Iotua 8:1-35
8 E taku ngkanne Iehova nakon Iotua: “Tai maaku ke ni maakunrang.+ Ko na kairiia mwaane aika taani buaka ni kabane ao waerake n ekaanako Ai. Noria, I a tia n anga nakoim uean Ai ma ana aomata, ao ana kaawa ma abana.+
2 Ko na karaoa nakon Ai ma ueana te aro are ko karaoia naba nakon Ieriko ma ueana,+ ma kam a kona ngkai ni kuribwai bwaai ni kuri ake iai ma nanai ni man ake iai, i bon ibukimi. Ko na katikuia taani karan i akun te kaawa.”
3 Mangaia are e a waerake n ekaanako Ai Iotua ma mwaane ake taani buaka ni kabane. E rineiia taani buaka aika korakora aika 30,000 Iotua, ao e kamwanangaia n te bong.
4 E tua ae kangai nakoia: “Noria, kam na kakaran i akun te kaawa. Tai rangi ni kararoaingkami ma te kaawa, ao kam na bane n tauraoi.
5 Ao ngai ma aomata ni kabane aika raou ti na kaania te kaawa, ao ngkana a otinako n ekiranako n aron are mai mwaina,+ ao ti na mumun rikaaki mairouia.
6 Ngkana a otinako n rimwira, ao ti na kairiianako man te kaawa, bwa ane a na kangai, ‘A a mumun rikaaki mairoura n aron are mai mwaina.’+ Ao ti na mumun rikaaki mairouia.
7 Ao kam riai ngkanne n teirake man ami tabo ni karan ao taua te kaawa. E na anga nakoimi Iehova ae Atuami.
8 N te tai naba are kam taua iai te kaawa, ao kam riai ni kaurarakea.+ Kam riai ni karaoa are e taekinna Iehova. Noria, I a tia n tua nakoimi.”
9 E a kamwanangaia ngkanne Iotua ao a a mwaati nakon te tabo ni karan. A mena i marenani Betaera ma Ai i maeaon Ai, ao e tiku Iotua i rarikia nikiraia tautia n te tairiki anne.
10 Imwin utimwaakan Iotua n te moaningabong ao ikotakia* kaain te taanga ni buaka, ao e a kairiia nako Ai, ngaia ma aia unimwaane tibun Iteraera.
11 A bane ni mwaati mwaane ake taani buaka+ ake raona ao a mwananga nako moan te kaawa. A kaembwa i meangin Ai, ao iai te mwarua i marenaia ma Ai.
12 N te tai anne ao e a tia ni karekeia mwaane aika tao 5,000 ao e katikuia bwa taani karan+ i marenani Betaera+ ma Ai, i maeaon te kaawa.
13 Mangaia are a katea aia kaembwa kaain te taanga ni buaka i meangin te kaawa,+ ao a mena taan tantani mai buki i maeaon te kaawa,+ ao e mwananga Iotua nako nukan te mwarua* n te tairiki anne.
14 Ao ngke e bon nora naba aei uean Ai, ao e waekoa n otinako ngaia ma mwaanen te kaawa n te karangaina, bwa a na buakania tibun Iteraera n te tabo ae kaaitara ma te rereua ae aoraoi.* Ma e aki ataia teuaei ae iai taani karan aika katukaki i akun te kaawa, bwa a na ekianako.
15 Ngke a a buaka mwaanen Ai, ao a a birinako naba Iotua ma tibun Iteraera ni kabane n te kawai nakon te rereua.+
16 Ao a a bane ni weteaki aomata ake n te kaawa bwa a na kaeiia, ao ngke a kaea Iotua ao a a kairakinako man te kaawa.
17 Akea te mwaane temanna ae tiku i Ai ao i Betaera ae e aki otinako n rimwia tibun Iteraera. A katuka te kaawa ni katangainaa ao a kakioia tibun Iteraera.
18 E a taku ngkai Iehova nakon Iotua: “Arora te koro ane i nanoni baim ni kaitaraa Ai,+ bwa N na bon anga nako nanoni baim.”+ Ngaia are e arora te koro are i nanoni baina Iotua ni kaitaraa te kaawa.
19 N te tai are e arora iai baina, ao a waekoa n teirake taani karan man aia tabo ao a biri n rin n te kaawa ma n taua. Ao a aki tabwara ni kabueka te kaawa n te ai.+
20 Ngke a rairaki mwaanen Ai, ao a a nora bubun te kaawa bwa e a waerake nako karawa, ao ai akea korakoraia ni biri nakon te tabo teuana. Ao te koraki ake a birinako nakon te rereua a a manga rairaki nakoia taani kaeiia.
