baare.
Bwa e a toki taiakin te tawaana.
12 E a mwautakataka te kai ae te kureebe,E a rai te aroka ae te biiku.
A a bane ni mwautakataka arokan te tawaana,Ae te bamkuranete,* te baam, ao te aboro.+
Bwa e a bitaki te kimwareirei nakon te maamaa i buakoia aomata.
13 Karini ami kunnikai aika raerobwa* ngkami aika ibonga, ao nanokawaki,*Tanginiwenei ngkami aika taani beku n te baonikarea.+
Rinnako ao kangainaa ni bwaina te raerobwa ngkami aika ana tabonibai Atuau,Ibukina bwa ai akea temanna ae uota te karea ae te amwarake+ ke te karea ae te moi +nakon ana auti Atuami.
14 Katanoataa* te aki mamatam. Wewete nakon te botaki ae okoro.+
Ikotiia unimwaane ma kaain te aba ni kabaneNakon ana auti Iehova ae Atuami,+ ao kam na tang nakon Iehova ibukini buokami.
15 Ai kananoangara te aba ibukin te bong anne!
Bwa e a kaan ana bong Iehova,+Ao e na roko n aron te kamaunanakoaki mairoun Teuare Moan te Mwaaka!
16 Tiaki e a tia n anaaki te amwarake mai matara,Ao te kakatonga ma te kimwareirei man ana auti Atuara?
17 A a rai koraa* i aan aia tiaabora.
A a kamaroaa auti ni kaikobwai.
A uruakaki ni kabwakaaki auti ake a kawakinaki iai amwarake, bwa e a mwautakataka te uita.
18 E ngirangira naba te nanai ni man!
A tiotionako ma te mangaongao nanai ni kao bwa ai akea aia tawaana!
Ao a a kaaitara ma te katuuaaeaki nanai n tiibu.
19 N na wewete nakoim ngkoe ae Iehova,+Bwa e a tia te ai ni kabueki tawaanan te rereua,Ao e kamaunai arokan nako te tawaana uran te ai.
20 A kantaningaiko naba manin te tawaana aika moaanti,Ibukina bwa a a bwatakataka karaanga n ran,Ao e a tia te ai ni kabueki tawaanan te rereua.”
Taiani Kabwarabwara Mai Nano
^ Ae nanona, “Iehova Bon te Atua.”
^ Ke, “te aonnaba.”
^ Ke, “te ateiaine.”
^ Nora Nanon Taeka.
^ Ke, “buuna.”
^ Nora Nanon Taeka.
^ Ke, “te karea ae te koraa.” Nora Nanon Taeka.
^ Ke, e kona n nanona “te baare.”
^ Nora Nanon Taeka.
^ Ke, “ororei bwabwaami.”
^ Ebera, “Kabaei nukami.”
^ Ebera, “Katabua.”
^ Ke tao, “biiku aika mwau.”
