Iona 1:1-17
1 E roko ana taeka Iehova iroun Iona*+ are natin Amitai ae kangai:
2 “Teirake, ao naako Ninewe+ ae te kaawa ae kakannato, ao katanoataa motikan taekan neienne bwa e a roko i matau buakakaia kaaina.”
3 Ma e kawaekoaa Iona ni birinako mairoun Iehova nako Taretiti. E ruo nako Iobe ao e nora te kaibuke tewaana ae e na nako Taretiti. Ai ngaia are e a kabwakaa kantokana ao e a toka iai, bwa e na nako ma te koraki ake n te kaibuke nako Taretiti ni kararoaa mairoun Iehova.
4 Ao e a karokoa te ang ae baibati Iehova i taari, ao e a rangi ni korakora buakan taari n te aro are e nang urubekebeke te kaibuke.
5 A a rangi ni maaku taani boborau n te aro are a a weweteia atuaia ngaiia n tatabemania nako ibukini buokaia. Ao a a tetewenakoi bwain te kaibuke i taari bwa a na kabebetea.+ Ma e a tia n ruo rikaaki Iona nako kabin te kaibuke, ike e a wene iai ao ni matunako.
6 E kawaria te kaaben n te kaibuke ao e taku nakoina: “E aera ngkai ko a matu? Teirake, ao wewetea atuam! Tao ane e na mutiakinira te Atua ae koaua, ao ti na aki mate.”+
7 Ao a taku i marenaia: “Nakomai bwa ti na karaoa te ananga ni katekeraoi+ ni kakaaea bwa antai ae e na bukinaki n te kabuanibwai aei.” Ai ngaia are a a karaoa te ananga ni katekeraoi, ao e a bwakara Iona te baerei.+
8 A taku nakoina: “Tuangira taiaoka bwa antai ae e na bukinaki n te kabuanibwai ae roko i aora aei? Tera am mwakuri, ao ko nako mai ia? Kaain ia ngkoe, ao ko nako man te botannaomata raa?”
9 E kaeka ni kangai: “Bon te Ebera ngai, ao I mamaaka* Iehova ae Atuani karawa, ae Teuae karaoa taari ma te aba ae mwau.”
10 Ao a a rangi ni maaku riki mwaane aikai, ao a titirakinna ni kangai: “Tera ae ko a tia ni karaoia?” (A ataia mwaane aikai bwa e birinako mairoun Iehova, ibukina bwa e a tia n tuangia.)
11 Ngaia are a taku nakoina: “Tera ae ti riai ni karaoia nakoim bwa e aonga n raoi taari ibukira?” Bwa e a ririkirake ni buaka taari.
12 E kaeka ni kangai: “Tabekai ao karenakoai i taari, ao e na raoi taari ibukimi, bwa I ataia bwa e roko te buaka ae korakora aei i aomi ibukiu.”
13 Ma a kakorakoraia ni bwennarina* mwaane aikai bwa a na kaoka te kaibuke nakon te aba ae mwau, ma a aikoa kona ibukina bwa e a ririkirake ni buaka taari n otabwaninia.
14 Ao a wetea Iehova ao a taku: “Iehova, ti butiiko bwa ti na aki mate ibukin te aomata aei! Tai kabukintaekaira ibukin raraan te aomata ae akea ana bure aei, kioina ngkai bon nanom aei ni kabane, ngkoe ae Iehova.”
15 Ao a tabeka Iona ao a karenakoa i taari, ao e a raoi taari.
16 Ao a a taonakinako mwaane aikai ni maakakin Iehova ae korakora,+ ao a anga te karea nakon Iehova ao a taetae ni bau.
17 E a kanakoa ngkai te ika ae totoa Iehova bwa e na onga Iona, n te aro are e a mena Iona i nanoni biroton te ika i nanon tenua te ngaina ao tenua te bong.+
Taiani Kabwarabwara Mai Nano
^ Ae nanona, “Taobe.”
^ Ke, “taromauria.”
^ Ke, “kataia ni karekea kawaia.”
