Iona 4:1-11
4 Ma e rangi n aki kakukurei te baei iroun Iona, ao e a urarake unna.
2 Ai ngaia are e a tataro nakon Iehova ni kangai: “Iehova, tiaki ngaia aei te bwai are I tabeaianga iai ngke I mena i abau? Anne bukina are I kataia ni birinako iai nako Taretiti+ n te moantai, bwa I ataia bwa bon te Atua ngkoe ae ko atataiaomata* ao n nanoanga, ko iremwe n un ao e bati iroum te tangira ae koaua,*+ ae ko nanamakina te rawawata ni kaineti ma te kabuanibwai.
3 Iehova, taiaoka anaa maiuu,* bwa e raoiroi riki ae I mate nakon ae I maiu.”+
4 E titiraki Iehova ni kangai: “E riai bwa ko na rangi n un?”
5 Ao e otinako Iona man te kaawa ao e tekateka i mainikun te kaawa. Ao e karaoa katanana ikekei, ao e tekateka i aan nuuna bwa e na noria bwa tera ae e na riki nakon te kaawa.+
6 Ao e katauraoa te aroka tekaina ae te bangke* Iehova ae te Atua bwa e na rikirake i etan Iona, bwa e na kanuua atuna ao ni kabebetea rawawatana. Ao e a rangi ni kukurei Iona n te aroka are te bangke arei.
7 Ma ngke e a tabwena mainiku n te bong are imwina, ao te Atua ae koaua e a kanakoa te mwata, ao e a kana te aroka are te bangke, ao e a rai.
8 Ngke e a moanna n oti taai, ao e kanakoa naba te angimainiku ae kabuebue te Atua, ao e a bakarerea atun Iona kabuebuen te riringa, ao e a ntongitong. E teimatoa n tuatua bwa e na mate, ao e teimatoa ni kangai, “E raoiroi riki ae I mate nakon ae I maiu.”+
9 E titiraki te Atua nakon Iona ni kangai: “E riai bwa ko na rangi n un ibukin te aroka ae te bangke?”+
Ao e taku: “E riai uniu. E rangi ni korakora uniu ao anne bukina ae I tangiria ni mate iai.”
10 Ma e taku Iehova: “Ko nanoangaa te aroka ae te bangke, ae ko aki ribanaia ao ni karikirakea, e rikirake n te tairiki ae tii teuana ao e mate n te tairiki ae tii teuana.
11 Tiaki I riai naba n nanoangaa Ninewe ae te kaawa ae kakannato+ ae a mena iai aomata aika raka i aon 120,000 ake a aki naba ataa ae eti ao ae kairua,* n ikotaki naba ma aia man aika bati?”+
Taiani Kabwarabwara Mai Nano
^ Ke, “akoi.”
^ Ke, “te tangira ae kona n onimakinaki.”
^ Ebera, ne’phesh, nora Nanon Taeka.
^ Ke tao, “te aroka ae te kaetita ae te oera.”
^ Ke, “angaataia ma angamaingia.”