21 Ngke e noria Iotua ma tibun Iteraera ni kabane bwa a a tia n taua te kaawa taani karan, ao a nora bubun te kaawa bwa e a waerake, ao a a rairaki ma ni buakania mwaanen Ai.
22 Ao naake tabemwaang a otinako man te kaawa ni kaitiboo ma ngaiia, n te aro are a a mwane i nuka mwaanen Ai, ao tibun Iteraera tabeman n te itera aei ao tabeman n te itera are teuana, ao a kamateia ni karokoa ae ai akea temanna ae tiku ae maiu ke ae e reke birinakona.+
23 Ma a taua uean Ai+ ngke e maiu ao a kairia nako matan Iotua.
24 Ngke a a tia tibun Iteraera ni kamateia kaain Ai ni kabane ake a kaeiia nakon te rereua ao ni kabwakaia n te kabaang, ao a a manga bane tibun Iteraera n okira Ai ao ni kamateia n te kabaang ake a tiku iai.
25 Mwaitiia ni kabane ake a bwaka n te bong anne, mairoun te mwaane ni karokoa te aine bon 12,000, aika kaain Ai ni kabane.
26 E aki roko n te kaoka baina Iotua are e arora iai te koro,+ ni karokoa ae e tia ni kamaunaia kaain Ai ni kabane.+
27 Ma a anai nanai ni man ao bwaai ni kuri ake n te kaawa tibun Iteraera i bon ibukia, ni kaineti ma baike e tua Iehova nakon Iotua.+
28 E kabueka ngkanne Ai Iotua, ao e karikia bwa te kaawa ae urubekebeke,+ ao e tiku ni karokoa te bong aei.
29 E taura uean Ai i aon te kai* ni karokoa ae bong, ao ngke e nangi bung taai ao e tua Iotua bwa e na karuoaki rabwatana man te kai.+ Ao a karenakoa i rarikini mataroan oon te kaawa ao a katabuka te bwariko n atibu i aona ae bubura, ao e boni mena ikanne ni karokoa te bong aei.
30 N te tai anne ao Iotua e katea te baonikarea i aon te Maunga ae Ebara+ nakon Iehova ae Atuan Iteraera,
31 n aron are e tua Mote are ana toro Iehova nakoia tibun Iteraera, ao n aron are koreaki ni bokin te Tua+ Rinanoni Mote, ae kangai: “Te baonikarea ae karaoaki man atibu aika aki korokoreaki, aika e tuai ni kabonganaaki i aoia te bwai ni mwakuri ae karaoaki man te biti.”+ A anga i aona taiani karea ni kabuekaki nakon Iehova n ikotaki ma karea n raoi.*+
32 Ao e korea ikanne i aon taian atibu katotongan te Tua+ are e koreia Mote i mataia tibun Iteraera.+
33 A bane n tei tibun Iteraera, aia unimwaane, mataniwi, ao aia tia moti, n iteran te Ati ni kauaitera, i moaia ibonga* ake tibun Rewi ake a uouota ana ati ni berita Iehova. A mena naba ikanne naake a maeka n iruwa n ikotaki ma ake bon tibun Iteraera.+ A tei iterani mwaitiia i moan te Maunga ae Keritim ao ake iteraia i moan te Maunga ae Ebara+ (n aron are e tua mai mwaina Mote are ana toro Iehova),+ bwa a na kakabwaiaia tibun Iteraera.
34 Imwin aei ao e wareki taekan nako te Tua+ ni kabaibati aika taiani kakabwaia+ ao taian rekenikai,+ ni kaineti ma bwaai ni kabane ake a koreaki ni bokin te Tua.
35 Bon akea te taeka teuana mai buakoni baike e tua ni kabane Mote, ae e aki warekia Iotua ni kabaibati i matan te botaki n aomata aika tibun Iteraera,+ n ikotaki ma aine ao ataei, ao aomata ake a maeka n iruwa+ ake a mena* i buakoia.+
Taiani Kabwarabwara Mai Nano
^ Ke, “baireaia.”
^ Ke, “te tabo ae aoraoi ae mena n te mwarua.”
^ Ke, “te Arabaa.”
^ Ke, “aroka.”
^ Ke, “te karea n iraorao.” Te karea ae kaikonaka ae a kaai n amwarake ibonga, taan taromauri, ao Iehova, ni kaota te raoi i marenaia.
^ Nora Nanon Taeka.
^ Ebera, “nakonako.”
