Itaia 33:1-24
33 Ke e reke kaim ngkoe ae te tia kamauna te aba ae ko tuai ni kamaunaaki+
Ngkoe ae te tia kamwane ae ko tuai ni kamwaneaki!
Ngkana ko tia ni kamauna te aba ao ko na manga kamaunaaki.+
Ngkana ko tia ni kamwanea te aba ao ko na manga kamwaneaki.
2 Iehova, ko na akoira.+
Ti kabotoi ara kantaninga i aom.
Boutokaira n anganibaim*+ ni katoa ingabong,Eng, ara tia kamaiu n tain te rawawata.+
3 A birinako botannaomata ni karongoaan te kiriwe.
Ngkana ko teirake ao a uamaenako natannaomata.+
4 A na ikotaki ami bwai ake kam kuribwai n aroia rokati aika riao amwamwarakeia ngkana a ikotaki.
A na ienikuri nako aona aomata n aroia nna n rokati.
5 E na karietataaki IehovaBwa e mamaeka n te tabo ae rietata i eta.
E na kaona Tion n te kaetitaeka ae riai ma te raoiroi.
6 Bon Teuare anga te mweraoi n am tai akanne,Ae e anga te kamaiu ae bati,+ te wanawana, te atatai, ao maakakin Iehova,+Ae ana bwai ae kakawaki.*
7 Noria! A tatakarua aia aomata aika ninikoria n te kawai.
A tang ni korakai taan tataekina te rau.
8 A kitanaki kawai aika totouaki,Ai akea te aomata ae mwananga i nanoni kawai.
E* urua te berita,E rawa nakon taiani kaawa.
E aki tabeakinia aomata nako.+
9 E tanginiwenei* aon te aba ao e mwauteretere.
E maamaa Rebanon+ ao e a mauna.
E a riki Tiaron bwa ai aron te rereua,Ao Batian ma Karemera a ioi baaia ni kamrarai.+
10 “N na teirake ngkai,” bon ana taeka Iehova,“N na karietataai ngkai,+N na boni kamoamoaai ngkai.
11 Kam bikoukoua te uteute ae mwau ao kam bungia mwin te uita ae mwau.
E na kabuekingkami ami iango n aron te ai.+
12 Ao a na riki botannaomata bwa kaanga te raim ae kabuekaki.
A na kauraaki n te ai kaanga ai aron aroka aika kateketeke aika koreaki ni kabwakaaki.+
13 Ngkami aika kam raroanako, ongora n te bwai ae N na karaoia!
Ao ngkami aika kam kaan, kaotia bwa kam ataa korakorau.
14 A maakunrang taani bure ake i Tion.+
A taonaki n te rurubenebene taan tannako man te koaua ao a kangai:
‘Antai iroura ae kona ni maeka ike e mena iai te ai ae kaakang?+
Antai iroura ae kona ni maeka ma uran te ai ae aki kona n tiringaki?’
15 Te aomata ae nakonako n te raoiroi ae teimatoa,+Ae e tataekina te bwai ae eti,+Ae e rawa nakon te bwai ae aki eti ma te raka ae reke n te babakanikawai,Ae a rawa baina nakon te bwai ni kamaraato n oneani mwin ae e na anaia,+Ae e kaini taningana nakoni karakinani babaire ibukin te katuturaraa,Ao ae e kaini matana bwa e aonga n aki taraa te bwai ae buakaka.
16 E na maeka n te tabo ae rietata,E na mena ana tabo ni kamanomano ae mano raoi* n noono aika kiribwaa,E na katauraoaki kananaAo e na bon aki kona n tare ana ran.”+
17 A na nora te uea matam i nanon tamaroana.
A na nora te aba ae raroanako.
18 Ko na uringa* te maaku i nanom ni kangai:
“E nga te tia koroboki?
E nga te tia katinea te angabwai?+
E nga te tia wareki taian taua?”
19 Ko na aki manga noriia aomata aika akiako,Ae te natannaomata ae kangaanga te ota n aia taetae,Ae ko aki kona n ota ni baebaen neweia.+
20 Taraa Tion, ae ara kaawa n toa!+
A na nora Ierutarem matam bwa te tabo ni maeka ae rau,Ae te umwanrianna ae e na aki kamwaingaki.+
A na bon aki buutaki kain rooana,Ao akea roobuna ae e na moti.
21 Ma e na kamanoira ikanne Iehova are Teuare Mimitong,N aroni karaanga ke kawain raan aika raababa ake a kamanoa te kaawa,Ae akea te nna ni kaibuke ae e na nako iai,Ao a na aki toua kaibuke aika bubura.
22 Bwa Iehova bon ara tia Motikitaeka,+Iehova bon ara tia Karaotua,+Iehova bon ara Uea.+
Boni Ngaia ae e na kamaiuira.+
23 A na tinetine n aki koo am roobu.
A aki kona n taua te aneang ke n irakea te ie.
N te tai anne ao a na tibwatibwaaki bwaai ni kuri aika bati.
A na kuribwai naba baika bati mwauku.+
24 Ao akea te tia maeka* iai ae e na kangai: “I aoraki.”+
A na kabwaraaki aia bure aomata aika maeka n te aba.+
Taiani Kabwarabwara Mai Nano
^ Ke, “ni korakoram.”
^ Ke tao, “te bwai ae kakawaki ae E anga.”
^ E kaineti nakon te tia kairiribai.
^ Ke tao, “mwautakataka.”
^ Ke, “te tabo ae rietata ae mano raoi.”
^ Ke, “kananoa am iango i aon.”
^ Ke, “kaaina.”
